Matthew 3

Zande

← Chapter 2 Jump to: Chapter 4 →

1Ni gu rago re Yoane Babapatiza ata ye nitungusi pai ngbakungba yo Yuda yo,

2ki ya, Oni sá gaoni berã: bambiko gu ngbi nga ga ngbangbaturũ si nambeda.

3Bambiko ko du re nga gu ko Yesaya agumba pa ko nga nebi niya, “Fugo boro napaa ngbakungba yo, ya Oni mbákadi ga Gbia gene, Oni rúrugu gako agene.”

4Were Yoane aukadi mange kameri, na giri dimose nga kpoto. Gako riahe nangia ayere na anyege nvuo.

5Aboro ki kuru Yerusarema yo koyo du ko ni, na Yuda yo dunduko, na rogo gu ringara dunduko du kirikiri pati Yaradene;

6ko ki bapatizi yo rogo gu di nga Yaradene, i nikusi gayo ingaapai.

7Ono ho ko abi dungu aFarusi ni, i niye sa gako bapatiza na aSadoke, ko ki ya fu yo, “Oni nga awiri awo, da niyugu gu pai fu roni nga oni oro be gu zinga nikaye?

8Oni zúku rinde rengbe na saberã,

9ka oni bérẽ nga ha ku kpotoroni yo, ki ya ‘Ani du na barani nga Abarayama’ ya; bambiko ya mi fu roni wẽ, ka Mbori sa agi ambia asa re ni awiri Abarayama.

10Awere i moi mangua ti tarã angua: were i ade agu angua ade dunduko azu nga wene zuzuhe ya, ki bafu he ku we yo.

11“Mi nabapatizi roni ni ime tipa saberã, ono gu ko nikaye fuo re ko nga bahe ti re, ka mi tindi nga gako rakata te. Ko abapatizi roni ni Ziazia Toro na we.

12Gako úigita ahe du beko, ko agírisa gako bataka ahe; ko ki ndukudi gako zendeahe ku rogo gako gbamu, ono umuhe ko ka zo ho ni gu we ka abisa nga ya.”

13Yesu ki ye Gariraya yo ku Yaradene yo koyo du Yoane ni, ko bapatizi ko.

14Ono Yoane akpi nyemu ka ka na ni be ko, ki ya, “Mo niye fuo re mi bapatizi ro, wa du mo ka bapatizi re?”

15Ono Yesu ki ta karaga ha niya fu ko, “Mo ídi he aida awere; bambiko si ngba ka digisa ruruapai dunduko.” Ko ki idi he aida fu ko.

16Yesu, ho i abapatizi ko ni, ko ki guari ime yo ni ba sa. Ngbangbaturũ ki za fu ko, ko ki bi ga Mbori Ziazia Toro nazorã wa mbipo ki ye ku ri ko;

17oni ngére, fugo ki ta paa ngbangbaturũ yo, niya, “Wire du re, nyemuko namanga re, ngba ko ti re gbe.”

← Chapter 2 Jump to: Chapter 4 →