Psalms 104

Amharic Gofa GFBEVF (ጌሻ ማፃፋ)

← Chapter 103 Jump to: Chapter 105 →

1ታ ሸምፐ፥ ጎዳ ጋላታ፤ አቤት ጎዳዉ፥ ታ ፆሳዉ ነ ግታ፤ ኔኒ ቦንቾነ ቴማ ማአዳሳ።

2ፖኦ አፍላዳ ጉሉንታዳሳ፤ ኔኒ ሳሉዋ ዱንካነዳ ቶላዳሳ።

3ነ ኬ ሳሎ ቦላ ኬፃሳ፤ ሻራ ፓራ ጋረ ከሳሳ፤ ጫርኮ ቀፈ ቦላ ኡታዳ ባሳ።

4ጫርኮይ ነዉ ኪታንቾ፥ ታማ ላጮ ነዉ ኦሳንቾ ኦሳ።

5ነ፥ ሳኣ እያ ባሱዋ ቦላ ኤሳዳሳ፤ ሄሳ ግሾ መርናዉ ቃፀና።

6ጪሞ አባይ አፍላዳ ቢታ ካምስ፤ ሃይ ግታ ደረታ ካምስ።

7ነ ሀንቀትን ሃት ባቃትዶሶና፤ ነ ደሹዋ ስእዳ ዎደ ቆሰትዶሶና።

8ኤንቲ ደረታ ቦላነ ዛንጋራታ ግዶ፥ ነ ኤንታዉ ጊግስዳ በሳ ጎግዶሶና።

9ሃት ስሚድ ቢታ ካሞናዳ፥ ኤንቲ አናዉ ዳንዳኦና ዛዋ ዎዳሳ።

10ኔኒ፥ ፑልቶት ዛንጋራን ጎጋናዳ ኦዳሳ፤ ሻፋ ሃት ደረታ ግዶራ ጎጎሶና።

11ባዞ ዶአት ኡባይ እያፐ ኡዮሶና፤ ባዞ ሀረት እያፐ ሳሞ አሎሶና።

12ሳሎ ካፎት ሄ ሃ ማታን ባንታ ኬ ኬፅድ፥ ታሽያ ግዶን የፆሶና።

13ነ ግታ ደረታ ቦላ ሳሎፐ እራ ቡክሳሳ፤ እያ ኩሸ ኦሶ አይፈን ቢትያ ካላሱ።

14ኔኒ መሄስ ማታ፥ አሳስ ካ ዶልሳሳ፤ ሄሳን አሳይ ቢታ ኦድ፥ ካ ሺሼስ።

15አሳ ዎዛና ኡፋይስያ ዎይነ፥ ሶምኦ ጭልእስያ ዛይተነ ዎልቃ እምያ ካ ዶልሳሳ።

16ጎዳ ምት፥ እ ቶክዳ ልባኖሰ ዝጋት፥ ዳሮ እራ ደሞሶና።

17ካፎት ባንታ ኬ ያን ኬፆሶና፤ ፅሎት ፂዳ ቦላ ኬፅድ ደኦሶና።

18ቃ ደረታ ቦላ ጋራት ደኦሶና፤ ጉፓለት ሹቻ ቆጶን ቆሰቶሶና።

19ዎደ ታይቡዋ ኤርሳና መላ፥ ነ አጌና መዳሳ፤ አዋይ ባ ዉልያ ዎድያ ኤሬስ።

20ኔኒ ማ መዳሳ፤ ቃማ ኦዳሳ፤ ሄ ማን ዎራ ዶእ ኡባይ ከዬስ።

21ዎዳላ ጋሞት ሻንካትሸ ጉዶሶና፤ ኤንቲ ባንታዉ ምያባ ፆሳፈ ኮዮሶና።

22አው ዶልያ ዎደ ጉየ ስሞሶና፤ ባንታ በሳ ገልድ ዝንኦሶና።

23ሄ ዎደ አስ ባ ኦሶስ ከዬስ፤ ሳእ ቃማና ጋካናዉ ኦስ።

24አቤት ጎዳዉ፥ ነ ኦሶይ አይ መላ ዳሮ፤ ነ ጭንጫተን ነ ኤንታ ኡባ መዳሳ፤ ሳእ ነ መዳባን ኩምስ።

25ሄኮ፥ አባይ ግታነ ዳልጋ፤ ታይቦይ ባይና ቃፅያ መተን፥ ግታታነ ጉ መተን ኩምድ ደኤስ።

26እያ ቦላ ማርካበት ቦሶና፤ ነ መዳ ሌዋታነ ጌተትያ ዳወይ እያን ካኤስ።

27ነ ኤንታዉ ኮሽያ ዎድያን ምያባ እማና መላ፥ ኤንቲ ኡባይ ነና ፄሎሶና።

28ነ ኤንታዉ እምን ኤንቲ ማፆሶና፤ ኔኒ ነ ኩሽያ ምጭን፥ ኤንቲ ሎኦባ ካሎሶና።

29ኔኒ ነ ሶምኡዋ ገንያ ዎደ ዳጋሞሶና፤ ኔኒ ሸምፑዋ ኤክያ ዎደ ሀይቅድ፥ ባንታ ቢታ ስሞሶና።

30ሽን ኔኒ ነ ሸምፑዋ እምያ ዎደ፥ ኤንቲ መቶሶና፤ ቢታ ኦራፅሳሳ።

31ጎዳ ቦንቾይ መርናዉ ደኦ፤ ጎዳይ ባ ኦሱዋን ኡፋይቶ።

32እ ቢታ ፄልያ ዎደ ቢታይ ቃፄስ፤ እ ደረታ ቦችያ ዎደ ደረት ጩዮሶና።

33ታ ደኦ ላይ ኡባን ጎዳስ የፃና፤ ታ ፓፃ ደእያ ዎደ ኡባን ታ ፆሳ ዛማራና።

34ታኒ ጎዳን ኡፋይትያ ግሾ፥ ታ ቆፋይ እያ ኡፋይሶ።

35ናጋራንቾት ቢታፈ ዮ፤ ኢታ ኦይሳት ደኦፖ። ታ ሸምፐ፥ ጎዳ ጋላታ፤ ጎዳይ ጋላተቶ።

← Chapter 103 Jump to: Chapter 105 →