2 Chronicles 5

Chin (Mara Bible RV (BSI))

← Chapter 4 Jump to: Chapter 6 →

1Cha hawhna chata Sawlawmaw ta Abeipa o châta a tao awpa zydua cha patlô ta. A paw Dâvi ta Abeipa lâ a vaw hlâ hapa tâkâzy, ngôhzy nata hmobaoh zydua a ngiakhei ta, Khazohpa o liata sôh sopakhyna suzy liata soh khai ta.

2Sawlawmaw ta Abeipa Biehrai Byh cha, Dâvi khihpi Zaio tawhta la papua awpa ta, Izarei pathla chhituhpa zydua, Izarei machâzy nata Izarei chi hyutuhpa zydua Zerusale liata awpakhy ta.

3Chatanachata Izarei chapaw zydua cha, thla sarina kyhchhi daihti liata abei hmiakô liata a hmaohpakhy ei ta.

4Izarei machâ zydua a vy ei ta, Livai pathlazy ta Byh cha a sy ei ta.

5Abeipa Byh, ahmaohna poh o nata poh o liata hmobaoh pathaihpa zydua a sy ei ta. Chazy cha Livai pathla theihthaipazy ta amâ sy.

6Bei Sawlawmaw nata a hmiakô liata Izarei zawpi a hmaohpakhypa zydua cha, Byh hmiakô liata y ei ta, mietaku nata viahchao tôhpa hluhpi ta atheihna hlâ ei ta, a hluhzie cha paki tiah awpa nata rei tiah awpa châ vei.

7Chatanachata theihthaipazy ta Abeipa Biehrai Byh cha, Achhyna o chhôh supathaihpa liata a y nawpa su liata a ngiakhei ei ta, Cherubi mathlawzy ry liata Su Pathaih Chaipa liata soh ei ta.

8Cherubizy cha Byh luh chô liata ama mathlaw pakai ei ta, cherubizy ta Byh nata asyna lâzy cha pahli ei ta.

9A lâzy cha a seih kawpa vâta, Achhyna o chhôh supathaihpa hmiakô liata Su Pathaihpa tawhta a pawhmaozy hmô theipa a châ. Khôtho lâ tawh deikua hmô theipa châ vei. Chazy cha tanoh taihta cha liata a y thlâh haw.

10Lôphia miano tah leipa ta cha, Byh chhôh liata hmo hropa khâpa hmah y vei. Cha lôphiazy cha Izi tawhta ama kaw pua nota, Abeipa ta Izarei sawzy hnohta bie a hraina su Hôribâ Tlâh liata Mawsi ta a khôpazy a châ.

11Cha liata a ypa theihthaipazy cha, py to ta amâ pathai khai hapa vâta, Su Pathaihpa tawhta vaw pua ei ta.

12Livai pathla hlasatuhpa zydua, Asâpha, Hemâ, Zeduthu nata ama sawchapawzy nata ama chiheihzy cha lini poh rih dipa ta a tobipa ta, paotlâzy, tlaipihzy, totâzy chhaota maisâh nochhi lâchhâh liata a duah ei ta. Chiahmie tôtuhpa theihthaipa 120 chhao ama hnohta a duah hra ei ta.

13Chiahmie tôtuhpazy nata hlasatuhpazy cha â raohpa ta, ao kha hawhta ao papuapa ta, Abeipa reithaipa ta alyna hla sa ei ta. Hla a vaw puapa nahta, chiahmie pyu, paotlâ pyu nata pyungiapa chhaichhi pyu hropazy vaw pua ta, “Ano cha pha ta, A zawngiahna cha chhâzaw ta a y aw,” tahpa ta Abeipa ama reithai nahta, Abeipa o cha meihdo ta vaw bi ha ta;

14meihdo vâna chata theihthaipazy cha chakao awpa ta a duah thei khao veih ei. Abeipa rônahna ta Khazohpa o cha a bie khai haw.

← Chapter 4 Jump to: Chapter 6 →