2 Chronicles 29

Awadhi

← Chapter 28 Jump to: Chapter 30 →

1हिजकिय्याह जब पच्चीस बरिस क रहा, राजा भवा। उ उनतीस बरिस तलक यरूसलेम मँ हुकूमत किहस।। जकर्याह क बिटिया अबिय्याह ओकरी महतारी रही।

2हिजकिय्याह उहइ किहस जेका ओकर पुरखा दाऊद किहस अउर जेका यहोवा नीक समुझत अहा।

3हिजकिय्याह यहोवा क मन्दिर क दरवाजन क जोड़ेस अउर ओनका मज़बूत किहस। हिजकिय्याह मन्दिर क फुन खोलेस। उ राजा होइ क पाछे, बरिस क पहिले महीने मँ इ किहस।

4हिजकिय्याह याजकन अउ लेवीबंसियन क एक बैठक मँ एक संग बइठाएस। उ मन्दिर क पूरब क दिसा मँ खुले अँगना मँ ओनके संग बैठक मँ सामिल भवा।

5हिजकिय्याह ओनसे कहेस, “मोर सुना, लेवीबंसियो। पवित्तर सेवा बरे अपने क तइयार करा। आपन आपका अउर यहोवा आपन पुरखन क परमेस्सर क मन्दिर क पवित्तर सेवा बरे तइयार करा। असुद्ध चिजियन क पवित्तर जगह स हटाइ द्या।

6हम लोगन क पुरखन, यहोवाह हम लोगन क परमेस्स्स्सर क धोखा दिहन। उ पचे उ काम किहेन जेका उ बुरा समुझेन। उ पचे ओका छोड़ दिहेस अउर आपन मुँह यहोवा क मन्दिर क ओर स दूर फरि लिहस। उ पचे आपन पीठ ओकर कइँती कइ दिहस।

7उ पचे मन्दिर क सुआगत कच्छ क दरवाजे क बन्द कइ दिहन अउर दीपकन क बुझाइ दिहन। उ पचे सुगन्धि क बारब अउर इस्राएल क परमेस्सर क पवित्तर ठउर मँ होमबलि भेंट करब बन्द कइ दिहन।

8एह बरे, यहोवा यहूदा अउ यरूसलेम क लोगन पइ बहोत किरोधित भवा। यहोवा ओन लोगन क भयभीत अउर चकित दण्ड दिहस। तू अपनी आँखिन स एका लखि सकत ह।

9इहइ कारण अहइ कि हमार पुरखन जुद्ध मँ मारे गएन। हमरे पूत, बिटियन अउर मेहररुअन बन्दी बनाई गइन।

10एह बरे मइँ हिजकिय्याह इ निहचइ किहेउँ ह कि मइँ यहोवा, इस्राएल क परमेस्सर क संग एक वाचा करउँ। तब उ हम लोगन पइ आगे किरोधित नाहीं होब।

11एह बरे मोर पूतन तू लोग सुस्त जिन ह्वा या अउर जियादा समइ नस्ट न करा। यहोवा तू लोगन क अपनी सेवा करे चुनेस ह। तू पचन्क ओकर सेवा करइ चाही अउर ओकरे बरे सुगन्धि बारइ चाही।”

12ओन लेवीबंसियन क इ सूची अहइ जउन हुवाँ रहेन अउर जउन कार्य सुरू किहन। कहाती परिवार क अमासै क पूत महत अउर अजर्याह क पूत योएल रहेन। मरारीत परिवार क अब्दी क पूत कीस अउर यहल्लेलेल क पूत अजर्याह रहेन। गेर्सोनी परिवार स जिम्मा क पूत योआह अउर योआह क पूत एदेन रहेन। एलिसापान क संतानन मँ स सिम्री अउर यूएल रहेन। आसाप क संतानन मँ जकर्याह अउर मत्तन्याह रहेन। हेमान क संतानन मँ स यहूएल अउर सिमी रहेन। यदूतून क संतानन मँ स समायाह अउर उज्जीएल रहेन।

