Genesis 12

Chin (Mara Bible RV (BSI))

← Chapter 11 Jump to: Chapter 13 →

1Abeipa ta Abarâ hnohta, “Na râh tawhta nata na chiheihzy tawhta nata na paw o tawhta pua la, râh ei cha pahmô awpa lâ sie mah y.

2“Phopi rônahpa ta cha tao aw na ta, Byhnâ ei cha pie aw; Na moh parônahsa aw na ta, Byhnâ na châ aw.

3Byhnâ châ awpatuhpa maih byhnâ awpa aw na ta, Chhie châ sapatuhpa maih chhie ei sapa aw; Alei chô liata chi to pho to, Nâma vâta byhnâ topa ta ama y aw,” tah ta.

4Abarâ cha Abeipa reipa hawhta sie ta, Lawta chhao a hnohta sie hra ta. Abarâ cha Harânâ khih a puasai nota kô 75 uhtheipa a châ.

5Abarâ cha a lapinô Sârai, a nawhta sawchapawpa Lawta, a hneipa zydua nata Harânâ khih liata chyhsa a hneipa zydua a chhi ta, Kâna râh pangaipa ta sie ei ta. Kâna râh ama tlô nahta,

6Abarâ cha râh chahryh ta, Sekhe su liata Môre thokô laipa taihta chahryh ta. Cha daihti liata, cha râh liata a pahrâpazy cha Kâna mozy ama châ.

7Abarâ hnohta Abeipa a vaw luah ta, “He râh he na chipathla hnohta ei pie aw,” tah ta. Chavâta a hnohta a vaw luahpa Abeipa châta, cha su liata maisâh padua ta.

8Cha tawhta Bethel nochhi lâta tlâh râh lâ a pasie ta, cha liata a poh o rai ta. Notla daih lâta Bethel y ta, nochhi daih lâta Ai khih a y. Cha liata Abeipa châta maisâh tao ta, Abeipa moh pado ta.

9Cha tawhna chata Abarâ cha a thao heih ta, Neke râh pangaipa ta sie ta.

10Cha râh liata chakâhna vaw tlô ta, râh liata chakâh mozohpa vâta, Abarâ cha Izi râh liata y chy awpa ta zu ta.

11Izi râh â ngia chy ta, a lapinô Sârai hnohta, “Pachâ teh, chanô chhithai kawpa na châ tahpa ei pahno.

12Izi mo ta ama cha hmô tita, ‘He he a lapinô a châ hi,’ tah aw ei ta, kei na thie aw ei ta, nâ deikua ama cha pahlôh aw.

13Nâma vâta â bohpa ta ypa ta, nâma vâta ei hroh thei nawpa ta, ngiachhiepa ta, ‘A sietanô na ei châ’ tah mah y,” tah ta.

14Abarâ cha Izi râh â ngia nahta, Izi mo ta chanô cha vaw hmô ei ta, chhithai tah ngaita ei ta.

15Phiraoh molaipazy ta chanô cha ama hmô nahta, a chhithaizie Phiraoh chho ei ta. Chatanachata chanô cha Phiraoh o lâ a chhi ha ei ta.

16Chanô vâta Phiraoh cha Abarâ chô liata pha ngaita ta, mietakuzy, viahchaozy, alâ chapawpazy, seichapaw nata seichanôzy, alâ chanôpazy nata râraoseihpazy pie ta.

17Châhrasala Abeipa ta Abarâ lapinô Sârai vâta Phiraoh nata a chhôhkha chô liata potlana ru ngaitapa patlôsa ta.

18Phiraoh ta Abarâ cha aw ta, “Khazia he hawhna heta ei chô liata hmo na tao? Na lapinô a châpa khazia eina chho vei chi?

19Khazia, ‘Ei sietanô na a châ’ na tah? Cha vâna chata mah ei lapinô ta ei hnei ha tâh? Moh teh, na lapinô hih, a chhi la, sie syulyu ha mah y,” tah ta.

20Phiraoh ta Abarâ kyh liata a chyhsazy biepie ta, chatanachata a lapinô nata a hneipa zydua chhaota ama pasiesa haw.

← Chapter 11 Jump to: Chapter 13 →