2 Chronicles 1

Awadhi

1सुलैमान एक बहोत सक्तीसाली राजा बन गवा काहेकि यहोवा ओकरे परमेस्सर, ओकर संग रहा। यहोवा सुलैमान क बहोत जियादा महान बनाएस।

2सुलैमान इस्राएल क सबहिं लोगन स बातन किहस। उ सेना क सेनापतियन, सहस्रपतियन, निआवअधीसन, इस्राएल क सबहिं नेता लोगन अउर परिवारन क प्रमुखन स बातन किहस।

3तब सुलैमान अउर सबहिं लोग ओकरे संग बटुरेन अउ उ ऊँच जगह क गएन जउन गिबोन नगर मँ रहा। परमेस्सर क मिलाप क तम्बू हुवाँ रहा। यहोवा क सेवक मूसा ओका तब बनाए रहा जब उ अउर इस्राएल क लोग रेगिस्ताने मँ रहेन।

4दाऊद परमेस्सर क करार क सन्दूख क किर्यत्यारीम स यरूसलेम तलक लिआवा रहा। दाऊद यरूसलेम मँ एका रखइ बरे एक ठु जगह बनाए रहा। दाऊद यरूसलेम मँ करार क सन्दूख बरे एक तम्बू लगाइ दिहे रहा।

5हूर क पूत ऊरी अउर ऊरी क पूत बसलेल एक काँसे क वेदी बनाए रहा। उ काँसे क वेदी गिबोन मँ पवित्तर तम्बू क समन्वा रही। एह बरे सुलैमान अउर उ सबइ लोग यहोवा स राय लेइ गिबोन गएन।

6मिलाप क तम्बू मँ यहोवा क समन्वा काँसे क वेदी तलक सुलैमान गवा। सुलैमान एक हजार होमबलि वेदी पइ चढ़ाएस।

7उ राति परमेस्सर सुलैमान क लगे आवा। परमेस्सर कहेस, “सुलैमान, मोहसे तू उ माँगा जउन कछू तू चाहत अहा कि मइँ तोहका देउँ।”

8सुलैमान परमेस्सर स कहेस, “तू मोरे दाऊद क बरे बहोत कृपालु अहा। तू मोका, मोरे बाप क जगह पइ नवा राजा होइ बरे चुन्या ह।

9यहोवा परमेस्सर, अब, तू जउन बचन मोरे पिता दाऊद क दिहा ह ओका बना रहइ द्या। तू मोका अइसी प्रजा क राजा बनाया, जउन पृथ्वी क रेत कणन क नाईं अनगिनत अहइँ।

10तू मोका बुद्धि अउ गियान द्या। ताकि मइँ एन लोगन क सही रहा पइ लइ चल सकब। कउनो भी मनई तोहरी मदद क बिना तोहार ऍन महान लोगन पइ हुकूमत नाहीं कइ सकत ह।”

11परमेस्सर सुलैमान स कहेस, “तोहार रूख बिल्कुल ठीक अहइँ। तू धन या सम्पत्ति या सम्मान नाहीं माँग्या ह। तू इ भी नाहीं माँग्या ह कि तोहार दुस्मन मरि जाइँ। तू लम्बी उमिर भी नाहीं माँग्या ह। किन्तु तू अपने बरे बुद्धि अउ गियान मँग्या ह जेहसे तू मोर प्रजा क सम्बन्ध मँ बुद्धिमानी स निर्णय लइ सका, जेकर मइँ तोहका राजा बनाएउँ ह।

12एह बरे मइँ तोहका बुद्धि अउ गियान देब। मइँ तोहका धन, बैभव अउर सम्मान भी देब। तोहरे पहिले होइवाले राजा लोगन क लगे एतना धन अउर सम्मान कबहुँ नाहीं रहा अउर तोहरे पाछे होइवाले राजा लोगन क लगे भी ऍतना धन अउर सम्मान नाहीं होइ।”

13तउ सुलैमान गिबोन क आराधना क जगह मँ गवा। जब सुलैमान उ मिलापवाले तम्बू क छोड़ेस अउ यरूसलेम लउट गवा अउ इस्राएल पइ राज्ज करइ लाग।

14सुलैमान घोड़न अउ रथ अपनी फउज क बरे एकट्ठा करब सुरू किहेस। सुलैमान क लगे एक हजार चार सौ रथ अउर बारह हजार घोड़सवार रहेन। सुलैमान ओनका रथ नगरन मँ रखेस। सुलैमान यरूसलेम मँ भी ओनमाँ स कछू क रखेस, अर्थात हुवाँ जहाँ राजा क निवास रहा।

15सुलैमान यरूसलेम मँ बहोत सी चाँदी अउ सोना एकट्ठा किहस। उ ऍतना अधिक चाँदी अउ सोना एकट्ठा किहस कि उ चट्टानन स सामान्य होइ गवा। सुलैमान देवदारु क ऍतना लकड़ी बटोरेस कि उ पच्छिमी पहाड़ प्रदेस क गूलर क बृच्छ क नाई सामान्य होइ गइ।

16सुलैमान, मिस्र अउर कुए स घोड़न मँगाएस। राजा क बइपारियन घोड़न कुए स बेसहेन।

17सुलैमान क बइपारियन मिस्र स एक रथ चाँदी क छ: सौ सेकेल मँ अउर घोड़ा चाँदी क एक सौ पचास सेकेल मँ बेसहेन। तब बइपारियन घोड़न अउर रथन क हित्ती लोगन क राजा लोगन तथा अराम क राजा लोगन क हाथ बेच दिहस।