Ezekiel 26

Amharic Dawro DFBE (ጌሻ ማጻፋ) No Year

← Chapter 25 Jump to: Chapter 27 →

1ኑን ኦሞደቴዳ ታማነ እተን ላይን፥ አግናዉ ኮይሮ ጋላሳን፥ መና ጎዳ ቃላይ ታኮ ሀዋዳን ያጊደ ዬዳ፤

2“ላ አሳ ናአዉ፥ ጺሮሳ ካታማ አሳይ ናሸቲደ፥ ‘ሀሹ! የሩሳላመ ኩንዳዱ፤ እዛ ላለታደ ዬዳነ፥ እዝ ፐንጊ ዋጋግ ጊደ ዶየቴዳ ድራዉ ሀዋፐ ስንን ኑን ዱረታና’ ያጊኖ።

3ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ ‘ኔኖ፥ ጺሮሳ ካታማቴ፥ ታን ነዉ ሞርከ። አባ ቤታይ ይያዋዳን፥ ታን ዳሮ ካዉተቱዋ ነ ቦላን አሀና።

4ኡንቱንቱ ነ ድርሳ ግምቢያ ኮላና፤ ነ ሚጻካ ላላና። ታን ኔና ቢታ ኡባ ቁጭ አፍ ድግና፥ ካሎ ደእያ ዛላ ኦና።

5ያቶፐ ኔን አባ ግዶን አሳቱ ባረንቱ ሞልያ ግትያ መልሳናዉ ምጭያ ሳኣ ግዳና። ታን ኡባ ሞድያ መና ጎዳይ ሀዋ ኦዳይ። ሀራ ካዉተቱ ጺሮሳ ካታማ ቦንቃናዋንታ።

6ሄ ቢታን ሁጰትያ ካታማቱዋን ደእያ ቄር ካታማቱ አባፐ ጉ ሃክያዋንቱ ማሻን ዉርሳና። ሄ ዎደ ታን መና ጎዳ ግድያዋ ኡንቱንቱ ሄዋን ኤራና’ ያጌ።

7“ኡባ ሞድያ ጾሳይ ሀዋዳን ያጌ፤ ‘ጺሮሳ ቦላ ኦላ ደንና ማላ፥ ካተቶ ካትያ ግድያ ባብሎነ ካትያ ናቡካዳናጾራ ታን ሁጲሳ ባጋፐ አሀና፤ አ ታን ፓራቱዋና፥ ፓራ ጋረቱዋና፥ ፓራ አሳቱዋናነ ዳሮ ኦላንቻቱዋና አሀና።

8ኡንቱንቱ ሁጰትያ ቢታን ቄር ካታማቱዋ ማሻን ዉርሳና፤ ኡንቱንቱ ኔና ዶዲደ፥ ነ ድርሳ ግምቢያና ጋደ፥ ቢታ ካፋና። ያቲደ ባረንቱ ጎንዳልያ ነ ቦላ ደንና።

9ድርሳ ግምበቱዋ ዶምኢደ ላልያ ሚሻን ድርሳ ግምቢያ መንሬና፤ ባረንቱ ኦላ ሚሻንካ ነ ሚጻ ላላና።

10አ ፓራቱ ዳሮ ግድያ ድራዉ፥ ኡንቱንቱ ደንያ ባናይ ኔና ካማና። ፓራቱነ ፓራቱዋ ጋረቱ ላለቴዳ ካታማ ድርሳ ፐንግያ ገልያዋዳን፥ ገልያ ዎደ፥ ኡንቱንቱ ስስያ ጋርማሱነ ጊረይ ነ ድርሳ ግምቢያ ቃና።

11ኡንቱንቱ ፓራቱ ነ ግዶን ደእያ ኦገቱዋ ኡባ የና። ነ አሳካ ማሻን ዉርሳና፤ ነ ዎልቃማ ቱሳቱካ ሳኣን ኩንዳና።

12ባብሎነቱ ነ አቁዋነ ነ ዛልእያ ሚሻቱዋ ቦንቃናዋንታ። ነ ድርሳ ግምበቱዋነ ነ ሎኦ ኬቱዋ ኡባ ኮላና፤ ሄ ሹቻ፥ ሄ ምነ ሄ ላለቴዳ ቡርጨ ኡባ አፊደ፥ አባን ኦላና።

