Ezekiel 1

Amharic Dawro DFBE (ጌሻ ማጻፋ) No Year

Jump to: Chapter 2 →

1ሀታማን ላይን፥ ኦይደንያ አግናን፥ እቼሸንያ ጋላሳን፥ ታን ካባራ ሻፋን ኦሞደት ቤዳዋንቱ ግዶን ደእሽን፥ ሳሎቱ ዶየትና፥ ጾሳ ሳፃ በኣድ።

2ካቲ ዮኣኪን ኦሞደቶደፐ እቼሻንያ ላይን፥ ሄ አግናፐ እቼሸንያ ጋላሳን፥

3ባብሎነ ቢታን ካባራ ሻፋ ማታን ደእያ ታኮ፥ ቡዛ ናኣ፥ ቄስያ ህዝቄላኮ መና ጎዳ ቃላይ ዬዳ፤ ሄዋን መና ጎዳ ኩሺ ታና ሞዴዳ።

4ታን ጼልያ ዎደ፥ ጎቲ ሁጲሳና ይያዋ በኣድ፤ ዎልቃማ ፖኡ ዎልቃማ ሻርያ ዶድ ዎዳ፤ ሄ ሻርያ ግዱዋን ዋልቃንይ ፖዡ ጌ። ዋልቃንዉ ግዶ ዎዛናይ ጶልያ ናስያ ማላቴ።

5ሄዋ ግዶን ኦይዱ ፓጻ መታቱ ደኢኖ። ኡንቱንቱ አሳ ማላቲኖ፤

6ሽን ኡንቱንቶ እቶ እቶ ኦይዱ ኦይዱ ሶምኡነ ኦይዱ ኦይዱ ቀፊ ደኤ።

7ኡንቱንቱ ገዲ ስት ጌዳዋ፤ ኡንቱንቱ ገድያ ያቻይ ማራ ገድያ ማላነ ቁጪደ ጌሼዳ ናስያ ብራታዳን ጶሌ።

8ኡንቱንቱ ቀፍያፐ ጋርሳና ኦይዱ ባጋናካ አሳ ኩሽያ ማላትያ ኩሺ ደኤ። ሄ ኦይዳቶካ ዴሙነ ቀፊ ደኤ።

9ኡንቱንቱ ቀፊ እቱ እቱዋ ቦቼ፤ ኡንቱንቱ ኡባይካ ያነ ሃነ ስመናን ስት ጊደ ስንዉ ቢኖ።

10ኡንቱንቶ እቶ እቶ ስን ባጋና አሳ ሶምኢ ደኤ፤ ኡሸቻ ባጋና ጋሙዋ ሶምኢ ደኤ፤ ቃይ ሀድርሳ ባጋና ቦራ ሶምኢ ደኤ፤ ቃይ ጉየ ባጋና አርጋን ሶምኢ ደኤ፤

11ኡንቱንቱ ሶምኢ ሄዋ ማላቴ። ኡንቱንቱ ቀፊ ቦላዉ ምጨት ኡቴዳ፤ ኡንቱንቱ እቶ እቶ ላኡ ቀፊ ላኡ ባጋናካ ህንኮ መታ ቀፍያ ቦቼ፤ ቃይ ላኡ ቀፊ ኡንቱንቱ ቦላ ቦላ ካሜ።

12ኡንቱንቱ ኡባይካ ስት ጊደ ስንዉ ቤድኖ፤ ያነ ሃነ ስመናን፥ ጾሳ አያናይ ብያሳ ሀቃነ ቢኖ።

13ሀ ፓጻ ደእያ መታቱ ግዶን እት ኤጽያ ታማ ቦንቁዋ ማላትያዌነ ስንዉነ ጉየ ቃጽያ፥ ኤጽያ ጾምፕያ ማላትያዌ ደኤ፤ ሄ ታማይ ጶሌነ አ ግዶፐካ ዋልቃንይ ከሴ።

14ሀ ፓጻ መታቱ ዋልቃንዳን፥ ስንዉነ ጉየ ኤሌል ስመረቲኖ።

15ሀ ኦይዱ መታቱዋ ታን ጼልሽን፥ ኡንቱንቱ ምየ ባጋ ሳኣን ደእያ ይንግረትያዋንታ በኣድ፤ እት እት መታ ምየ ባጋን እት እት ይንግረትያዌ ደኤ።

