Exodus 37

Chin (Mara Bible RV (BSI))

← Chapter 36 Jump to: Chapter 38 →

1Bezale ta akeisia tho ta Biehrai Byh tao ta, a doh lâ dy no nata khophie seih ta, a hâ lâ dy kha nata khophie kawh ta, â sâhna lâ dy kha nata khophie a châ.

2A chhôh nata khôtho lâ ngôh suapa ta pahu ta, ngôh ta a tlâh a pakyu.

3A phei miapalih liata pataoh awpa ngôh tiaki miapalih leih ta, tiaki miano hiakha lâ châta châ ta, tiaki miano hiakha lâ châta a châ.

4Akeisia tho ta a lâzy tao ta, chazy cha ngôh ta pahu ta,

5Byh a sy nawpa ta a kâ lâta tiakizy liata a lâzy a chahraoh.

6Ngôh suapa ta zawngiahna dyuchhai tao ta, a doh lâ dy no nata khophie seih ta, a hâ lâ dy kha nata khophie a kawh.

7Cherubi miano ngôh ta tao ta, zawngiahna dyuchhai a kâ chavei chachâh liata a daih ta daihpa ta a tao.

8Cherubi miakha zawngiahna dyuchhai hiakha lâ pai liata pataoh ta, cherubi hropa hiakha lâ pai liata pataoh ta, zawngiahna dyuchhai nata pazaopa ta dyuchhai kâ chavei chachâh ta cherubi miano a tao.

9Cherubizy cha zawngiahna dyuchhai lâ a heihpa ta, ama hmia a chhy ei ta, ama mathlawzy â sâhpa ta pakai ei ta, zawngiahna dyuchhai cha ama mathlaw ta ama khu.

10Akeisia tho ta tlâhkhai tao ta, a doh lâ dy no seih ta, a hâ lâ dy kha kawh ta, a sâhna lâ dy kha nata khophie a châ.

11Cha cha ngôh suapa ta pahu ta, ngôh ta a tlâh a pakyu.

12Pazah tie phiapa ta a tlâh tao ta, a tlâh â dôna taihta ngôh ta a pakyu.

13Tlâhkhai châta ngôh tiaki miapalih leih ta, tiakizy cha tlâhkhai ki phei palih liata pataoh ta.

14Tlâhkhai a sy tita a lâ chahraoh nawpa ta, tiakizy cha pakyuna liata pataoh ta.

15A lâzy akeisia tho ta tao ta, ngôh ta pahu ta.

16Tlâhkhai hmobaoh, beikohzy, ukâzy, biebuhzy nata dopa hlâna patlai nawpa beihraizy ngôh suapa ta tao ta.

17Ngôh suapa ta meiôh tôh tao ta. A tôh thaby, a tôh, a nyuzy, a paw ngaihchakuazy nata a pawzy a pazao khaipa ta a tao.

18A kâ chavei chachâh ta a chiah miacharu pachiah ta, meiôh tôh kâ hiakha lâ a chiah miathôh y ta, meiôh tôh kâ hiakha lâ a chiah miathôh y hra ta.

19Hiakha lâ chhâh chiah liata kuasâh paw pabyuhpa a lyupa nyu miathôh, a paw ngaihkaru nata a paw a hneipa tao ta, hiakha lâ chhâh chiah liata chhao kuasâh paw pabyuhpa a lyupa nyu miathôh, a paw ngaihkaru nata a paw a hneipa tao hra ta. Cha hawh lymâ chata meiôh tôh tawhta a puapa chiah miacharu châta tao ta.

20Meiôh tôh liata kuasâh paw pabyuhpa a lyupa nyu miapalih, a paw ngaihkaru nata a paw a hneipazy y ta.

21A chiah miano ry liata a paw ngaihkaru miakha y ta, a chiah hropa miano ry liata a paw ngaihkaru miakha y ta, a chiah hropa miano ry liata a paw ngaihkaru miakha y hra ta, cha hawh lymâ chata, meiôh tôh tawhta a puapa a chiah miacharu châta tao khai ta.

22A paw ngaihkaru nata a chiahzy cha meiôh tôh nata a pazao khai ta, ngôh suapa ta hmaohkha ta daih khoh khaipa a châ.

23Meiôh miasari tao ta, a chaikiezy nata meipaoh sonazy ngôh suapa ta tao ta.

24Ngôh suapa talent miakha hmâpa ta meiôh tôh nata a chhaichhi zydua a tao.

25Ropahâhpa rao nawpa ta maisâh ki palihpa akeisia tho ta tao ta, a doh lâ dy kha seih ta, a hâ lâ dy kha a kawh. Maisâh cha ki palih hneipa ta taopa châ ta, â sâhna lâ dy no a châ. Maisâh ki palih liata a kizy taopa châ ta, maisâh nata pazaopa ta taopa a châ.

26A chôzy, a kâzy nata a kizy ngôh suapa ta pahu ta, a kiahzy ngôh pakyupa ta a padô.

27Maisâh asyna lâhrei chahraoh nawpa ta, maisâh kiah ry a kâ chavei chachâh ta ngôh tiakizy a pataoh.

28Akeisia tho ta a lâhreizy cha tao ta, ngôh ta a pahu.

29Sathawthuna châta sathaw pathaihpa nata ropahâhpa pasohpa tao ta, ropahâhpa a tao thaipazy taozie hawh tlai ta a tao.

← Chapter 36 Jump to: Chapter 38 →