2 Chronicles 21

Chin (Mara Bible RV (BSI))

← Chapter 20 Jump to: Chapter 22 →

1Zehôsaphâ cha a pathlatuhpazy hnohta a mô ta, a pathlatuhpazy hnohta Dâvi khihpi liata pabu ei ta, a sawchapawpa Zehôrâ ta ano su liata â bei.

2Zehôsaphâ sawchapawpa Zehôrâ cha unawhzy hnei ta, chazy cha Azariah, Zehie, Zekariah, Azariah, Mikaila nata Sephatiah zy ama châ. Ama zydua heta Zudâh bei Zehôsaphâ sawchapawpa ama châ khai.

3Ama paw Zehôsaphâ ta a sawchapawzy cha hmosaipa rônah ngaitapa, tâkâ, ngôh, hmo sôhpa nata Zudâh râh liata thokhy hneipa khihpizy pie chyu ta, khinarâh deikua cha Zehôrâ a pie. Zehôrâ cha sawchapaw uhtheipa a châpa vâta, khinarâh piepa a châ.

4Zehôrâ cha a paw beidyuchhai liata a tyuh ta, â beina â i nahta, a unawh zydua cha zaozi ta thie ta, Izarei pawhrâhpa hluhpi chhao thie ta.

5Zehôrâ cha kô sythôh nata kô no a châ nota a bei pathao ta, Zerusale liata kô charie â bei.

6Ahabâ sawchanô lapinô ta a hneipa vâta, Ahabâ chhôhkha taozie hawhta, Izarei beizy lâpi a chhi hrapa ta, Abeipa mohmô liata hmo pha lei ngaitapa tao ta.

7Chatahrasala Abeipa ta Dâvi hnohta bie a vaw hrai hapa vâta nata ano nata a pathlazy taihta chhâzaw châta meiôh pie awpa ta bie â vaw taih hapa vâta, Abeipa ta Dâvi pathla cha pahleipadia khoh vei.

8Ano â beina daihti liata Edômâ ta Zudâh ryureina cha a dyuh ta, ano eih ta bei a tao ei ta.

9Zehôrâ cha a pheisaih hyutuhpazy nata a talailih zydua chhaota Edômâ mo cha siehnao ta. Zâ ta thyu ta, ano nata a talailih pheisaih hyutuhpazy a chadôpa Edômâ mo cha thie lymâ ta.

10Chatanachata Edômâ cha tanoh taihta Zudâh â dyuh ngâ thlâh haw. Zehôrâ cha Abeipa, a pathlatuhpazy Khazohpa â heihsaipa vâta, cha daihti liata, Libnâ khihpi chhao ta a ryureina â dyuh ha hra.

11Cha dei châ vei, Zudâh tlâh râh liata su sâhpazy tao ta, Zerusale khihsawzy sihryhna lâ a chhipa ta, Zudâh cha lâpi paviasa ta.

12Hrohsopa Elaizâh tawhta ano lâ châpaphaopa vaw tlô ta, a hnohta, “Châ pathlatuhpa Dâvi Khazohpa Abeipa ta hetana heta a tah, ‘Na paw Zehôsaphâ lâpizy a chhih leipa chi ta, Zudâh bei Âsâ lâpizy chhao a chhih leipa chi ta,

13Izarei maw lâ beizy lâpi tlao a chhih chi ta, Ahabâ chhôhkha ta Izarei maw lâ râh sihryhna lâ amâ chhipa hawhta, Zudâh râhsaw nata Zerusale khihsawzy sihryh awpa ta reipasao chi ta, nâma hlâta a pha viapa na paw pathla na unawhzy na thiepa vâta,

14pachâ teh, Abeipa ta na chyhsazy, na sawzy, na lapinôzy nata na hneipa zydua chô liata potlana rarôh ypa a vaw patlôsa aw.

15Nâma tlai chhao, chhôh lâta pochhina ta thata pasa aw chi ta, na rihzy a tla khaina taihta noh kha noh kha ta na pasa via lymâ aw,’” tah ta.

16Chatanachata Zehôrâ a dyuh awpa ta, Abeipa ta Kusi mo chheipâh liata a ypa Philistinâ mo nata Arabia mo palôh pathyu ta.

17Zudâh kaw siehnaopa ta chho ei ta, abei o liata hmo zydua la ei ta, a sawchapawzy nata a lapinôzy chhao amâ chhi khai haw. A sawchapaw seihnaipa Zehôahâ tah leipa ta cha pakha hmah pahlôh leipa ta amâ chhi khai haw.

18Cha hmo zydua a tlô khai tawhta, Abeipa ta Zehôrâ cha tlâh thei leipa chhôh pasana ta hrie ta.

19Pochhih lymâ ta, kô no po a chhi khai tawhta, a pasana vâta a rihzy tla ta, riethei ngaitapa ta thi ha ta. A chyhsazy ta ano zana mei a paw châta ama patipa hawhta patipa veih ei.

20Zehôrâ cha â bei pathao nota kô sythôh nata kô nopa châ ta, Zerusale liata kô charie a bei ta, a thipa a pasaih leipa y veih ei. Dâvi khihpi liata pabu ei ta, abeizy thlâ su liata deikua châ vei.

← Chapter 20 Jump to: Chapter 22 →