Song of Solomon 4

Zande

← Chapter 3 Jump to: Chapter 5 →

1Ako badiangbare, mo ngére, ngba tamaro angba, mo ngére, ngba tamaro angba! Bangiro wa ambipo gii ga roko dadari yo. Mangeriro wa rimbasa ameme, nandu ti ngbadu bagangara Girada.

2Rindiro wa rimbasa anaakandoro i akpe mangera nga agu ra nakura rogo bazunda tira yo, ami dunduko nabatika awira ni abi, a nga gu ru dagba ra kpi wiru sa te.

3Kpotongbaro wa zamba gire, ngba ngbaro angba. Pavururiro wa zuzuhe wa ga ndavu i nakparaka ha ue gii ga roko dadari yo.

4Gorõro wa ga Dawidi ngbaho bambu, i adua ha tipa rga marãvura koyo, i asi avurakube wa 1,000 ku ri he, agu aũvura re nga ga airanyaka dunduko.

5Mamuro ue wa kina fogo agbangbaria ue, nagbangbaria abatika ra ni abi, nari riahe dagba aranga yo.

6Mi andú ku ri bagangara du mure ti ni, na sa gu gangara adu fuõngua ti ni, daho rago ka gira ni, nzereme ki ga ku sa yo.

7Ako badiangbare, ngba tamaro angba; serõ ti ro te.

8Diare, mo yé, ani gúari na mo Rebanona no; ani gúari Rebanona no. Mo gúari ri Amana yo, na ri Senira yo na ri Erumona yo, rogo asima abahu yo, na bagangara amama yo.

9Ako dawire, nga diare, mo angarãsi kpotore yo ni ngbarago, mo angarãsi kpotore yo ni ngbarago be ngera ro, na gu wene he sa du ti gamo arekegose.

10Na ngba ga nyemuse, ako dawire, nga diare! ga nyemuse ngba ti imekakue, na fuõ ga wene anzeme ti ngbatunga fuõngua dunduko!

11Ako diare, nzeme anyege natoga ti kpotongbaro; anyege na mamunya du tii mirãro yo; fuõ gamo aroko du wa fuõngua Rebanona.

12Dawire, nga diare, du wa gu ati kisi yo gene he, wa gu ime kisi yo gene he, na wa gu gugaabi dika yo ngbaha.

13Gamo zuzuhe wa ga ndavu ati yo na kura wene zuzuhe susi, na wiri ngua wiri rindi kiwe na nzeme nada,

14nzeme nada na ngbatunga fuõngua wa kakoma, na nzinziri koko na kinanona, na ngbatunga angua dunduko du na wene fuõho, na mure na aaroi, na kura wene he a―

15mo wa gugaabi ati yo, guga unga ime, wa gu wiridi nafu afu Rebanona yo.

16Ako yuge naye nodiyo, mo niyá aya, mo yuge naye sudiyo, mo yé! Oni yá auru gi ati, wene fuõahe ati yo ki gbandaka tuturũ. Gu ko mi akpi nyemu ko, ko ye ku ati kpuko yo, ki ri gako zuzuhe du ni wene he susi.

← Chapter 3 Jump to: Chapter 5 →