Psalms 80

Amharic Gofa GFBEVF (ጌሻ ማፃፋ)

← Chapter 79 Jump to: Chapter 81 →

1ዮሰፋ ዶርሳ ዉደዳ ካለይሶ፥ እስራኤለ ሄንንቹዋዉ ኑና ስአ። ክሩበታ ቦላ ደእያ አራታን ኡትዳይሶ፥ ነ ፖኡዋን ቆንጫ።

2ኤፍሬማ፥ ብንያመነ ምናሰ ስንን በንታ፤ ነ ዎልቃ ቃዳ ኑና አሻናዉ ሃያ።

3ፆሳዉ ኑና ዛራ፤ ኑ አታናዳ ነ ሶምኡዋ ኑስ ፖእሳ።

4ኡባፈ ዎልቃማ ጎዳዉ ፆሳዉ፥ ነ አሳ ዎሳ ቦላ አዉደ ጋካናዉ ሸነታይ?

5ኔኒ ኤንታ ዬሆ ካዳ ሙዛዳሳ፤ አፉ ሃዳ ኡሻዳሳ።

6ኑ ሾሮት ኑ ቢታ ኤካናዉ ባንታ ግዶን ኦያና መላ ኦዳሳ፤ ኑ ሞርከት ኑ ቦላ ሚጭዶሶና።

7ኡባፈ ዎልቃማ ፆሳዉ ኑና ዛራ፤ ኑ አታናዳ ነ ሶምኡዋ ኑስ ፖእሳ።

8ግብፀፈ ዎይነ ኤሀዳሳ፤ ካዎተታ የደዳ፥ ኤንታ ቢታን እያ ቶካዳሳ።

9ኔኒ ቢታ ቄፃዳሳ፤ እ ፃጶ የድድ፥ ዳይድ ቢታ ጋክስ።

10ደረት እያ ኩያን፥ ልባኖሰ ዝጋት እያ ታሽያን ካመትዶሶና።

11ባ ታሸታ መደትራነ አባ ጋካናዉ፥ ባ ፄራታ ኤፍራፂሳ ሻፋ ጋካናዉ የድስ።

12ያትን፥ ኦገራ አያ ኡባይ እያ አይፍያ ዱናዳ፥ እያ ዩሾን ደእያ ግምብያ አይስ ላላዲ?

13ባዞ ጉዱንይ እያ ቦላ ጉፕስ፤ ዎራ ዶአት እያ ምዶሶና።

14ኡባፈ ዎልቃማ ፆሳዉ ኑኮ ስማ፤ ሳሎራ ዱገ ፄላዳ፤ ሀ ዎይንያ ናጋ።

15እ ነ ኡሻቻ ኩሸይ ቶክዳ ፃጶ፤ ኔኒ ነዉ ድችዳ ፑተ።

16ነ ሞርከት ነ ዎይንያ ቃንፅዶሶና፤ ታማን ፁግዶሶና፤ ኤንታ ነ ሀንቁዋን ይሳ።

17ነ ኩሸይ ነ ኡሻቻን ደእያ አሳ፥ ኔኒ ነዉ ድችዳ አሳ ናጎ።

18ህዛ ኑኒ ጉየ ስሞኮ፤ ኑና ፓፃ ዎ፤ ነ ሱን ጋላታና።

19ኡባፈ ዎልቃማ ጎዳዉ ፆሳዉ፥ ኑና ዛራ፤ ኑ አታናዳ ነ ሶምኡዋ ኑስ ፖእሳ።

← Chapter 79 Jump to: Chapter 81 →