Ezekiel 35

Amharic Dawro DFBE (ጌሻ ማጻፋ) No Year

← Chapter 34 Jump to: Chapter 36 →

1መና ጎዳ ቃላይ ታኮ ሀዋዳን ያጊደ ዬዳ፤

2“ላ አሳ ናአዉ፥ ኤዶማ ቢታን ደእያ ሰኢራ ደርያ ቦላ ነ ሶምእያ ዛራደ ትምቢትያ ኦዳ።

3ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ ኔኖ፥ ሰኢራ ደርያዉ፥ ታን ነዉ ሞርከ፤ ታን ታ ኩሽያ ነ ቦላ የዳደ፥ ኔና ባዬዳነ መላ ሳኣ ከሳና።

4ታን ነ ካታማቱዋ ኮላና፤ ኔንካ መላ ግዳና። ታን መና ጎዳ ግድያዋ ኔን ሄዋን ኤራና።

5“ ‘ነዉ እስራኤልያና ዉረና ሞርከተይ ደእያ ድራዉ፥ ኡንቱንቱ መቱዋ ዎደ፥ ኡንቱንቱ ዉርሰ ሙሩዋ ዎደ፥ ኡንቱንታ ኔን ማሻዉ አደ እሜዳ ድራዉ፥

6ታን ኡባ ሞድያ መና ጎዳይ ታ ደኡዋን ጫቃይ፤ ታን ኔና ሀይቁዋን ሙራና፤ ኔን ሀይቁዋፐ ከሳ አካናዉ ኡባካ ዳንዳያካ! ኔን አሳ ዎያዋ እጸና ድራዉ፥ ኔና ዎያ አሳይ ኔና ካላና!

7ታን ሰኢራ ደርያ ባዬዳ መላ ከሳና፤ ቃይ ሄዋና ያነ ሃነ አያ ኡባካ ድጋና።

8ታን ነ ደረቱዋ ኡባ አሃን ኩንና፤ ነ ዞዝያ፥ ነ ዎምባቱነ ነ ዛንጋራቱ ማሻን ሀይቄዳዋንቱ አሃን ካመታና።

9ታን ኔና መናዉ መላ ኦና፤ ነ ካታማቱ ኦና ግዳና። ታን መና ጎዳ ግድያዋ ህንተ ሄ ዎደ ኤራና።

10“ ‘ታን መና ጎዳይ እስራኤልያነ ይሁዳ ቢታቱዋን ደእሺና ህንተ፥ ሀ ላኡ ካዉተቱዋነ ሀ ላኡ ቢታቱዋ ኑን ኦይቃና፤ ኡንቱንቱ ኑሳ ግዳና ጌዳ ድራዉ፥

11ታን ኡባ ሞድያ መና ጎዳይ ታ ደኡዋን ጫቃይ፤ ህንተ ኡንቱንታ ሞርኪደ፥ ኡንቱንቱ ቦላ ይሎተዳ ይሉዋዳንነ ቃናቴዳ ቃናትያዳን፥ ታን ህንተዉ ዛራና። ታን ህንተና ፕርድያ ዎደ፥ ታን ታናተ ህንተና ኤርሳና።

12ቃይ ህንተ፥ እስራኤልያ ደረቱ መላ አቴድኖ፤ ኑን ኡንቱንታ ማና ማላ፥ ኑዉ እመቴድኖ’ ጊደ፥ ሃሳዬዳ ቦርያ ኡባ ታን መና ጎዳይ ስሴዳዋ ህንተ ሄ ዎደ ኤራና።

13ኔን ታ ቦላ ኦቶረታዳነ ዳርሳደ ሃሳያዳ፤ ታንካ ሄዋ ስሳድ” ያጌ።

14ኡባ ሞድያ መና ጎዳይ ሀዋዳን ያጌ፤ “ቢታይ ሳአይ ናሸታና ማላ፥ ታን ህንተና መላ ከሳና።

15እስራኤልያ አሳ ላታይ መላ ግዴዳዋን ህንተ ናሸቴዳ ድራዉ፥ ሰኢራ ደርያነ ኤዶማ ቢታ ኡባ ታን መላ ኦና። ታን መና ጎዳ ግድያዋ ህንተ ሄዋን ኤራና ያጌ ያጋ።”

← Chapter 34 Jump to: Chapter 36 →