2 Chronicles 12

Awadhi

← Chapter 11 Jump to: Chapter 13 →

1रहूबियाम एक सक्तीसाली राजा होइ गवा। अपने राज्ज क सक्तीसाली बनाइ क पाछे उ अउ यहूदा क सबहिं लोग यहोवा क नेम क पालन करइ क बन्द कइ दिहन।

2रहूबियाम क राज्जकाल क पाँचवे बरिस सीसक यरूसलेम पइ हमला किहस। सीसक मिस्र क राजा रहा। इ एह बरे भवा कि रहूबियाम अउ यहूदा क लोग यहोवा क बरे निस्ठावान नाहीं रहेन।

3सीसक क लगे एक हजार दुई सौ रथ, साठ हजार घुड़सवार, अउर एक फउज रही जेका कउनो गन नाहीं सकत रहा। सीसक क फउज मँ लूबी, सुक्किय्यी अउर कूसी फउजी रहेन।

4सीसक यहूदा क सक्तीसाली नगरन क पराजित कइ दिहस। तब सीसक अपनी फउज क यरूसलेम लिआवा।

5तब समायाह नबी रहूबियाम अउ यहूदा क प्रमुखन क लगे आवा। यहूदा क उ सबइ प्रमुख यरूसलेम मँ बटुरे रहेन काहेकि उ पचे सबहिं सीसक स ससान रहेन। समायाह रहूबियाम अउ यहूदा क प्रमुखन स कहेस, “यहोवा जउन कहत ह, उ इ अहइ: ‘रहूबियाम, तू अउर यहूदा क लोग मोका तजि दिहा ह अउर मोरे नेमन क पालन करइ स इन्कार कइ दिहा ह। एह बरे मइँ तोहका अपनी मदद क बिना सीसक क सामना करइ क छोड़ब।’”

6तब यहूदा क प्रमुखन अउर राजा रहूबियाम पछतावा करत भए अपने क विनम्र किहस अउर कहेस, “यहोवा नियावी अहइ।”

7यहोवा लखेस कि राजा अउर यहूदा क प्रमुखन अपने आप क विनम्र बनाएन ह। तब यहोवा क सँदेसा समायाह क लगे आवा। यहोवा समायाह स कहेस, “राजा अउर लोग अपने क विनम्र किहन ह, एह बरे मइँ ओनका नस्ट नाहीं करब बल्कि मइँ ओनका हाली ही बचाउब। मइँ सीसक क उपयोग यरूसलेम पइ आपन किरोध उतारइ क बरे नहीं करब।

8किन्तु यरूसलेम क लोग सीसक क सेवक होइ जइहीं। इ होई एह बरे कि उ पचे सीख सकइँ कि मोर सेवा करब दूसर रास्ट्रन क राजा लोगन क सेवा करइ स अलग अहइ।”

9मिस्र क राजा सीसक यरूसलेम पइ हमला किहस अउर यहोवा क मन्दिर मँ जउन खजाना रहेन, ओका लइ गवा। अउर उ उ सबइ खजाने क भी लइ लिहस जउन राजा क महल मँ रहेन। उ सोने क ढारन क भी लिहस जेनका सुलैमान बनाए रहा।

10राजा रहूबियाम सोने क ढारन क जगह पइ काँसे क ढारन बनाएस। रहूबियाम ओन सेनापतियन क जउन राजमहल क दुआरन क रच्छा क जिम्मेदार रहेन, काँसे क ढारन दिहस।

11जब राजा यहोवा क मन्दिर मँ जात रहा तउ रच्छक काँसे क ढारन बाहेर निकारत रहेन। ओकरे पाछे उ पचे काँचे क ढारन क रच्छक घर मँ वापस रखत रहेन।

12जब रहूबियाम पछतावा किहने अउर अपने क बिनम्र कइ लिहस तउ यहोवा अपने किरोध क ओह पइ रोकि दिहेस। एह बरे यहोवा रहूबियाम क पूरी तरह नस्ट नाहीं किहस। यहूदा मँ कछू अच्छाई बची रही।

13राजा रहूबियाम यरूसलेम मँ अपने क सुदृढ़ राजा बनाइ लिहस। उ उ समइ इकतालीस बरिस क रहा, जब राजा बना। रहूबियाम यरूसलेम मँ सत्रह बरिस तलक राजा रहा। यरूसलेम उ नगर रहा जेका यहोवा इस्राएल क सारे परिवार समूह मँ स चुने रहा। यहोवा यरूसलेम क अपने नाउँ स्थापित करइ बरे चुनेस। रहूबियाम क महतारी नामा रही। जउन कि अम्मोन देस क रही।

14रहूबियाम बुरी चिजियन किहेस काहेकि उ यहोवा क आग्या क पालन करइ बरे अपने हिरदइ मँ निहचइ नहीं किह रहेन।

15सबइ चिजियन जउन रहूबियाम आपन हुकूमत मँ सुरू स आखीर तलक किहेस उ नबी समायाह अउर सीर (दर्सी) इद्दो क किताब मँ लिखा गवा ह। उ पचे परिवारिक इतिहास क बारे मँ अउर यहूबियाम अउ यहूबियाम अउ यहोबाम जब तलक हुकुमत किहेन ओकर बीच होइवाले जुद्ध क बारे मँ लिखेन।

16रहूबियाम अपने पुरखन क संग बिस्राम किहस। रहूबियाम क दाऊद नगर मँ दफनावा गवा। रहूबियाम क पूत अबिय्याह नवा राजा भवा।

← Chapter 11 Jump to: Chapter 13 →