2 Chronicles 17

Chin (Mara Bible RV (BSI))

← Chapter 16 Jump to: Chapter 18 →

1Âsâ sawchapawpa Zehôsaphâ cha a paw su liata a bei ta. Izarei maw lâ râh a dyuh awpa ta tha a patlô ta.

2Zudâh râh liata thokhy hneipa khihpi zydua liata pheisaihzy soh ta, Zudâh râh nata a paw Âsâ ta a vaw lapa Epharai râh khihpizy liata pheisaih yna suzy padua ta.

3Zehôsaphâ cha a pathlatuhpa Dâvi lâpi â chhih hrapa vâta, a hnohta Abeipa y ta. Bâlâ khazohzy tlua leipa ta,

4a pathlatuhpa Khazohpa tluapa ta, a biepiepazy zyh ta, Izarei maw lâ râh taozie hawhta tao hra vei.

5Chavâta Abeipa ta a ku liata khinarâh pa-i ta. Zudâh râh chyhsa zydua ta Zehôsaphâ cha kuhria vaw pie ei ta. Chatanachata thata vaw hneirôh ta, zachhihna chhao thata a hlao.

6Palôh riahpha kawpa ta Abeipa lâpi a chhih ta. Cha dei châ vei, su sâhpazy nata Aseri tôhzy Zudâh râh tawhta a pahlei khai haw.

7Â beina kô thôhna liata, a beimachâzy, Benhai, Ôbadia, Zekariah, Nethane nata Mikhai zy cha Zudâh râh khihpizy liata chyhsazy pachu awpa ta tuah ta.

8Pachutuhpazy hry liana chata Livai pathla Semiah, Nethaniah, Zebadiah, Asahe, Semiramô, Zehônathâ, Adôniza, Tôbizah nata Tôbadônizah zy amâ hlao hra. Cha Livai pathlazy hry liata theihthaipa Elisâmâ nata Zehôrâ zy chhao amâ hlao.

9Abeipa ryhpa châbu a phaopa ta, Zudâh râh liata pachu ei ta. Zudâh khihpi zydua chahryh ei ta, zawpizy ama pachu lymâ.

10Zudâh râh chheipâh nata khizaw liata khinarâh zydua cha Abeipa china ta patu ta, Zehôsaphâ cha ahy ta hmah a dyuh ngâh khao veih ei.

11Philistinâ mo thokhazy ta Zehôsaphâ cha kuhria nata râhpaw châta tâkâ zy vaw pie ei ta. Arabia mo chhao ta mietaku tôhpa 7,700 nata mie 7,700 ama vaw phaopa hra.

12Zehôsaphâ cha rônah via lymâ ta. Thokhy khihpizy nata hmobaoh sona khihpizy Zudâh râh liata padua ta.

13Zudâh râh khihpizy liata chariah chhaichhi hluhpi hnei ta. Zerusale liata chhao pheisaih thatlô riahphapa hluhpi hnei ta.

14Hezy he a pho pho ta pheisaih hneinazie a châ: Zudâh tawhta pheisaih sâh kha hyutuhpa Adnah nata a pheisaih pasaipha 300,000 y ei ta,

15a pazipa ta pheisaih sâh kha hyutuhpa Zehôhanâ nata pheisaih 280,000 y ei ta,

16a pazipa ta Abeipa chakaona rai hria awpa ta â piepasaihpa Zikari sawchapawpa Amasiah nata pasaipha 200,000 ama y.

17Benzami tawhta pasaipha Eliadâ nata libaw nata vyhphao a chabapa pheisaih 200,000 y ei ta,

18a pazipa ta Zehôzabâ nata chariah chhaichhi a tobipa pheisaih 180,000 ama y.

19Âmo cha Zudâh râh liata thokhy hneipa khihpizy liata abei ta a sopazy hleikhô ta, abei chakaona rai hria awpa ta raopazy ama châ.

← Chapter 16 Jump to: Chapter 18 →