2 Chronicles 8

Chin (Mara Bible RV (BSI))

← Chapter 7 Jump to: Chapter 9 →

1Sawlawmaw ta Abeipa o nata ano o cha, kô kih chhôh sa ta, a paloh tawhta,

2Hirâ ta khihpi a piepazy cha paduapathi ta, cha liata Izarei sawzy pahrâsa ta.

3Sawlawmaw ta Hâmathizôbâ a dyuh ta, pahnie ta.

4Râhchawhpa liata Tamô khihpi padua ta, Hâmathi liata chhao hmobaoh sona khihpizy padua ta.

5Sawlawmaw ta Machhua Behôrô nata Mathi Behôrô khihpizy chhao thokhyzy, chhikaozy, ahraina lâzy hneipa a padua.

6Bâlathâ khihpi, Sawlawmaw hneipa hmobaoh sona khihpi zydua, a talailihzy sona khihpizy nata a arâ pheisaihzy yna khihpizy padua ta, Zerusale, Lebanaw nata a ryureina râh chhôh zydua liata khihpi a padua khona maih liata Sawlawmaw ta a padua lymâ.

7Izarei saw a châ leipa, Hiti mo, Amawri mo, Perizi mo, Zebu mo,

8cha liata ama pathla laibâhpa a ypa, Izarei sawzy ta ama pahleipadia khai thei leipazy cha, Sawlawmaw ta raihriatuhpazy ta tao ta, cha hawhna chata tanoh taihta ama y.

9Izarei sawzy deikua cha, Sawlawmaw ta a rai hria awpa seizy ta tao leipa ta, âmo cha pheisaihzy, pheisaih hyutuhpazy, talailih nata arâ pheisaih hyutuhpazy ta hmâpa ama châ.

10Âmo cha zawpizy chô liata biehnei awpa ta Sawlawmaw ta a raopa hyutuhpazy châ ei ta, ama zydua ta 250 ama châ.

11Sawlawmaw ta, “Ei lapinô cha Izarei bei Dâvi o liata a y awpa châ vei, Abeipa Byh â vyna suzy cha su pathaihpa châ tlôh ta,” tah ta. Chatanachata Phiraoh sawchanô cha Dâvi khihpi tawhta ano châta o a sapa lâ a chhi ha ta.

12Sawlawmaw ta o hmia lâta aikah liata a taopa Abeipa maisâh chô liata, Abeipa lâ raopa hlânazy hlâ ta.

13Cha raopa hlânazy cha Mawsi biepiepa hawhta noh chareih ta â ngiahna lymâ hawh ta hlâ tyhpa a châ. Pahânoh nata thla thieh nohzy liata hlâ tyhpa châ ta, kô chareih ta taopa kyhchhi miathôhpa, viahchhâ thinô pahlao leipa kyhchhi, Hâta Kyhchhi nata Byureih Kyhchhi lia zy ta hlâ tyhpa a châ.

14A paw Dâvi ta a vaw rao hapa hawhta, theihthaina rai hria awpa ta theihthaipazy cha a py py ta pachhaih ta, Livai pathlazy chhao theihthaipazy hmiakô liata reithaina hla sa awpa ta noh chareih ta â ngiahnazie hawhta a py py ta pachhaih ta, chhikao vaituhpazy chhao ama chhikao vai awpa chyu ta a py py ta a pachhaih ei. Cha hawhta tao awpa ta, Khazohpa chyhsa Dâvi ta bie a vaw pie hapa a châ.

15Abei ta theihthaipazy nata Livai pathlazy bie a piepa cha, khâpa kyh lia hmahta tleisai leipa ei ta, sôh kyh liata chhao tleisai cheita veih ei.

16Chatanachata Abeipa o sana kyh liata Sawlawmaw raihria zydua cha, Abeipa o lôbô bô noh tawhta pathaopa ta paloh khaipa châ ta. Abeipa o cha patlôpa a châ.

17Chatawhcha Sawlawmaw cha Edômâ râh tilaipi kiah liata a ypa Eziôkebe nata Elô lâ sie ta.

18Hirâ ta balyhzy nata tilaipi yzie a pahnopa balyh puhpazy Sawlawmaw lâ tuah ta. Sawlawmaw chakaotuhpazy chhaota Ôphi lâ sie ei ta, cha tawhna chata ngôh talent 450 vaw phaoh ei ta, Bei Sawlawmaw lâ ama vaw tlôkhei.

← Chapter 7 Jump to: Chapter 9 →