Ezekiel 8

Amharic Dawro DFBE (ጌሻ ማጻፋ) No Year

← Chapter 7 Jump to: Chapter 9 →

1ኑን ኦሞደቴዳ ኡሱፑን ላይን፥ ኡሱፑን አግናን፥ እቼሻን ጋላሳን፥ ታን ታ ሶን ኡት ደእሽን፥ ይሁዳ ጭማቱካ ታ ስንን ኡት ደእሽን፥ ኡባ ሞድያ መና ጎዳ ዎልቃይ ታና ሞዴዳ።

2ታን ትሽ ኡዳደ ጼልያ ዎደ፥ አሳ ማላትያዋ በኣድ፤ አዉ ጼሳፐ ጋርሳ ባጋ ማላትያ ሳአይ ታማ ማላቴ፤ ቃይ ጼሳፐ ቦላ ባጋ ማላትያ ሳአይ ጶልያ ናስያ ብራታ ማላቴ።

3እ ኩሽያ ማላትያዋ ታኮ የዲደ፥ ታ ሁጲያ ብናና ኦይቄዳ። አያናይ ታና ሳኣፐነ ሳሉዋፐ ግዶ ፑደ ደንደ፥ ጾሳ ሳጻን ታና የሩሳላመ አፌዳ። ሁጲሳ ባጋና ጌሻ ጎልያ ግዶ ዳባባ ገልያ ፐንግያና ገልሲደ፥ ጾሳ ቃናትያ ደንያ ኤቃይ ኤቄዳዋ በሴዳ።

4ካሰ ታን ካባራ ሻፋ ማታን ሳጻን በኤዳዋዳን፥ እስራኤልያ ጾሳ ቦንቹዋ ሄዋን በኣድ።

5ሄዋን እ ታዉ ሀዋዳን ያጌዳ፤ “ኔኖ አሳ ናአዉ፥ ሁጲሳ ባጋ ጼላ” ያጌዳ። ታን ጼልያ ዎደ፥ ጾሳ ቃናትያ ደንያ ኤቃ ምስልያ ስንን ደእያ ያርሽያ ሳ ማታን ደእያዋ በኣድ።

6ቃይካ እ ታዉ ሀዋዳን ያጌዳ፤ “ኔኖ አሳ ናአዉ፥ ኡንቱንቱ ኦያዋ በአይ? ታና ታ ጌሻ ጎልያፐ ሃሳናዉ እስራኤልያ አሳይ ኦያ ዎልቃማ እጸትያ ኤቃ ጎይኑዋባ በአይ? ሄዋፐካ አያ ኢትያ ኤቃ ጾሳቱዋ ጎይና ኔን ብሮ በአና” ያጌዳ።

7ሄዋፐ ጉይያን፥ ታና ጌሻ ጎልያ ዳባባ ፐንገ አሄዳ፤ ሄኮ ታን ጼልያ ዎደ፥ ጎዳን ጾኢ ደእያዋ በኣድ።

8እ ታና፥ “ላ አሳ ናአዉ፥ ጎዳ ቦካ” ያጌዳ፤ ታን ቦክያ ዎደ፥ እት ፐንጊ ሄዋን ደእያዋ በኣድ።

9ቃይ እ ታና፥ “ገላ፤ ኡንቱንቱ ሀዋን ኦያ ኢታነ ሸነይያ ኤቃ ጾሳቱዋ ጎይኑዋ በአ” ያጌዳ።

10ታን ግዶ ገላደ ጼልያ ዎደ፥ ጎዳ ቦላን ዩይ አደ ቢታና ጎሸትያ መታቱ ምስሊ፥ ጌሻ ግደና ዶአቱዋ ምስሊ ኡባይነ እስራኤልያ አሳ ኤቃቱዋ ኡባ ምስሊ ኩሜዳዋ በኣድ።

11ኡንቱንቱፐ ስን ባጋና እስራኤልያ አሳፐ ላፑን ታሙ ጭማቱ ኤቄድኖ፤ ቃይ ሻፋና ናኣ ያዛኒካ ኡንቱንቱ ግዶን ኤቄዳ። ኡባይካ እጻና ጩዋይያዋ ባረንቱ ኩሽያን ኦይቄድኖ፤ እጻና ጩዋይካ ቱሉ ጌ።

12ቃይ እ ታና ሀዋዳን ያጌዳ፤ “ላ አሳ ናአዉ፥ ሀዋ እስራኤልያ አሳ ጭማቱ ኡባይካ ማን ባረንቱ ኤቃ ምስልያ ጎልያን ኡንቱንቱ ኦያዋ በአይ? አያዉ ጎፐ፥ ኡንቱንቱ፥ መና ጎዳይ ኑና በኤና፤ መና ጎዳይ ሀ ቢታ አጌዳ ያጊኖ” ያጌዳ።

13ቃይካ እ ታና፥ “ሄዋፐካ አያ እጸቴዳ ኤቃ ጎይኑዋ ኔን ብሮ በአና” ያጌዳ።

14ሄዋፐ ጉይያን፥ እ ታና ጌሻ ጎልያ ሁጲሳ ባጋ ፐንግያኮ አፍና፥ ሄዋን ታሙዛ ግያ ባረንቱ ጾሳዉ ኡቲደ ዬክያ ማጫ አሳቱዋ በኣድ።

15እ ታና፥ “ኔኖ አሳ ናአዉ፥ ሀዋ በአይ? ሄዋፐ አያ እጸቴዳ ኤቃ ጎይና ኔን ብሮ በአና” ያጌዳ።

16ሄዋፐ ጉይያን፥ እ ታና መና ጎዳ ጎልያ ግዶ ዳባባ አፌዳ፤ ሄዋን ጌሻ ጎልያ ፐንገን ባራንዳፐነ ያርሽያ ሳፐ ግዱዋን ላታማነ እቼሹ አቱማ አሳ ግድያዋ በኣድ። ኡንቱንቱ ባረንቱ ዞክያ መና ጎዳ ጌሻ ጎልያኮ፥ ባረንቱ ሶምኡዋ አዋይ ዶልያ ባጋ ዛሪደ፥ አዋይ ዶልያ ባጋና አዋዉ ጎይኒኖ።

17እ ታና ሀዋዳን ያጌዳ፤ “ኔኖ አሳ ናአዉ፥ ሀዋ በኣድ? ይሁዳ አሳዉ ሀ እጸቴዳ ኤቃ ጎይኑዋ ሀዋን ኦያዌ ኡባይ ላፋባ ግዴዴ? ኡንቱንቱ ቢታ ማካላ ኦሱዋን ኩንደ፥ ዛር ዛሪደ ታና ሀንቀትሳናዉ በሲ? በአ፥ ኡንቱንቱ ባረንቱ ዳንዳዬዳ ኬናን ታና ኢሲደ ጫሺኖ።

18ሄዋ ድራዉ፥ ታን ኡንቱንቱና ሀንቁዋን ጋከታና። ታን ኡንቱንቶ ቃረትከነ ኡንቱንቱፐ እቱዋነ አሽከ። ኡንቱንቱ ባረንቱ ኮሻ ቁ ኦደ፥ ታ ሀይን ዋስናካ፥ ታን ኡንቱንቶ ስስከ” ያጌዳ።

← Chapter 7 Jump to: Chapter 9 →