Ezekiel 14

Amharic Dawro DFBE (ጌሻ ማጻፋ) No Year

← Chapter 13 Jump to: Chapter 15 →

1እስራኤልያ ጭማቱዋፐ አማሬዳዋንቱ ታኮ ዪደ፥ ታ ስንን ኡቴድኖ።

2ያትና መና ጎዳ ቃላይ ታኮ ሀዋዳን ያጊደ ዬዳ፤

3“ላ አሳ ናአዉ፥ ሀ አሳቱ ባረንቱ ዎዛናን ኤቃ ኤሴድኖ፤ ቃይ ኡንቱንቱ ናጋራይ ኡንቱንቶ ቢያ ሹቻ ማላ ግዴዳ። ያትና፥ ታን ኡንቱንቱ ታና ኦቻናዳን ኦየ?

4ሄዋ ድራዉ፥ ኔን ኡንቱንቶ ሀዋዳን ያጋደ ኦዳ፤ ‘ኡባ ሞድያ መና ጎዳይ ሀዋዳን ያጌ፤ “እስራኤልያ አሳፐ ኦንነ ኤቃ ባረ ዎዛናን ዎፐ፥ አ ናጋራይ አዉ ቢያ ሹቻ ማላ ግዶፐ፥ ቃይ ትምቢትያ ኦድያዋኮ እ ቦፐ፥ ታን መና ጎዳይ ታ ሁጲያን አ ኤቃቱዋ ጮራተዳን አዉ ዛራና።

5ሄ ኤቃቱ ኡባቱ እስራኤልያ አሳ ታፐ ዎራ ዛሬድኖ፤ ሽን ሀእ ታን ኡንቱንቶ እምያ ዛሩዋን ኡንቱንቱ ዎዛና ታኮ ዛራና” ያጌ’ ያጋ።

6“ሄዋ ድራዉ፥ እስራኤልያ አሳዉ ሀዋዳን ያጋደ ኦዳ፤ ‘ኡባ ሞድያ መና ጎዳይ ሀዋዳን ያጌ፤ “ናጋራ ፓጽተ! ህንተ ኤቃፐ ስምተ! ህንተ ቱና ኦሱዋ ኡባፐካ ስምተ!

7“ ‘ “እስራኤልያ አሳ ግድና፥ ዎይ እስራኤልያ ቢታን ደእያ አላጋ አሳ ግድናካ፥ ታፐ ሻከቲደ፥ ባረ ዎዛናን ኤቃ ዎፐ፥ አ ናጋራይ አዉ ቢያ ሹቻ ማላ ግዶፐ፥ ቃይ እ ታ ዞርያ ኦቻናዉ ትምቢትያ ኦድያዋኮ ቦፐ፥ ታን መና ጎዳይ ታ ሁጲያን አዉ ዛሩዋ እማና።

8ታን ሄ ኡራና ኤቀታና፤ ታን አ ሌምሶነ ማላታ ኦና፤ ታን አ ታ አሳ ግዶፐ ይሳና። ሄ ዎደ ታን መና ጎዳ ግድያዋ ህንተ ሄዋን ኤራና።

9“ ‘ “ትምቢትያ ኦድያዌ ጭመቲደ፥ ትምቢትያ ኦዶፐ፥ ሄ ትምቢትያ ኦድያዋ ጭሜዳዌ ታና መና ጎዳ። ታን አ ቦላ ታ ኩሽያ የዳደ፥ ታ አሳ ግዶፐ አ ይሳና።

10ኡንቱንቱ ላኡካ ባረንቱ ናጋራ ናጋራ ሙሩዋ ቶካና፤ ትምቢትያ ኦድያዋ ሙሩነ ትምቢትያ ኦችያዋ ሙሩካ እት ማላ ግዳናዋ።

11ሄዋ ድራዉ፥ እስራኤልያ አሳቱ ታፐ ዎራ ቢክኖ፤ ባረንቱ ናጋራን ኡባን ባረንታ ቱንስክኖ። ኡንቱንቱ ታ አሳ ግዳና፤ ታንካ ኡንቱንቱ ጾሳ ግዳና። ሄ ዎደ ታን ኡባ ሞድያ መና ጎዳይ ሀዋ ኦዳይ” ያጌ’ ያጋ” ያጊደ ዬዳ።

12መና ጎዳ ቃላይ ታኮ ሀዋዳን ያጊደ ዬዳ፤

13“ላ አሳ ናአዉ፥ እት ቢታ አሳይ ናጋራ ኦደ፥ ታዉ አማነተናን እጾፐ፥ ታን ታ ኩሽያ የዳደ፥ ኡንቱንቶ ቁማ ይሳደ፥ ኮሻ አሀና፤ ሄ ቢታ አሳነ መህያ ዎና።

