Exodus 19

Chin (Mara Bible RV (BSI))

← Chapter 18 Jump to: Chapter 20 →

1Izarei sawzy Izi râh tawhta ama pua tawhta a thla thôhna, cha noh liana tlai chata Sinai râhchawhpa tlô ei ta.

2Rephidi tawhta pua ei ta, Sinai râhchawhpa tlô ei ta, râhchawhpa liana cha riehmo paryh ei ta. Izarei mo cha, cha liata tlâh thaby liata riehmo paryh ei ta.

3Mawsi cha Khazohpa lâ khy ta, Abeipa ta tlâh tawhta bie a vaw chho ta, a hnohta, “Zakaw chhôhkhazy hnohta hetana heta reih la, Izarei sawzy hnohta hetana heta chho mah y:

4‘Izi mo chô liata ei hmotaozie nata pahmôhpi mathlaw ta cha phaoh ei na ta, kei lâta ei châ chhipa ei kha nâmo tlai ta nama hmôpa kha a châ.

5Chavâta tahmâ pakhâta ta ei bie nathliepa ta, ei biehrai nama zyh khiahta cha, khizaw phopi zydua hry liata ei ryuto eihpa nama châ aw, khizaw zydua he kei eih châ tlôh ta.

6Chatanachata ei châta theihthaipa khinarâh châ aw ei chi ta, phopi pathaihpa nama châ aw.’ Chazy cha Izarei sawzy hnohta na rei awpa biezy cha a châ,” tah ta.

7Chatawhcha Mawsi cha zu ta, Izarei phopi machâzy awpakhy ta, Abeipa ta bie a piepa zydua ama hmiakô liata reih ta.

8Zawpi zydua ta, “ Abeipa reipa zydua cha eima tao lymâ aw,” tahpa ta â raohpa ta a chhy ei ta. Mawsi ta zawpi biereipazy cha Abeipa chho ta.

9Abeipa ta Mawsi hnohta, “Pachâ teh, bie ei cha chho tita zawpi ta ama thei thei nawpa nata chhâzaw ta ama cha zo thei nawpa ta, meihdo chhakaluhpa hry liata nâ lâ ei vy aw,” tah ta. Chatawhcha Mawsi ta zawpi bie reipazy cha Abeipa chho ta.

10Abeipa ta Mawsi hnohta, “Zawpi lâ vawh la, âmo cha tanoh nata mylâ kei pathaisa mah y. Ama chysiazy pasu ei sala,

11a noh thôhna noh châta a pachyh mawh ei sy. A noh thôhna noh ta chyhsa zydua mohmô ta Sinai Tlâh liata Abeipa a za chô aw.

12Zawpi châta râhri pakhâh aw chi ta, ama hnohta, ‘A chado teh u. Tlâh lâ kiah leipa u la, râhri chhao hria cheita khuh vy. Ahy rai tlâh a hriapa maih cha thie thlyu awpa a châ.

13Ku ta thie awpa châ leipa ta, alô ta vaw sao awpa a châ. A châ vei khiahta cha, li ta kasao awpa a châ. Sa rai, chyhsapa rai, a hroh awpa châ vei. Chiahmie a paro tita, tlâh lâ amâ khy awpa a châ,’ tahpa ta na chho aw ei,” tah ta.

14Mawsi cha tlâh tawhta zawpi lâ zu ta, zawpi cha pathaisa ta. Ama chysiazy pasu ei ta.

15Mawsi ta zawpi hnohta, “A noh thôhna noh châta a pachyh teh u, chanô rai namâ hnia awpa châ vei,” tah ta.

16A noh thôhna noh my ta tôkalôh a vaw thua ta, dôhlazy vaw pathlie ta, tlâh chô liata meihdo chhakaluhpa a vaw chhoh ta, chiahmie paro ngaitapa vaw paro ta, riehmo liata a ypa chyhsa zydua cha a chalyu ei ta.

17Mawsi ta zawpizy cha Khazohpa a tyh awpa ta riehmo tawhta a chhi papua ta. Zawpizy cha tlâh thaby liata a duah ei ta.

18Abeipa ta Sinai Tlâh liata mei ta a za chôpa vâta, tlâh cha meikhuh ta pahly khai ha ta. Cha meikhuh cha patina meikhuh hawh tlai ta avâ lâ kiah ta, a tlâh duata thata a chalyu ta.

19Chiahmie pyu cha paro via rili ta. Chatawhcha Mawsi ta bie vaw reih ta, Khazohpa ao ta a vaw chhy ta.

20Abeipa cha Sinai Tlâh laki liata za chô ta. Abeipa ta Mawsi cha tlâh laki lâ khy awpa ta aw ta, chatanachata Mawsi cha khy ta.

21Abeipa ta Mawsi hnohta, “Zu la, zawpi khu zikyu zâ râ mah y. Chataleipatala Abeipa hmia hmô a chhuahpa ta vaw chatôh aw ei ta, chyhsa hluhpi ama leidia pathlei aw.

22Abeipa a hnia tyhpa theihthaipazy chhao a pathai hra mawh ei sy. Chataleipatala Abeipa ta âmo chhao a pahleipadia pathlei aw ei,” tah ta.

23Mawsi ta Abeipa hnohta, nâma tlai ta, “Zawpi cha Sinai Tlâh lâ a khy thei aw veih ei, ‘Tlâh thaby liata râhri pakhâh u la, pathaisa teh u,’ tahpa ta zikyu miah nâ râ ha kha zaw,” tah ta.

24Abeipa ta a hnohta, “Zu la, na hnohta Arawna a kaw chhi la, a khy heih mah y. Theihthaipazy nata zawpizy deikua cha, Abeipa lâ a vy awpa ta ama vaw chatôh pathlah awpa châ vei. Chataleipatala Abeipa ta âmo a chatôh pathlah pathlei aw ei,” tah ta.

25Chatanachata Mawsi cha zawpi lâ zu ta, cha biezy cha âmo za chho ta.

← Chapter 18 Jump to: Chapter 20 →