Exodus 17

Chin (Mara Bible RV (BSI))

← Chapter 16 Jump to: Chapter 18 →

1Izarei zawpizy cha Sini râhchawhpa tawhta pua heih ei ta, Abeipa biepiepa hawhta a paty paty ta riehmo taopa ta sie lymâ ei ta, Rephidi liata a rie ei ta, cha liata zawpi châta ti do awpa y leipa ta.

2Chavâta zawpi ta Mawsi cha a hryuh ei ta, “Ti do awpa miah pie teh,” tah ei ta. Mawsi ta ama hnohta, “Khazia einâ hryuh ei chi, khazia Abeipa nama pasia,” tah ta.

3Zawpizy cha ama dâhphi ngaita ta, Mawsi chô liata paphôh ei ta, a hnohta, “Khazia keimo nata eima sawzy nata eima sahrohzy he dâhphipa ta miah thie awpa ta Izi râh tawhta miah nâ kaw chhi papua?” tah ei ta.

4Mawsi cha Abeipa pado ta, a hnohta, “He chyhsazy heta alô ta na vawhsao awpa a mâ thlâh ha bâ ei ta, kheihta ei tao aw ei?” tah ta.

5Abeipa ta Mawsi hnohta, “Zawpizy hmia lâta sie la, Izarei machâ thokha na hnohta a chhi la, Nile chavah na tuna chôchahrei kha na ku liata chabapa ta sie mah y.

6Hôribâ liata lôpanô chô liata na hmiakô liata a vaw duah aw na ta, lôpanô cha tu aw chi ta, cha tawhta zawpi do awpa ti a vaw pua aw,” tah ta. Mawsi ta Izarei machâzy mohmô liata cha hawhna chata tao ta.

7Izarei sawzy paphôhna vâta nata, “Eima hry liata Abeipa a y ma, y vei ma?” tahpa ta Abeipa ama pasiapa vâta, cha su cha a moh Mâsâ nata Meribâ a bi.

8Chatawhcha Amale mo a vy ei ta, Izarei mo cha Rephidi liata a vaw dyuh ei ta.

9Mawsi ta Zawsua hnohta, “Eima hry tawhta chapaw thokha a tlyh la, pua u la, Amale mo a kei dyuh teh u. Khazohpa chôchahrei chabapa ta, mylâ tlâh laki liata ei vaw duah aw,” tah ta.

10Mawsi ta a chhopa hawhta, Zawsua ta Amale mo cha a dyuh ta. Cha nota Mawsi, Arawna nata Hurâ zy cha tlâh laki lâ kiah ei ta.

11Mawsi ta a ku a pazawh chhôh cha Izarei mo ta pahnie lymâ ei ta, a ku a pathliah nahta, Amale mo ta ama pahnie ha tyh.

12Châhrasala Mawsi kuzy cha vaw si ha ta, chavâta alô la ei ta, a kiapâh liata soh ei ta, cha liata a tyuh ta. Arawna nata Hurâ ta a ku cha dei ei ta, pakha ta hiakha la dei ta, pakha ta hia kha lâ a dei. Cha hawhna chata noh tlana taihta a kuzy cha a pazawh ualua ta pazawh thlâh ha ta.

13Chatanachata Zawsua ta Amale nata a sahlaozy cha zaozi ta a pahnie ha ei.

14Abeipa ta Mawsi hnohta, “He bie he a theih thlâh ha awpa ta, châbu liata roh la, Zawsua nah theina liata reih mah y. Amale mo he avâ ry liata ama y hra tahpa chyhsa ta ama pahno khao leina taihta ei pahleipadia khai aw ei,” tah ta.

15Chatawhcha Mawsi ta maisâh tao ta, a moh Zehôvâh Nisi a bi.

16Mawsi ta, “Amale cha Abeipa beidyuchhai chô liata a ku a hypa vâta, chhâ a vaw y lymâ awpa zydua liata Abeipa ta â dyuh lymâ aw,” tah ta.

← Chapter 16 Jump to: Chapter 18 →