14ሀራይ አቶ ሀ ሄዙ አሳቱ፥ ኖሄ፥ ዳኔልነ ኢዮብ ሄ ቢታን ደእንቶካ፥ ኡንቱንቱ ባረንቱ ጽሎተን ባረንቱ ሸምፑዋ ጻላላ አሻና። ታን ኡባ ሞድያ መና ጎዳይ ሀዋ ኦዳይ።

15“ዎይ ታን ኡንቱንቱ ቢታ ቦላን ባዙዋ ዶአቱዋ የድና፥ ሄ ዶአቱ አን ደእያ አሳ ይስና፥ ሄ ዶአቱዋ ጋሱዋን ኦንነ ግዱዋና አናዳን፥ ሄ ቢታይ ኦና ግዶፐ፥

16ታን ኡባ ሞድያ ጾሳይ ታ ደኡዋን ጫቃይ: ሀራይ አቶ፥ ሀ ሄዙ አሳቱ ሄ ቢታን ደእንቶካ፥ ኡንቱንቱ ባረንቱ አቱማነ ባረንቱ ማጫ ናናቱዋ አሻናዉ ዳንዳይክኖ። ኡንቱንቱ ጻላላይ አታናዋ፤ ሽን ቢታይ ኦና ግዳናዋ። ታን ኡባ ሞድያ መና ጎዳይ ሀዋ ኦዳይ።

17“ዎይ ታን ሄ ቢታ ቦላን ማሻ አሃደ፥ ሀ ቢታና ማሻይ አ ጋደ፥ አን አሳነ መህያ ዎፐ፥

18ታን ኡባ ሞድያ መና ጎዳይ ታ ደኡዋን ጫቃይ: ሀ ሄዙ አሳቱ ሄ ቢታን ደእንቶካ፥ ባረንቱ አቱማነ ባረንቱ ማጫ ናናቱዋ አሻናዉ ዳንዳይክኖ። ኡንቱንቱ ጻላላይ አታናዋ። ታን ጾሳይ ሀዋ ኦዳይ።

19“ዎይ ታን ሄ ቢታ ቦላን ኢታ ሀርግያ የዳደ፥ ታ ሀንቁዋን አሳይ ሱ ጉሳና ማላ ኦፐ፥ አን ደእያ አሳነ መህያ ዎፐ፥

20ታን ኡባ ሞድያ መና ጎዳይ ታ ደኡዋን ጫቃይ: ሀራይ አቶ፥ ኖሄ፥ ዳኔልነ ኢዮብ ሄ ቢታን ደእንቶካ፥ ኡንቱንቱ ባረንቱ ጽሎተን ባረንቱ ሸምፑዋ ጻላላ አሻናፐ አትና፥ ባረንቱ አቱማነ ባረንቱ ማጫ ናናቱዋካ አሽክኖ። ታን ኡባ ሞድያ ጾሳይ ሀዋ ኦዳይ” ያጊደ ዬዳ።

21ኡባ ሞድያ መና ጎዳይ ሀዋዳን ያጌ፤ “ታን አሳነ መህያ ዎናዉ የሩሳላመ ቦላ ታ ኦይዱ ኢታ ሙሮቱዋ፥ ማሻ፥ ኮሻ፥ ባዞ ዶኣነ ኢታ ሀርግያ የድያ ዎደ፥ እ አይ ኬሻ አ ኢታባ ግዳንዴሻ!

22ግዶ ሽን አቲደ ከሴዳ አማሬዳ አሳቱ ደአና፤ አቱማነ ማጫ ናናቱዋካ ያፐ ከሳና። ኡንቱንቱ ህንተኮ ይያ ዎደ፥ ኡንቱንቱ ሀኖታነ ኡንቱንቱ ኦሱዋ ህንተ በኢደ፥ ታን የሩሳላመ ቦላ አሄዳ ባሻይ ኡባይ በስያዋ ግድያዋ አኬካና።

23ህንተ ኡንቱንቱ ሀኖታነ ኡንቱንቱ ኦሱዋ በኢደ፥ ታን ኡንቱንቱ ቦላ ጮ ፕርዳቤናዋ ኤራና። ታን ኡባ ሞድያ መና ጎዳ ሀዋ ኦዳይ” ያጌ።

← Chapter 13 Jump to: Chapter 15 →