Exodus 35

Chin (Mara Bible RV (BSI))

← Chapter 34 Jump to: Chapter 36 →

1Mawsi ta Izarei zawpi zydua pahmaoh ta, ama hnohta, “He biezy he Abeipa ta tao awpa ta a cha piepa ei a châ.

2Noh charu chhôh rai hria awpa châ ta, a noh sarina noh deikua cha, nama châta noh pathaihpa, Abeipa châta a pahâ nawpa Pahânoh zachhihpa a châ aw. Ahy rai cha noh ta rai a hriapa cha thie awpa a châ.

3Pahânoh cha nama pahrâna su zydua liata mei rai nama patih awpa châ vei,” tah ta.

4Mawsi ta Izarei zawpi zydua hnohta, “He he Abeipa biepiepa a châ.

5Nama hry tawhta Abeipa châta thyuna vaw cheih teh u. Abeipa châta thyuna pie khohna palôh a hneipa maihta thyuna cha vaw cheih ei sala, ngôhzy, tâkâzy, dawhzy;

6pala nohpa, saihdôhpa nata saihlawpazy, pala rih dipa pabaohpazy, mie hmizy;

7mietaku tôhpa vo pasaihpazy, tilaipi siahrâ vozy, akeisia thozy;

8khaihna châta sathaw zy, sathaw pathaihpa châta nata ropahâhpa raopa châta ia-ôzy;

9ephaw nata chachôhna vyhphao kiky pakyu nawpa ta beri lôzy nata lôsôhpazy vaw cheih mawh ei sy.

10“Nama hry liata zôthaipa zydua a vy ei sala, Abeipa ta bie a piepa zydua tao mawh ei sy:

11Achhyna byureih nata a poh o nata a khuna zy, a patusanazy, a thophiazy, a tlâhzy, a tôhzy, a patyunazy;

12Biehrai Byh nata a lâhreizy, zawngiahna dyuchhai nata khuna pohraipa;

13tlâhkhai nata a lâhreizy, a chhaichhi zydua nata ypâna viahchhâ;

14khaihna châta meiôh tôh nata a hmobaoh zydua, a meiôhzy nata khaihna châta sathaw;

15ropahâhpa maisâh nata a lâhreizy, sathawthuna sathaw, ropahâhpa pahâh ngaitapa nata achhyna byureih chhikao liata parai awpa chhikao pohraipa;

16raopa hlâna maisâh nata a dawh sao, a lâhreizy, a hmobaoh zydua nata rahô nata a patyuna;

17dôhpachhôh tlyhmia pohraipazy nata a tôhzy, a patyunazy nata dôhpachhôh tlyhmia kaohrai pohraipa;

18achhyna byureih khaipânazy, dôhpachhôh tlyhmia dôhna khaipânazy, a chaorizy;

19Su Pathaihpa liata chakao nawpa ta â ngia ngaitapa ta sapa chysiazy, theihthaipa chakaona rai hria nawpa châta theihthaipa Arawna chysia pathaihpa nata a sawchapawzy chysia ama vaw cheih awpa a châ,” tah ta.

20Izarei zawpi zydua cha Mawsi mohmô tawhta pua ei ta.

21Palôh thathyupa nata pie khohna palôh a hneipa maih a vy ei ta, ahmaohna poh o nata a chakaona nata chysia pathaihpazy tao nawpa ta hmâ awpa ta Abeipa lâ thyuna vaw cheih ei ta.

22A chanô chapaw ta, a palôh liata khona a hneipa maih a vy ei ta, lâkyuzy, rahyzy, moh chahnaona kusadizy, pachhihzy, ngôh ta taopa sôh nata thih to vaw cheih ei ta, chyhsa zydua ta Abeipa lâ ngôhzy hlâ ei ta.

23Pala nohpazy, saihdôhpazy, saihlawpazy, pala rih dipazy, mie hmizy, mietaku tôhpa vo pasaihpa nata tilaipi siahrâ vo a hneipa maihta vaw cheih ei ta.

24Tâkâ nata dawh zy a thyu theipa ta Abeipa châta thyunazy vaw cheih ei ta. Khâpa chhaichhi châ chhâ ta hmâh awpa ta, akeisia tho a hneipa zydua ta vaw cheih hra ei ta.

25Chanô zôthaipa sahlao zydua ta ama ku ta pala pahieh ei ta, pala nohpazy, saihdôhpazy, saihlawpazy nata pala rih dipa ama pahiehpazy vaw cheih ei ta.

26Chanô palôh thathyupa zydua ta ama zôthaina hmâpa ta mie hmi pahieh ei ta.

27Ryureituhpazy ta beri lôsôhpazy nata ephaw nata chachôhna vyhphao liata kiky pakyu awpa lôsôhpazy vaw cheih ei ta.

28Ia-ôzy nata khaihna châta hmâ awpa nata sathawthuna nata ropahâhpa châta hmâ awpa sathawzy vaw cheih hra ei ta.

29Chatanachata Izarei saw zydua, a chanô chapaw ta, ama palôh liata pie khohna a hneipa maihta, Abeipa ta tao awpa ta Mawsi ku liata bie a piepa zydua tao nawpa ta lôhthai thyuna vaw cheih ei ta.

30Mawsi ta Izarei sawzy hnohta, “Pachâ teh u, Abeipa ta Zudâh chi Hurâ sawchapawpa Uri sawchapawpa Bezale cha a moh tlai ta aw ta.

31Ano cha sona, novâhna, pahnona nata zôthaina tozy hnei awpa ta Khazohpa Thlahpa ta pabie ta.

32Ngôh, tâkâ nata dawh chhaichhizy â ngia ngaitapa ta daih thaina zôthaina piepa ta,

33lôsôhpazy daih ta pangaih thaina nata tho khie thaina nata kuzô thaina to hnei awpa ta a aw.

34Bezale nata Dânâ chi Ahisamâ sawchapaw Ôhôliaba cha ama pano ta chyhsazy pachu thaina sona pie ta.

35Âmo cha rai zydua hria thai awpa ta palôh sona ta pabie ta, tho nata lô khie thaina, phorâ thaina, pala nohpa, saihdôhpa, saihlawpa nata pala rih dipa pabaohpazy ta kiky zei thaina nata poh sa thaina zy ama hnohta pie ta, rai to hria thaina nata zôthaina ta a tobi ei.”

← Chapter 34 Jump to: Chapter 36 →