2 Chronicles 16

Awadhi

← Chapter 15 Jump to: Chapter 17 →

1आसा क राज्जकाल क छत्तीसवें बरिस बासा यहूदा क भुइँया पइ हमला किहस। बासा इस्राएल क राजा रहा। उ रामा नगर गवा अउर एका लोगन क राजा आसा क लगे जावइ अउ आवइ स रोकइ बरे किला बनाइ दिहस।

2आसाने यहोवा क मन्दिर क कोसागार मँ रखे भए चाँदी अउर सोना क लिहस अउर उ राजमहल स चाँदी सोना लिहस। तब आसा बेन्हदद क सँदेसा पठएस। बेन्हदद अराम क राजा रहा अउर दमिस्क मँ रहत रहा। आसा क सँदेसा रहा:

3“बेन्हदद, मोरे अउर अपने बीच एक ठु सन्धि होइ द्या। इ सन्धि क वइसे ही होइ द्या जइसा उ हमरे बाप अउर तोहरे बाप क बीच कीन्ह गइ रही। धियान द्या, मइँ तोहरे लगे चाँदी सोना पठवत हउँ। अब तू इस्राएल क राजा बासा क संग कीन्ह गइ सन्धि क तोड़ द्या जेहसे उ मोका अजाद छोड़ देब्या अउर मोका परेसान करब बन्द कइ देब्या।”

4बेन्हदद आसा क बात मान लिहस। बेन्हदद आपन फउजे क सेनापतियन क इस्राएल क नगरन पइ हमला करइ क बरे पठएस। एन सेनापतियन इय्योन, दान अउर आबेल्मैम नगरन पइ हमला किहस। उ पचे नप्ताली देस मँ ओन सबहिं नगरन पइ हमला किहस जहाँ खजाने रखे रहेन।

5बासा इस्राएल क नगरन पइ हमला क बात सुनेस। एह बरे उ रामा मँ किला बनावइ क काम रोक दिहस अउर आपन काम छोड़ दिहस।

6तब राजा आसा यहूदा क सबहिं लोगन क बटोरेस। उ पचे रामा नगर क गएन अउर काठ अउ पाथर उठाइ लाएन जेनकर उपयोग बासा किला बनावइ बरे किहे रहा। आसा अउर यहूदा क लोग पाथरन अउ काठे क उपयोग गेवा अउ मिस्पा नगरन क जियादा मजबूत बनावइ बरे किहस।

7उ समइ द्रस्टा हनानी यहूदा क राजा आसा क लगे आवा। हनानी ओहसे कहेस, “आसा, तू मदद क बरे अराम क राजा पइ आस्रित रह्या, किन्तु तू यहोवा आपन परमेस्सर पइ मदद बरे आस्रित नाहीं रह्या। एह बरे अराम क राजा क फउज तोहसे पराइ निकरी।

8कूस अउ लुबी बहोत बिसाल अउ सक्तीसाली फउज रखत रहेन। ओकरे लगे अनेक रथ अउ सारथी रहेन। किन्तु आसा, तू उ बिसाल सक्तीसाली फउज क हरावइ मँ मदद क बरे यहोवा पइ आस्रित भए अउर यहोवा तोहका ओनका हरावइ दिहस।

9यहोवा क आँखिन सारी धरती पइ ओन लोगन क लखत फिरत हीं जउन ओकरे बरे स्रद्धालु अहइँ जेहसे उ ओन लोगन क सक्तीसाली बनाइ सकइ। आसा, तू बेवकूफी क काम किहा। एह बरे अब स लइके आगे तलक तोहका जुद्ध क सामना करइ क पड़ी।”

10आसा हनानी पइ उ बात स कोहाइ गवा जउन उ कहेस। आसा ऍतना किरोध स पागल होइ उठा कि उ हनानी क बन्दीघरे मँ डाइ दिहस। आसा उ समइ कछू लोगन पइ अत्याचार भी करत रहा।

11आसा जउन कछू सुरु स आखीर तलक किहस। उ इस्राएल अउर यहूदा क राजा लोगन क इतिहास क पुस्तक मँ लिखा अहइ।

12आसा क गोड़ ओकरे राज्जकाल क उनतालीसवें बरिस मँ रोगी होइ गवा। ओकरे रोग बहोत बुरा रहा किन्तु उ यहोवा स मदद नाहीं चाहेस। आसा वैद्यन स मदद चाहेस।

13आसा अपने राज्जकाल क इकतालीसवें बरिस मँ मरा अउर इ प्रकार आसा अपने पुरखन क संग बिस्राम किहस।

14लोग आसा क ओकरी कब्र मँ दफनाएन जेका खुद दाऊद क नगर मँ बनाए रहा। लोग ओका एक आखिरी चारपाई पइ रखेन जेह पइ सुगन्धित द्रव्य अउर अलग-अलग तरह क मिले इत्र रखे रहेन। लोग आसा क सम्मान करइ क आगी क महाज्वाला किहन।

← Chapter 15 Jump to: Chapter 17 →