Psalms 66

Amharic Gofa GFBEVF (ጌሻ ማፃፋ)

← Chapter 65 Jump to: Chapter 67 →

1ቢታ ኡባይ ህንተ ቃላ ቁ ኦድ፥ ኡፋይሳን ፆሳ ጋላትተ።

2ፆሳ ሱንስ ቦንቾን የፅተ፤ ቦንቾ ጋላታ እያዉ እምተ።

3ፆሳስ ሀይሳዳ ያግተ፤ “ነ ኦሶት ዋንድ ማላልሲ? ነ ዎልቃይ ዳርዳ ግሾ፥ ነ ሞርከት ያሻን ነ ስንን ኮኮሮሶና።

4ቢታ ኡባይ ነና ጎይኔስ፤ ነና ሳቤስ፤ ነ ሱንስ ጋላታን የፆሶና” ያግተ።

5ሃይተ፤ ፆሳይ ኦዳባ በእተ፤ አሳ ግዶን ማላልስያ ኦሶ ኦስ።

6እ አባ ሃ ሻክድ፥ ካሰ ኑ አዋት ዮርዳኖሰ ሻፋ ባንታ ቶሆን የድ መላ ቢታራ ፕንዶሶና። ሄሳን እ ኦዳባን ኑኒ ኡፋይትዳ።

7እ ባ ዎልቃን መርናዉ ሃሬስ። ካዎተታ ባ አይፈን ፄሌስ፤ ሄሳ ግሾ፥ ማካለይሳት እያ ቦላ ደንዶፎ።

8አሳዉ፥ ኑ ፆሳ ጋላትተ፤ ህንተ እያ ጋላትያ ጋላታይ ስኤቶ።

9እ ኑና ፓፃ ዎስ፤ ኑ ኩንዶና መላ ናግስ።

10አቤት ፆሳዉ ነ ኑና ፓጫዳሳ፤ ብር ታማን ፓጨትድ ጌየይሳዳ ነ ኑና ጌሻዳሳ።

11ነ ኑና ፅሄን ገልሳዳሳ፤ ኑ ዞኮን ዴፆ ቶሆ ዎዳሳ።

12ሞርከት ኑ ሁጰራ ቶግድ አናዳ ኦዳሳ፤ ኑ ሃ ግዶራነ ታማ ግዶራ አዳ፤ ሽን ሀእ ኑና እንጀ በሲ ኤሀዳሳ።

13ታ ፁሳ ያርሾ ኤካዳ ነ ኬ ገላና፥ ታ ቃንገ ጋና።

14ታ መቶትዳ ዎደ ታ ዶናይ ግዳ ቃላ፥ ታ እንፃርሳፈ ከይዳ ቃንገ ጋና።

15ታ ነዉ ሞዋ፥ ፁሳ ያርሾ ኦዳ ሺሻና። ማራዘታ ሳዎ ቶንኩ ግያ ያርሾ ኦዳ ሺሻና፤ ኮርማነ ኮለታ ነዉ ያርሻና።

16ህንተኖ፥ ፆሳስ ያየይሳቶ፥ ኡባይ ሃ ይድ፥ ስእተ፤ ፆሳይ ታዉ ኦዳባ ታ ህንተዉ ኦዳና።

17ታ ቃላ ቁ ኦዳ ዎሳስ፤ ታ እንፃርሳን እያ ጋላታስ።

18ታኒ ዎዛን ኤርሽን ናጋራ ገንዳባ ግድያኮ፥ ጎዳይ ታና ስኤና።

19ሽን ፆሳይ ቱማ ታና ስእስ፤ ታ ኦይሻ ዛርስ።

20ፆሳይ ታ ዎሳ እፅቦና ግሾ፥ ባ መርና ሲቁዋ ታና ድግቦና ግሾ ጋላተቶ።

← Chapter 65 Jump to: Chapter 67 →