Ezekiel 11

Amharic Dawro DFBE (ጌሻ ማጻፋ) No Year

← Chapter 10 Jump to: Chapter 12 →

1ሄዋፐ ጉይያን፥ አያናይ ታና ደንደ፥ አዋይ ዶልያ ባጋ ጼልያ መና ጎዳ ጎልያ ድርሳ ፐንገ አፌዳ። ሄዋን ሄ ፐንግያ ገልያሳን ላታማነ እቼሹ አቱማ አሳይ ደኤ፤ ኡንቱንቱ ግዶን አሳ ካለያ አዙራ ናኣ አዛንያነ ባናያ ናኣ ፓላጽያ በኣድ።

2መና ጎዳይ ታና ሀዋዳን ያጌዳ፤ “ላ አሳ ናአዉ፥ ሀ አቱማ አሳቱ ሀ ካታማን ኢታ ሀልቹዋ ሀልችያዋንታነ ኢታ ዞርያ ዞርያዋንታ።

3ኡንቱንቱ ሀዋዳን ያጊኖ፤ ‘ኑን ጎልያ ዛረ ኬጻና ዎዲ ሀአ ግደና። ሀ ካታማይ አሹዋ ጻሩዋ፤ ቃይ ኑን አሾ’ ያጊኖ።

4ሄዋ ድራዉ፥ አሳ ናአዉ፥ ትምቢትያ ኦዳ! ኡንቱንቱ ቦላ ትምቢትያ ኦዳ!” ያጌዳ።

5ሄዋፐ ጉይያን፥ መና ጎዳ አያናይ ታ ቦላ ዎደ፥ ታና ሀዋዳን ያጌዳ፤ “ኡንቱንታ ያጋ፤ መና ጎዳይ ሀዋዳን ያጌ፤ ‘እስራኤልያ አሳዉ፥ ህንተ ሄዋዳን ጊታ፤ ታን ህንተ አያ ቆፕንቶ ኤራይ።

6ሀ ካታማን ህንተ ዳሮ አሳ ዎደ፥ ኦግያ ኡባን አሃ ኩንድታ ያጌ።

7“ ‘ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ “ህንተ ዎደ ሄዋን ኦሌዳ አሃይ አሹዋ፤ ቃይ ሀ ካታማይካ አሹዋ ዶይስያ ጻሩዋ፤ ሽን ታን ህንተና ሀ ካታማፐ የደርሳደ ከሳና።

8ህንተ ኦላዉ ያዬድታ፤ ታን ሄ ህንተ ያዬዳ ኦላ ህንተ ቦላ አሀና። ኡባ ሞድያ መና ጎዳይ ሀዋ ኦዳይ።

9ታን ህንተና ሀ ካታማፐ ከሳደ፥ አላጋቱዋ ኩሽያን አ እማና፤ ታን ህንተ ቦላ ፕርዳና።

10ህንተ ኦላን ዉራና፤ ታን ህንተና ህንተ ቢታን ፕርዳና። መና ጎዳ ግድያዋ ህንተ ሄዋን ኤራና።

11ሀ ካታማይ ህንተዉ አሹዋ ጻሩዋ ግደና፤ ህንተካ አ ግዶን አሹዋ ግድክታ። ህንተ ቦላ እስራኤልያ ቢታን ፕርዳና።

12መና ጎዳ ግድያዋ ህንተ ሄዋን ኤራና። አያዉ ጎፐ፥ ህንተ ታ አዛዙዋ ካለናን እጼድታ፤ ታ ዎጋካ ናገናን እጺደ፥ ህንተ ዩሹዋን ደእያ ካዉተቱዋ ዎጋዳን ደኤድታ” ያጌ’ ያጋ” ያጌዳ።