15तब एन लेवीबंसियन अपने भाइयन क एकट्ठा किहन अउर मन्दिर मँ पवित्तर सेवा बरे अपने क तइयार किहस। उ पचे राजा क ओन आदेसन क पालन किहन जउन यहोवा क लगे स आए रहेन। उ पचे यहोवा क मन्दिर मँ ओका स्वच्छ करइ गएन।

16याजक यहोवा क मन्दिर क भीतरी भाग मँ ओका स्वच्छ करइ गएन। उ पचे सभी असुद्ध चिजियन क बाहेर निकारेन जेनका उ पचे मन्दिर मँ पाएन। उ पचे असुद्ध चिजियन क यहोवा क मन्दिर क आँगन मँ लइ आएन। तब लेवीबंसी असुद्ध चिजियन क यहोवा क मन्दिर क अंगना मँ लइ आएन। तब लेवीबंसी असुद्ध चिजियन क किद्रोन क घाटी मँ लइ गएन।

17पहिले महीने क पहिले दिन लेवीबंसी अपने आपका पवित्तर करइ सुरू कइ दिहन। महीने क अठएँ दिन लेवीबंसी यहोवा क मन्दिर क दुआर मण्डप मँ आएन। आठ दिन अउर, उ पचे यहोवा क मन्दिर क पवित्तर करइ क कार्य जारी रखेन। उ पचे पहिले महीने क सोलहवें दिन इ काम पूरा किहन।

18तब उ पचे राजा हिजकिय्याह क लगे वापिस गएन। उ पचे ओहसे कहेन, “राजा हिजकिय्याह, हम लोग यहोवा क पूरे मन्दिर क साथ ही होमबलि चढ़ावइ बरे वेदी क भी ओकर सबइ बरतन क संग सुद्ध कइ दिहेन। हम लोग पवित्तर रोटी प्रदर्सित करइवाले मेज अउ ओकरे बरे उपयोग मँ आवइवाली सबहिं चिजियन क स्वच्छ कइ दिहन।

19ओन दिनन जब आहाज राजा रही उ परमेस्सर क बरे विरोध किहस। उ बहोत स चिजियन हटाइ दिहे रहेन जउन मन्दिरे मँ रहिन। मुला हम लोग फुन ओन चिजियन क रख दिहा ह अउर ओनका पवित्तर कार्य बरे सुद्ध कइ दिहा ह। उ पचे अब यहोवा क वेदी क समन्वा अहइँ।”

20राजा हिजकिय्याह नगर अधिकारियन क एकट्ठा किहेस अउर अगले भिंसारे उ यहोवा क मन्दिर गवा।

21उ सबइ सात ठु बर्धा, सात ठु भेड़न, सात ठु मेमनन अउ सात ठु नान्ह बोकरन लिआएन। उ सबइ जनावर यहूदा क राज्ज क पापबलि बरे पवित्तर जगह अउ यहूदा क लोगन बरे रहेन। राजा हिजकिय्याह याजकन क जउन हारून क संतान रहेन, आदेस दिहस कि उ पचे ओन जनावरन क यहोवा क वेदी पइ चढ़ावइँ।

22एह बरे याजक लोग बर्धन क मार डाएन अउर ओनकर रक्त धइ लिहन। तब उ पचे बर्धन क रकत वेदी पइ छिछकारेन। तब याजक लोग भेड़न क मारेन अउर वेदी पइ भेड़न क रक्त छिछकारेन। तब याजक लोग मेमनन क मारेन अउर ओनकर रक्त वेदी पइ छिछकारेन।

23तब याजक लोग बोकरन क राजा अउर एक संग एकट्ठे लोगन क समन्वा लिआएन। बोकरन पापबलि रहेन। याजक लोग अपने हाथे बोकरन पइ धरेन अउर ओनका मारेन। याजक लोग बोकरन क रकत स वेदी पइ पापबलि चढ़ाएन। उ पचे इ एह बरे किहन कि यहोवा इस्राएल क लोगन क छिमा कइ देइ। राजा कहेस कि होमबलि अउ पापबलि इस्राएल क सबहिं लोगन क बरे होइहीं।

