Song of Solomon 1

Zande

Jump to: Chapter 2 →

1Gu Bia nga ga Soromo nasusa Abia dũ.

2Ako, mo nyóro nga ngbare ni gu dungohe nga ga ngbaro! Bambiko ga nyemuse ngba ti imekakue,

3ga nzeme mbeda du na wene fuõho ti ni, rimoro du wa gu nzeme uka yo ho; si du paranga ade nakpi nyemu ro ti ni.

4Mo gbé re fuo ro, ani ípisi tirani. Bakindo ye na mi ku tii gako bambu yo. Ani adú pusiapusia ki ningi angi rogo ro yo; ani atámbua pa ga nyemuse gbe susi pa imekakue; si ru i kpi nyemu ro.

5Mi tigimi du ni bi re, ono na wene ngbanyare, Ako wiri aboro Yerusarema nga ade, mi wa kina bamburoko Kedara yo, wa gu roko dadahe nga ga Soromo.

6Ka oni ngére nga kono du mi ni bambiko kpotore gbagbagba ya, bambiko uru zamasi kpotore. Awirinina nga akumba azingi kuti re, i asa re ni babanda aati bakakue; ono kina gimi ati bakakue mi abanda nga ya!

7Ako mo mbisimore nakpi nyemu ro, mo gúmba ha fere, wari mo nariga gamo rimbasa akandoro ni? wari mo napiga ra ni ri bebere uru? bambiko tipagine ka mi du ti ni wa boro nangbuo angbuo fuo ga kuaro rimbasa akandoro?

8Ako mo du tamaro ni wene he susi dagba ade, ka mo aina nga ha ya, mo péke fuo ndu rimbasa akandoro, ki rigi gamo awiri akandoro pati ga ababanda akandoro abamburoko.

9Ako badiangbare, mi ringbisi pa ro kuti gu nafarasi du ti ga Faro angbagidavura.

10Pangbaro du na wene ngbanyaha na ũfonga ahe, gorõro du na giri wene ufonga he ti ni a.

11Ani ambákada aũfonga ahe tipa ro ni dahabu, fo yo ho ni dudu feda.

12Ho bakindo nisungu ni ku kpuko yo, gi nzeme nada akusi gaha wene fuõho.

13Gu ko mi akpi nyemu ko susi, ko du fere wa wene fuõngua mure, napi dagba amamure.

14Gu ko mi akpi nyemu ko susi, ko du fere wa kina kpura mbumbuda wiri ngua wiri rindikiwe, aati bakakue Enegedi yo.

15Mo ngére, badiangbare, ngba tamaro angba; mo ngére, ngba tamaro angba; bangiro wa ambipo.

16Mo ngére, mo mi akpi nyemu ro susi, ngba tamaro angba, ii, mo ni betedi ro. Gaani barame du ni wene ngua;

17gaani basori bambu nga ngua kedara, gaani basongodi ri bambu nga ngua kupuresa.

Jump to: Chapter 2 →