2 Chronicles 4

Chin (Mara Bible RV (BSI))

← Chapter 3 Jump to: Chapter 5 →

1Dawh maisâh tao ta, a doh lâ dy kih, a hâ lâ dy kih, â sâhna lâ dy hrawh a châ.

2Chatawhcha dawh tipâh ahlôpa tao ta, a chhôh dy hrawh tla ta, dy pangawh a sâh ta, dy sythôh ahlôpa a châ.

3Tipâh tlâh ry liata, dy kha liata titheih theih hrawh lymâ ta, tipâh a dôna taihta titheihzy pataohpa a châ. Titheihzy cha tlâh no ta paziahpa châ ta, tipâh nata leih pâpa a châ.

4Tipâh cha viahchao tôhpa pô hrawh hleino chô liata patyupa châ ta, pô thôh maw lâ a heih ta, pô thôh notla lâ a heih ta, pô thôh chho lâ a heih ta, pô thôh nochhi lâ â heih. Viahchao tôhpazy chô liana chata tipâh cha patyupa châ ta, a chhôh lâ ama chao ama chhy khai.

5Tipâh cha pazah tie chha ta, a tlâh cha nyu tlâh hawhta, lilipaw lyupa ta taopa châ ta, tibyh 3,000 â tlôh.

6A si nawpa ta rahô miahrawh tao ta, chho lâ miapangawh, maw lâ miapangawh patyu ta. Chazy cha raopa hlâna châta hmâpa hmobaohzy pasi nawpa châ ta, tipâh cha theihthaipazy a si nawpa châta a châ.

7A taonazie awpa raopa hawhta, ngôh ta meiôh patyuna miahrawh tao ta, Achhyna o chhô liata chho lâchhâh miapangawh, maw lâchhâh miapangawh soh ta.

8Tlâhkhai miahrawh tao ta, Achhyna o chhôh liata chho lâchhâh miapangawh, maw lâchhâh miapangawh soh ta. Ngôh rahô chhao za kha a tao.

9Chazy hleikhô ta, theihthaipazy tlyhmia nata tlyhmia kawhpazy dôh ta, tlyhmia ochhizy tao ta, ochhizy cha dawh ta a pahu.

10Tipâh cha Achhyna o chho nochhi chaki liata a patyu.

11Hirâ ta beihzy, buchâh linazy nata biebuhzy tao hra ta. Chatanachata Hirâ ta Khazohpa o sana liata Bei Sawlawmaw châta a tao awpazy cha patlô ta.

12Hezy he a tao: Atôh miano, biebuhzy, atôhzy pawhmao liata pabyuhpa miano, atôhzy pawhmao liata pabyuhpazy chô liata biebuhzy khuna sao miano nata

13dawh tôhzy pawhmao liata dawh luh byuhpazy chô liata biebuhzy khuna dawh sao mianozy liata, tlâh no ta patlâh awpa pawmikarânâ nothlahpa 400 tao ta.

14Patyunazy, patyuna chô liata biebuhzy chhao tao ta,

15tipâh miakha nata a ry liata viahchao tôhpa pô hrawh hleino a tao.

16Beihzy, buchâh linazy, sa thaonazy nata a hmobaoh zydua cha, Hurâmabi ta Abeipa o châta dawh patliepa ta Bei Sawlawmaw châta a tao.

17Chazy cha abei ta Zawdâh bypi liata Sukô nata Zeredâ likawh beihlei su liata leih ta.

18Sawlawmaw ta hmobaoh hluhpi tao ta, hmobaohzy tao nawpa ta dawh a hmâpa zie cha, khopathliah tiah awpa châ vei.

19Sawlawmaw ta Khazohpa o hmobaoh zydua tao ta. A taopazy cha, ngôh maisâh nata Ypâna viahchhâ sona tlâhkhaizy;

20a taonazie raopa hawhta taopa Achhyna o chhôh supathaihpa hmiakô liata pakhaih awpa ta ngôh suapa ta taopa meiôh patyuna nata a meiôhzy;

21ngôh sua chaipa ta taopa pawpizy, meiôhzy nata chaikiezy;

22ngôh suapa ta taopa meiôh poh chakienazy, rahôzy, ropahâhpa sona beihkohzy nata mei lanazy a châ. Achhyna o chhôh lâ angiana ochhizy, Su Pathaih Chaipa ochhizy nata Achhyna o chhôh liata chhôhpadâhpa lai chaipa ochhizy chhao ngôh ta a tao khai.

← Chapter 3 Jump to: Chapter 5 →