Exodus 22

Chin (Mara Bible RV (BSI))

← Chapter 21 Jump to: Chapter 23 →

1“Chyhsa ta viahchao tôhpa tlyma, mietaku tlyma paru sala, a thie khiahta tlyma, a zuah khiahta tlyma, viahchao tôhpa pô kha vyuhpa ta viahchao tôhpa pô pangawh thô aw ta, mietaku pô kha vyuhpa ta mietaku pô palih a thô aw.

2“Parutuhpa cha chyhsa o a ngiapa ta a paru hai nota hmôpa châ sala, tusaopa a châ khiahta cha, a tusaotuhpa chô liata thisaih maoh y aw vei.

3Noh a chhi tawhta tusaopa a châ khiahta deikua cha, a thisaih maoh a y aw. Parutuhpa cha a hmo parupazy a thô awpa châ ta, khâpa hmah a hnei vei khiahta cha, a parupa thô nawpa ta ano zuah awpa a châ.

4“Parupa viahchao tôhpa tlyma, alâ tlyma, mietaku tlyma, parutuhpa ku liata ahrohpa ta hmôpa a châ khiahta cha, a lie no ta a thô awpa a châ.

5“Chyhsa ta chyhsa hropa lyu liata tlyma, kre sadô liata tlyma, a sahroh lao a pabâsa raruah khiahta tlyma, a sahroh pathliepa ta chyhsa lyu a pabâsa khiahta cha, ano lyu pha chaipa nata ano kre sadô pha chaipazy ta a thô awpa a châ.

6“Chyhsa ta mei pakâ sala, ahloh buhzy lâta kâ laihpa ta, sapiahzy tlyma, sâh a duahpa tlyma, lyu tlyma, a kâ khiahta cha, mei pakâtuhpa ta a mâ zydua a thô thlyu awpa a châ.

7“Chyhsa ta a tâkâ tlyma, a hmo tlyma, a vaih pavaosa sala, cha o tawhta chyhsa ta paru sala, parutuhpa cha hmôpa a châ khiahta cha, a lie no ta a thô awpa a châ.

8Parutuhpa hmôpa a châ vei khiahta cha, parupa sôh avaotuhpa o hneituhpa cha Khazohpa a hnia aw ta, a vaih hmo cha ano ku ta a la nata la lei pasiapa a châ aw.

9“Parupa hmo maih, viahchao tôhpa tlyma, alâ tlyma, mietaku tlyma, chysia tlyma, hmo leipa khâpa rai, chyhsa ta, ‘He he kei eih a châ,’ a tah khiahta cha, ama pano likah biepeipa cha, Khazohpa hnohta tlôkheipa châ aw ta, Khazohpa ta thailei a pachâsapa ta a lie no ta a vaih cha a thô awpa a châ.

10“Chyhsa ta alâ tlyma, viahchao tôhpa tlyma, mietaku tlyma, sahroh kheihawhpa rai, a vaih pamokhâhsa sala, athipa ta tlyma, hmahphaopa ta tlyma, hraopa ta tlyma vaw y sala, a hmôpa ama y vei khiahta cha,

11a mokhâhtuhpa cha a vaih sahroh a hria nata hria lei pasia nawpa ta, Abeipa moh reipa ta ama pano likah liata chhie a sakhâh aw ei ta, hneituhpa ta chhie amâ sakhâhna bie hawhta a pyh aw ta, mokhâhtuhpa ta thô aw vei.

12A parupa tlai a châ khiahta deikua cha, hneituhpa hnohta a thô awpa a châ.

13Sa ta a taipa a châ khiahta cha, pasia nawpa ta sa zômeihpa vaw cheih aw ta, sa taipa sahroh vyuhpa cha thô aw vei.

14“Chyhsa ta a vaih sahroh a hlâh sala, hmaphaohpa ta tlyma, athipa ta tlyma vaw y sala, cha nota sahroh hneituhpa â hlao vei khiahta cha, a thô thlyu awpa a châ.

15Hneituhpa â hlao khiahta deikua cha, thô aw vei. A mâ hneipa ta a hlâpa a châ khiahta cha, â hlâna mâ nata sahroh pahleipa mâ panâhpa a châ aw.

16“Chyhsa ta lapinô châta a pahawh leipa laihsa reipasao sala, â ziakhei khiahta cha, nômâ pie aw ta, a lapinô ta a hnei thlyu awpa a châ.

17Chanô paw ta a pahneisa khoh ngâsâ leipa khiahta cha, laihsa kôpazy nômâ zie sôh a pie pyly awpa a châ.

18“Dyuthaipa chanô na pahlôh awpa châ vei.

19“Sahroh a ziakheipa cha thie thlyu awpa a châ.

20“ Abeipa lâta châ leipa ta, khazoh hropa lâta atheihna a hlâpa cha, pahleipadia awpa a châ.

21“Chihropa chô liata adoleipa ta na tao awpa châ leipa ta, ano cha na tlybai awpa châ hra vei. Nâmo chhao Izi râh liata chihropa nama châ hrapa kha.

22Nôhmei nata hârazy ama rie nama pathei awpa châ vei.

23Ama rie pathei u la, eina awsao khiah ei ta cha, ama awna ao thei aw na ta,

24ei pathi thata ia aw ta, zaozi ta ei cha thie aw ei. Chatanachata nama lapinôzy nôhmei châ aw ei ta, nama sawzy hârapa ta ama y aw.

25“Ei phopi chyhsa na kiapâh liata a ypa dyhchhiepa hnohta na sôh na pahmâsa khiahta cha, sôh dyu a pacheisapa chyhsa hawhta a pachâ leipa la, apôhna na haw awpa châ vei.

26“Na vaih poh sôhkâ ta na lapa khiahta cha, noh tla hlâta na pie heih awpa a châ.

27A chhâpa cha, cha poh cha a bu awpa a hnei chhôhpa, a pôhpa liata â bu awpa poh châ ta, khâpa a bupa ta ma â mô aw? Kei cha ngiachhiena a hneipa châ tlôh na ta, chavâta eina awsao tita ei thei aw.

28“Khazohpa na rei pachhie awpa châ leipa ta, na phopi ryureituhpa chô liata bie pha leipa na reih awpa châ vei.

29“Na kôvei tawhta nata na kresawhti saohpazy tawhta hlâ awpazy na pahawhpasâh awpa châ vei. Na sawchapawzy hry liata a pih tua chaipa cha, kei eina pie aw chi.

30Cha hawhna chata, na viahchao tôhpazy nata na mietakuzy chhao na tao aw. Noh sari chhôh a panô hnohta y aw ta, a noh chariena noh ta kei lâta na vaw hlâ aw.

31“Ei chyhsa pathaihpa nama châ awpa a châ. Chavâta lyurâhpa liata arie ta a taipa sa nama nie awpa châ vei. Cha hawhpa cha i nama thy awpa a châ.

← Chapter 21 Jump to: Chapter 23 →