Song of Solomon 5

Zande

← Chapter 4 Jump to: Chapter 6 →

1Mi naye ku rogo gi ati yo, dawire, nga diare, mi dungura gi mure na gi fuõngua, mi ri gi pepere anyege na nzemera, mi mbiri gi imekakue na gi mamunya. Ako abadiangbare, oni ri he ki mbiri he: Ako agu roni mi akpi nyemu roni, oni mbiri he gbe!

2Mi ara, ono kpotore yo ara nga te. Mo gí nga fugo gu ko mi akpi nyemu ko, ko nafo ngbadimo, niya, “Ako dawire, nga diare, mo úru ngbadimo fere, gi mbipo, nga gi ziazia ri; mbiko ndomo ti rire, mangerire na ime nitotogo kuti ni yuru.”

3Mi uru gi roko, waĩ ka mi ukadi tire na ni berewe? mi zundu ndure, waĩ ka mi birikosi he berewe?

4Gu ko mi akpi nyemu ko, ko moi beko ku rogo yaro ngbadimo, kpotore yo ki wo tipa ko.

5Mi ki guari ku ari ka ura ngbadimo fu gu ko mi akpi nyemu ko, bere ki nitogo na mure, tanga wirinzagare na nzeme mure, kuti pene ũkisa ngbadimo.

6Mi ki uru ngbadimo fu gu ko mi akpi nyemu ko, ono gu ko mi akpi nyemu ko, ko ki di tiko ku sa yo ki ga. Ngbadure ki kiti kpotore yo ho ko afura ni. Mi agbata ko, ka mi arengba nga na bi ko ya; mi ki yambu ko, ka ko akaraga nga pai ya.

7Ababandarago abi re wa i ata rogo bakporo; i ki ta re, ki hogi re, i ki di gi baukadi, nga agu ababandarago du pati ngapa bakporo.

8Ako wiri aboro Yerusarema nga ade, mi zunga he fu roni, ka oni bi gu ko mi akpi nyemu ko, oni ki gumba ha fu ko, nyemuse namanga re.

9Ako mo du tamaro ni wene he susi dagba ade, gu ko mo akpi nyemu ko, waĩ ngba ko ti gu kura ni i akpi nyemu ni? Waĩ ngba gu ko mo akpi nyemu ko ti gu kura ni i akpi nyemu ni, mo nazunga he fu rani were ti ni?

10Gu ko mi akpi nyemu ko, kpotoko du ni nzerenzere he ni irĩirĩ he a, ni barumbatayo fu aboro 10,000.

11Riko wa ndikidi dahabu; mangeriko du ni gbangagbanga ha, ni bi he wa kina mange mbironi.

12Bangiriko wa ambipo pati wiridi ime, ni zunduzundu he na mamunya, moi yo ho nzunzu rogo gu ba ha.

13Pangbako wa kina gu fuõngua du ati yo, nakusa wene fuõhe. Kpotongbako wa aranga, nzeme mure natoga ti ni.

14Beko wa tongo dahabu moi yo aũfongo ti ni. Kpotoko du wa i afongo ho ni rindi mbarã, i adika ha ni kikiipa ambia safero.

15Nduko du wa dangba ni zezerenge mbia, moi yo mburuhe nga ndikidi dahabu. Tamako wa Rebanona ni bawene he wa angua akedara.

16Fugoko du ni bawene he susi, gako apai dunduko ngba angba ki susi. Ako wiri aboro Yerusarema nga ade, Gu boro mi akpi nyemu ni, ko du re nga wene badiangbare a.

← Chapter 4 Jump to: Chapter 6 →