13ታን ትምቢትያ ኦድሽን፥ ባናያ ናኣ ፓላጼ ሀይቄዳ፤ ታን ዱገ ጉፋናደ፥ ታ ቃላ ቁ ኦደ፥ ሀዋዳን ያጋደ ዋሳድ፤ “አቤት ኡባ ሞድያ መና ጎዳዉ፥ እስራኤልያፐ አቴዳዋንታ ኡባና ዉርሳና ሀናይዬ?” ያጋድ።

14ሄዋፐ ጉይያን መና ጎዳ ቃላይ ታኮ ሀዋዳን ያጊደ ዬዳ፤

15“ላ አሳ ናአዉ፥ የሩሳላመን ደእያ እስራኤልያ አሳይ ነ እሻቱዋባነ ነ ዳቦቱዋባ፥ ኦሞዱዋን ደእያ እስራኤላቱዋባ ‘ኡንቱንቱ መና ጎዳፐ ሃኬድኖ፤ ሀ ቢታይካ ኑዉ ላታ ግዲደ እመቴዳ’ ያጊደ ሃሳዪኖ።

16“ሄዋ ድራዉ፥ ኔን ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ “ኡንቱንታ ሃኮ ካዉተቱዋ ግዶ የዶፐካ፥ ቃይ ቢታቱዋን ላሎፐካ፥ ቤዳ ቢታቱዋን ጉ ዎድያዉ ታን ኡንቱንቱና ግዳና” ያጌ’ ያጋ።

17“ሄዋ ድራዉ፥ ኔን ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ “ታን ህንተና ካዉተቱዋፐነ ህንተ ላለቴዳ ቢታቱዋፐ ሺሻና፤ ቃይ እስራኤልያ ቢታ ታን ዛራደ ህንተዉ እማና” ያጌ’ ያጋ።

18“ኡንቱንቱ ጉየ ስሚደ ዪደ፥ ሸነይያ ምስልያነ ቱና ኤቃ ቢታፐ ይሳና።

19ታንካ ኡንቱንቶ እት ዎዛና እማና፤ ቃይ ኦራ አያናካ ኡንቱንቱ ግዶን ዎና። ኡንቱንቱፐ ሹቻ ዎዛና ድጋደ፥ አሹዋ ዎዛና ኡንቱንቶ እማና።

20ሄ ዎድያን ኡንቱንቱ ታ ህግያ ካላና፤ ታ አዛዙዋካ ናጋና። ኡንቱንቱ ታ አሳ ግዳና፤ ታንካ ኡንቱንቱ ጾሳ ግዳና።

21ሽን ሄ ሸነይያ ምስልያዉነ ቱና ኤቃዉ ጎይናናዉ ዶሴዳዋንታ ግዶፐ፥ ታን ኡንቱንቱ ኦሱዋዳን ኡንቱንቶ ኦና። ታን ኡባ ሞድያ መና ጎዳይ ሀዋ ኦዳይ” ያጊደ ዬዳ።

22ሄዋፐ ጉይያን፥ ኡንቱንቱ ምይያን ይንግረትያዋንቱ ደእያ ክሩበቱ፥ ባረንቱ ቀፍያ ምጬድኖ፤ እስራኤልያ ጾሳ ቦንቹካ ኡንቱንቱፐ ቦላና ደኤ።

23መና ጎዳ ቦንቹ ካታማ ግዶፐ ደንዲደ፥ አዋይ ዶልያ ባጋ ደርያ ቦላ ኤቄዳ።

24ጾሳ አያናይ ታዉ እሜዳ ሳጻን አያናይ ታና ቢታፐ ፑደ ደንደ፥ ባብሎነን ኦሞደቴዳዋንቱኮ አፌዳ። ሄዋፐ ጉይያን፥ ሳጻይ ታፐ ሻከቴዳ።

25ታንካ መና ጎዳይ ታና በሴዳዋ ኡባ ኦሞዱዋን ደእያዋንቶ ኦዳድ።

← Chapter 10 Jump to: Chapter 12 →