13ነ ማልኦ የ ታን ድጋና፤ ነ ዲ ኮሻይካ ላኤን ስሰተና።

14ታን ኔና ካሎ ደእያ ዛላ ኦና፤ ቃይ ኔን አሳቱ ባረንቱ ሞልያ ግትያ መልሳናዉ ምጭያ ሳኣ ግዳና። ታን መና ጎዳይ ሀዋ ኦዴዳ ድራዉ፥ ኔን ላኤን ኬጸታካ። ታን ኡባ ሞድያ መና ጎዳይ ሀዋ ኦዳይ’ ያጌ።

15“ኡባ ሞድያ መና ጎዳይ ጺሮሳ ካታማዉ ሀዋዳን ያጌ፤ ‘ነ ሞርከቱ ነ ቦላን ገልያ ዎደ፥ አባ ዶና ቢታቱዋን ደእያ ነ አሳይ ሲፈቲድ ጊርምያ ጊርን ስሲደ፥ ያሻዉ ኮኮራና።

16ሄዋፐ ጉይያን፥ አባ ዶና ቢታቱዋን ደእያ ሞድያዋንቱ ባረንቱ ኦይድያፐ ዎና። ባረንቱ ቁማዩዋነ ኩሽያን ስኪደ አሌቂሴዳ ባረንቱ ማዩዋ ቃራና፤ ያሻዉ ኮኮሪደ፥ ቢታን ኡታና። ነ ቦላ ጋኬዳ መቱዋ ቆፒደ፥ ኡንቱንቱ ዳሮ ሻቢረታና፤ ኮኮርሳይካ ኡንቱንታ አገናን እጻና።

17“ ‘ሄዋፐ ጉይያን፥ ኡንቱንቱ ነዉ ሀዋዳን ያጊደ ዝላላና፤ “ ‘አየ፥ ኤረቴዳ ካታማቴ፥ አባ ግዶን ዎልቃምያ አሳቱ ደእያ ካታማቴ፥ ኔን ዋና ላለታዲ! ኔንነ ነ ግዶን ደኤዳ አሳቱ አባ ላንቂያን ደእያ አሳ ኡባ ያሽሴድታ ሽን!

18ኔን ኩንድያ ጋላስ፥ አባ ጋጻን ደእያዋንቱ ኮኮሬድኖ። አባ ግዶን ደእያ አሳቱካ፥ ኔን ላለቴዳ ጋሱዋን ዳጋሜድኖ’ ያጋናዋ ያጌ።

19“ኡባ ሞድያ መና ጎዳይ ሀዋዳን ያጌ፤ ‘ሀእ አሳይ ደኤና ካታማቱዋዳን፥ ታን ኔና መላ ከሳና። ቃይ ታን ጪማ አባ ነ ቦላን አህና፥ ሄ ዳሮ ሃይ ኔና ካማና።

20ሄ ዎደ ታን ኔና ዱገ ጪማ ኦላዉ ብያዋንቱና እትፐ፥ አዱሳ ዎድያፐ ካሰ ሀይቄዳ አሳቱዋኮ ዱገ የጋና። ኔን ቢታፐ ጋርሳን፥ በን ሞገቴዳ ቡርጨቱ ደእያ ሳን፥ ጪማ ኦላዉ ብያዋንቱና እትፐ ደአናዳን፥ ታን ኔና ኦና። ኔን ላኤን አሳይ ደእያ ካታማ ከሳካ፤ ፓጻ ደእያዋንቱ ቢታንካ ስማደ፥ ነ ሳኣ ኦይቃካ።

21ታን ነ ዉርሰ ዳጋንያ ዉርሰ ኦና፤ ኔን ላኤን ኡባካ ደአካ። አሳይ ኔና ኮያና፤ ሽን ኔን ላኤን ኡባካ ቤታካ። ታን ኡባ ሞድያ መና ጎዳይ ሀዋ ኦዳይ’ ያጌ” ያጊደ ዬዳ።

← Chapter 25 Jump to: Chapter 27 →