2 Chronicles 12

Chin (Mara Bible RV (BSI))

← Chapter 11 Jump to: Chapter 13 →

1Rehôbaw cha a ryureina liahsa a i ta, a tha a vaw tlô nahta, Abeipa ryhpa tleisai ha ta. Ano chhâh a châpa Izarei saw zydua chhao ta Abeipa ryhpa cha tleisai ha hra ei ta.

2Abeipa liata ngâ amâ chhih leipa vâta, Bei Rehôbaw abeina kô pangawhna liata, Izi bei Sisâ ta Zerusale kaw siehnao ta,

3talailih 1,200 nata arâ pheisaih 60,000 ta kaw sie ta. Izi râh tawhta a hnohta hrâ a kaw siepa pheisaih, Libia mo, Suki mo nata Kusi mozy hluhzie cha rei tiah awpa châ veih ei.

4Zudâh râh liata thokhy hneipa khihpizy la lymâpa ta, Zerusale kei tlô ta.

5Hrohsopa Semiah cha, Sisâ vâta Zerusale liata a hmaohpakhypa Rehôbaw nata Zudâh beimachâzy lâ vawh ta, ama hnohta, “ Abeipa ta hetana heta a tah: ‘Nâ heihsai ei chi ta, chavâta kei chhao ta châ heihsai ei na ta, Sisâ ku liata ei cha hlâ ha ei,’ a tah,” tah ta.

6Chatanachata Izarei beimachâzy nata abei cha a panawh ei ta, “ Abeipa cha mosiapa a châ,” tah ei ta.

7Amâ panawhpa cha Abeipa ta a hmô nahta, Semiah hnohta Abeipa bie vaw tlô ta. Abeipa ta, “A panawh ha ei ta, pahleipadia khao aw veih ei na. Pachhana a rakhapa ta ei pie aw ei. Ei pathiiana cha Sisâ hmâpa ta Zerusale chô liata patlai thlu khao aw va na.

8Chatahrasala Sisâ chakaotuhpazy ta ama y aw. Chatanachata keima chakaopa nata khizaw khinarâhzy chakaopa ânanonazie ama pahno aw,” tah ta.

9Izi bei Sisâ cha Zerusale kaw siehnao ta. Abeipa o liata ryusôhpazy nata abei o liata ryusôhpazy lapa ta, hmo to siekhei ta. Sawlawmaw taopa ngôh vyhphaozy chhao a siekhei khai haw.

10Bei Rehôbaw ta ngôh vyhphaozy vyuhpa ta dawh vyhphaozy tao ta, chazy cha abei o ochhi vaituhpa pheisaih hyutuhpazy pavaosa ta.

11Zehôvâh o liata abei â ngiana maihta, vaituhpazy a vy ei ta, vyhphaozy cha cheih ei ta, vaituhpazy yna chhôhpadâhpa liata ama soh heih tyh.

12Bei Rehôbaw cha â panawhpa vâta, Abeipa pathiiana ta ano cha a liesai ta, tlokhuh pahleipadiapa châ khao vei. Cha dei châ vei, hmo phapazy Zudâh liata a y chypa vâta, tlokhuh pahleipadia leipa ama châ.

13Bei Rehôbaw cha Zerusale liata liahsa a pa-i ta, ryureih lymâ ta. Rehôbaw cha â bei pathao nota kô sypalih nata kô khapa a châ. Abeipa ta a moh y nawpa ta Izarei chi zydua tawhta â tlyhpa khihpi Zerusale liata kô hrawh hleisari a bei ta. A nô moh cha Amawna zuah Nâmâh a châ.

14Rehôbaw cha Abeipa padona lâ a palôh a pahei leipa vâta, moleina hmozy tao tyh ta.

15Rehôbaw thâtih cha âthaona tawhta achhâna taihta, hrohsopa Semiah nata hmôtheituhpa Idô zy ropa thyutôna châbuzy liata ropa a châ. Rehôbaw nata Zerôbaw likawh liata adyuhna y lymâ ta.

16Rehôbaw cha a pathlatuhpazy hnohta a mô ta, Dâvi khihpi liata pabu ei ta, a sawchapawpa Abizah ta ano su liata â bei.

← Chapter 11 Jump to: Chapter 13 →