Exodus 13

Chin (Mara Bible RV (BSI))

← Chapter 12 Jump to: Chapter 14 →

1Abeipa ta Mawsi hnohta,

2“Sawtuapa zydua kei châta na panano awpa a châ. Izarei sawzy hry liata chhi a pahy tuapa sawchapaw uhtheipa nata sahroh chapawpa a pataw tua chaipa maih kei eih a châ,” tah ta.

3Mawsi ta zawpi hnohta, “He noh, Izi râh seichâna tawhta nama kaw puana noh he khâ a thei thlâh ha muh vy. Abeipa ta ku thatlôpa ta Izi râh tawhta a châ chhi papua ei. Chavâta thinô pahlaopa viahchhâ nama nie awpa châ vei.

4Tanoh, Abi thla liata nama pua hih.

5Abeipa ta nâmo cha pie awpa ta châ pathlatuhpazy hnohta bie â vaw taihpa Kâna mo, Hiti mo, Amawri mo, Hivi mo nata Zebu mozy pahrâna râh, sâhpiti nata kheihti lona râh a cha tlôkhei ti ei ta, he thla liana heta, he chakaona he nama hmâ tyh awpa a châ.

6Noh sari chhôh viahchhâ thinô pahlao leipa nie aw ei chi ta, a noh sarina noh cha Abeipa châta kyhchhi noh a châ aw.

7Noh sari chhôh viahchhâ thinô pahlao leipa nie awpa châ ta, thinô pahlaopa khâpa hmah nâmo liata a y awpa châ leipa ta, nama râh chhôh zydua liata thinô hmô awpa a y awpa châ vei.

8Cha noh liata, nama sawzy hnohta, ‘Izi râh tawhta eima kaw pua nota Abeipa ta eima châta a taopa zydua vâta, he hmo he eima taopa a châ,’ nama tah aw.

9Zawpakhô kyhchhi nama hmâ tyh awpa cha, Abeipa ryhpa nama pakah liata a y thlâh ha thei nawpa ta, ngiana châta nama ku liata a ky ei chi ta, atheithlâhna châta nama mo nata mo likawh liata nama sopa hawhta a châ aw. Abeipa ta ku thatlôpa ta Izi râh tawhta a châ chhi papua ei hih.

10Chavâta he bieraopa he, kô chareih a daihti liata nama chay tyh awpa a châ.

11“ Abeipa ta nâmo nata châ pathlatuhpazy bie a châ taihpa hawh ei ta, Kâna mo râh cha tlôkheipa ta, cha râh cha a cha pie ti ei ta,

12chhi a pahy tuapa maih cha Abeipa châta nama panano lymâ awpa a châ. Nama sahroh a pataw tuapa a chapawpa maih cha Abeipa châta a châ aw.

13Alâ a pataw tuapa a chapawpa deikua cha mietakutaw ta nama chatlai awpa châ ta, nama chatlai khoh vei khiahta cha, a rao nama thlie awpa a châ. Nama sawzy hry liata sawchapaw uhtheipa maih cha nama chatlai awpa a châ.

14Noh hro ta nama sawzy ta, ‘He kyhchhi he khâpa ma a yzie?’ tahpa ta ama cha hiahri tita, ama hnohta, ‘ Abeipa ta ku thatlôpa ta Izi râh seichâna tawhta miah â chhi papuapa pamosana a châ.

15Phiraoh ta palôh lai kawpa ta eima sie awpa a pasai lei no kha, Abeipa ta Izi râh liata sawchapaw uhtheipa zydua, chyhsapa sawchapaw uhtheipa nata sahroh chapawpa a pataw tuapa maih a thie khai ha ei. Chavâta a chapawpa chhi a pahy tuapa zydua cha Abeipa lâta atheihna ta hlâ pi ta, eima sawchapaw uhtheipa zydua deikua cha eima chatlai,’ nama tah aw.

16Cha hmo ngiana cha nama ku liata y aw ta, nama mo nata mo likawh liata khiriena ta a y awpa a châ, Abeipa ta ku thatlôpa ta Izi râh tawhta miah â chhi papua ha hih,” tah ta.

17Phiraoh ta Izarei sawzy a pasiesa no kha, Philistinâ râh lâpi lâ a hnia via taraw ta, châhrasala Khazohpa ta, “Adyuhna amâ tyh tita, a ngiapachhipa ta Izi râh lâ ama kua pathlei aw na,” a tahpa vâta âmo cha, cha lâ tawhta a chhi vei.

18Khazohpa ta Izarei sawzy cha râhchawhpa siepahliepa ta Tilaipi Saihpa lâta tlao â chhi ei. Chatanachata Izarei sawzy cha, chariah chhaichhi a tobipa ta, Izi râh tawhta ama pua haw.

19Zawsi ta Izarei sawzy hnohta, “Khazohpa ta cha za tly thlyu aw ei ta, ei ruzy he, he su tawhta nama phaoh ha awpa a châ,” tahpa ta liahsa bie a pataihsa hapa hawh ei ta, Mawsi ta Zawsi ruzy cha phaoh ta.

20Sukô su tawhta pua ei ta, râhchawhpa chhâna Ethâmâ su liata a rie ei ta.

21Ama hmia lâta Abeipa sie ta, chhô nah zâ ta ama sie thei nawpa ta, chhô daihti liata meihdo tôh ta âmo cha a chhi ta, zâ daihti liata âmo pakhaih awpa ta mei tôh ta â chhi ei.

22Nohchhô ta meihdo tôh, zâ ta mei tôh ta Izarei phopi cha siesai beih vei.

← Chapter 12 Jump to: Chapter 14 →