16ሀ ይንግረትያዋንቱ አልኦ ሹቻዳን ጶሊኖ፤ ኡንቱንቱ ኦይዱካ መንነ ማላን እቱ እቱዋ ማላቲኖ። እት ይንግረይ ላኡ ይንግረ ግዲደ መቴዳ፤ እቱ እቱዋ ግዱዋና ካን አዋ ማላቴ።

17ኡንቱንቱ ብያ ዎደ ባረንቱ ስን ዛር ዎዳ ኦይዱ ባጋፐ እቱዋኮ ሀቃዋ ግዶፐነ ቢኖ፤ ሀ መታቱ ብያ ዎደ ይንግረትያዌ ዎራ ስመና።

18ዎጋነ ያሽያ ኦይዱ ይንግረቱ ደኢኖ፤ ሄ ይንግረቱዋ ጋጻ ዩሹዋ ኡባን ጼልያ አይፊ ኩሜዳ።

19ሀ መታቱ ብያ ዎደ፥ ኡንቱንቱ ምይያን ሀ ይንግረቱ ጎንዶረቲኖ፤ ሄ መታቱ ቢታፐ ፑደ ደንድያ ዎደ፥ ሀ ይንግረቱካ ደንዲኖ።

20ደኡዋ አያናይ ብያ ሀቃነ ሀ ይንግረቱካ ደንዲደ ቢኖ፤ አያዉ ጎፐ፥ ሀ ደኡዋ አያናይ ይንግረቱዋ ግዶን ደእያ ድራሳ።

21ሀ መታቱ ብያ ዎደ፥ ይንግረቱካ ቢኖ፤ መታቱ ኤቂያ ዎደ፥ ይንግረቱካ ኤቂኖ፤ ቃይ መታቱ ቢታፐ ፑደ ደንድያ ዎደ፥ ይንግረቱ ኡንቱንቱና እትፐ ደንዲኖ። አያዉ ጎፐ፥ ደኡዋ አያናይ ይንግረቱዋ ግዶን ደኤ።

22ሀ ፓጻ መታቱዋ ሁጲያፐ ቦላ ባጋና ማስቶትያዳን ጶሊደ አይፍያ ጫድያ ምጨቴዳ ሳሉዋ ጉፋንዋ ማላትያባይ ደኤ።

23ሄ ጉፋንዋፐ ጋርሳ ባጋና ኡንቱንቱ ቀፊ ስት ጊደ፥ እቱዋዌ እቱዋኮ ምጨት ኡቴዳ፤ ቃይ ኡንቱንቱ ኡባዉካ ኡንቱንቱ ቦላ ካምያ ላኡ ላኡ ቀፊ ደኤ።

24ሀ መታቱ ፓልያ ዎደ፥ ኡንቱንቱ ቀፍያ ጊረይ ሃ ኩንዋ ጉንዳን፥ ቃይ ኡባ ዳንዳይያ ጾሳ ኮሻዳንነ ጮራ ኦላንቻቱዋ ጫቡዋዳን ሀንያዋ ስሳድ። ኡንቱንቱ ፓሉዋ አግያ ዎደ፥ ባረንቱ ቀፍያ ሺሽ አኪኖ።

25ኡንቱንቱ ባረንቱ ቀፍያ ሺሽ አኪደ፥ ሄ ሳኣን ኤቂደእሽን፥ ኡንቱንቱ ሁጲያፐ ቦላ ባጋና ደእያ ሄ ጉፋንዋ ማላትያዋ ቦላ ባጋፐ ኮሻይ ዬዳ።

26ሄ ጉፋንዋ ማላትያዋፐ ቦላ ባጋና ሳምፔርያ ግያ እንቁዋፐ መቴዳ ካዉተ አራታ ማላትያዌ ደኤ፤ ሄ ካዉተ አራታ ማላትያዋ ቦላ አሳ ማላትያዌ ኡቴዳ።

27ታን አ በእያ ዎደ፥ አ ጼሳ ማላትያሳፐ ቦላ ባጋይ ታማን ቦንቄዳ ናስያ ብራታዳን ጶሌ፤ ቃይ ጼሳፐ ጋርሳ ባጋይ ታማ ማላቴ፤ አ ዩሹዋን ጶልያ ፖኡ ደኤ።

28አ ዩሹዋን ጶልያ ፖኡ እራ ጋላስ ሻርያን ኤቄዳ ዙሉዋ ማላቴ። ሀዌ መና ጎዳ ቦንቹዋ ቆንጨ ማላቴ። ሄዋ በኤዳ ዎደ፥ ቢታን ዱገ ጉፋናደ፥ እቱ ሃሳይያ ኮሻ ስሳድ።

Jump to: Chapter 2 →