25राजा हिजकिय्याह लेवीबंसियन क यहोवा क मन्दिर मँ मंजीरन, तम्बूरन अउ वीणा क संग रखेन जइसा दाऊद, राजा क द्रस्टा गाद अउर नातान नबी आदेस दिहे रहा। इ आदेस यहवो क हिआँ स ओकर नबियन क जरिये स आवा रहा।

26इ रतह लेवीबंसी, दाऊद क गीत क बाजन क संग, अउर याजक अपनी तुरहियन क संग खड़े भएन।

27तब हिजकिय्याह होमबलि क बलि वेदी पइ चढ़ावइ क बरे आदेस दिहस। जब होमबलि देब सुरू भवा, यहोवा बरे गायन भी सुरू भवा। तुरहियन बजाई गइन अउर इस्राएल क राजा दाऊद क वाद्ययंत्र बजेन।

28सारी सभा दण्डवत किहस, गायकन गाएन अउर तुरही वादकन अपनी तुरहियन तब तलक बजाएन जब तलक होमबलि क चढ़ावा जाब पूरा नाहीं भवा।

29बलिदानन क पूरे होइ क पाछे राजा हिजकिय्याह अउर ओकरे संग क सबहिं लोग निहुरेन अउर उ पचे उपासना किहन।

30राजा हिजकिय्याह अउर ओकर अधिकारि लोग लेवीबंसियन क यहोवा क स्तुति क आदेस दिहन। उ पचे ओन गीतन क गाएन जेनका दाऊद अउर द्रस्टा आसाप लिखे रहा। उ पचे यहोवा क स्तुति किहन अउर प्रसन्न भएन। उ पचे सबहिं निहुरेन अउर उ पचे यहोवा क उपासना किहस।

31हिजकिय्याह कहेस, “यहूदा क लोगो, अब तू लोग खुद क यहोवा क अर्पित कइ चुका अहा। निचके आवा, बलि अउ धन्यवाद क भेंट यहोवा क मन्दिर मँ लिआवा।” तब लोग बलि अउ धन्यवाद क भेंट लिआएन। कउनो मनई, जउन चाहत रहा, उ होमबलि भी लिआवा।

32सभा क जरिये मन्दिर मँ लाइ गइ होमबलियन क संख्या इ रहा: सत्तर बर्धा, सौ भेड़न अउर दुई सौ मेमनन। इ सबइ सबहिं जनावर यहोवा क होमबलि क रुप मँ बलि कीन्ह गएन।

33यहोवा क बरे पवित्तर भेटंन छ: सौ बर्धन अउर तीन हजार भेड़ी बोकरन रहेन।

34मुला हुवाँ होमबलि बरे चढ़ावा गवा जनावरन क खाल उतारइ अउर ओका काटइ बरे प्रयाप्त याजकन नाहीं रहेन। एह बरे ओनकर सम्बन्धी लेवीबंसियन ओनकर मदद तब तलक किहन जब तलक काम पूरा न भवा अउर जब तलक दूसर याजक अपने क पवित्तर फउज क बरे तइयार न कइ सकेन। लेवीबंसी यहोवा क सेवा बरे अपने क तइयार करइ मँ जियादा याजकन क अपेच्छा जियादा लगनसील रहेन।

35हुवाँ अनेक होमबलि, मेलबलि क चबीर् अउ पेय भेंट चढ़िन। इ तरह यहोवा क मन्दिर मँ सेवा फुन सुरु भइ।

36हिजकिय्याह अउर सबहिं लोग ओन चिजियन क बरे खुस रहेन जेनका यहोवा अपने लोगन क बरे बनाएस अउर उ सबइ खुस रहेन कि उ पचे ओनका ऍतनी हाली स किहन।

← Chapter 28 Jump to: Chapter 30 →