2 Chronicles 22

Chin (Mara Bible RV (BSI))

← Chapter 21 Jump to: Chapter 23 →

1Arabia mo hnohta riehmo lâ a vypa pheisaihzy ta Zehôrâ sawchapaw uhthei viapa zydua ama thie khai hapa vâta, Zerusale khihsawzy ta a sawchapaw seihnai chaipa Ahazia cha ano su liata bei ta tao ei ta. Chatanachata Zudâh bei Zehôrâ sawchapawpa Ahazia cha a bei ta y ta.

2Ahazia cha kô kih nata kô nopa a châ nota a bei pathao ta, Zerusale liata kô kha â bei. A nô moh cha Athaliah châ ta, Ômri samohnô a châ.

3A nô cha Ahazia châta ryhraokheituhpa châ ta. A ryhraokheina a pha leipa vâta, Ahazia cha moleina hmo taona kyh liata, Ahabâ chhôhkha lâpi a chhihpazy a chhih hra ta.

4Ahabâ chhôhkha taozie hawhta, Abeipa mohmô liata hmo pha leipa tao ta. A paw a thi tawhta, Ahabâ chhôhkha cha Ahazia ryhraokheituhpazy châ ei ta, raona ama patyhsa hapa a châ.

5Ama ryhraokheina zipa ta, Ramôkilia liata Aramia bei Hâze a dyuh awpa ta, Ahabâ sawchapawpa Izarei bei Zehôrâ hnohta sie ta. Zôrâ cha Aramia mo ta hmah vaw paphao ei ta.

6Râmâ liata Aramia bei Hâze nata amâ dyuhna liata a hmahphaopa patlâh awpa ta, Zehôrâ cha Zezari lâ a lie ta. Ahabâ sawchapawpa Izarei bei Zôrâ tlâh leipa cha tly awpa ta, Zehôrâ sawchapawpa Zudâh bei Ahazia cha Zezari lâ sie ta.

7Châhrasala Zôrâ a kei tlypa cha, Ahazia pao nawpa ta Khazohpa raopa vaw châ ta. A tlô nahta, Nimsi sawchapawpa Zehu a tyh awpa ta Zehôrâ hnohta sie ta. Zehu cha Ahabâ chhôhkha chhawh pathlah awpa ta Abeipa raopa a châ.

8Zehu ta Ahabâ chhôhkha chô liata pachiana a patlôsa hai nota, Ahazia chakaotuhpa Zudâh pawhrâhpazy nata Ahazia unawhzy sawchapawzy hmô ta, âmo chhao cha a thie ha ei.

9Ahazia cha tlua ta, Samâri liata â nyuna su liata patu ei ta, Zehu lâ a vaw chhi ei ta, a thie haw. “A pathipalôh tlokhuh ta Abeipa a tlua tyhpa Zehôsaphâ samohpa cha tlôh ta,” tah ei ta, a ri deikua cha ama pabu. Chatanachata khinarâh liata ryu a reih thei awpa chyhsa Ahazia pathla tawhta pakha hmah y khao veih ei.

10Ahazia nô Athaliah ta a sawchapawpa a thi haw tahpa a pahno nahta, thyu ta, Zudâh chi liata bei pathla zydua a thie khai ha ei.

11Ahazia sawchapawpa Zôasâ deikua cha, abei sawchanô Zehôsabia ta bei sawchapaw ama thie awpazy hry tawhta a râkhei ta, ano mohôhtuhpa chhaota chhôhpadâhpa miakha liata nyu ta. Bei Zehôrâ sawchanô Zehôsabia cha theihthaipa Zehôdâ lapinô châ ta, Zôasâ cha a rilâhpa a châpa vâta, Athaliah hmô leina liata Zôasâ cha nyu ta, Athaliah ta a thie thei leipa a châ.

12Râh chô liata Athaliah kô charu â bei chhôh zydua ama hnohta y ta, Khazohpa o chhôh liata nyu ei ta.

← Chapter 21 Jump to: Chapter 23 →