Genesis 40

Chin (Mara Bible RV (BSI))

← Chapter 39 Jump to: Chapter 41 →

1Cha hmozy hnôhlâ ta, Izi bei nyu hlâtuhpa nata a viahchhâ taotuhpazy ta, ama bei, Izi bei cha a ru pachhô ei ta.

2Phiraoh cha a molaipa pano, nyu hlâtuhpazy hyutuhpa nata viahchhâ taotuhpazy hyutuhpa chô liata a hiehâh kaw ta.

3Zawsi patâhna su, vaituhpazy hyutuhpa o liata patâhna o liata âmo cha patâh ta.

4Vaituhpazy hyutuhpa ta Zawsi cha âmo vaih awpa ta biepie ta, Zawsi ta âmo cha vaih ta. Noh khazie tlyma a tâh ei ta.

5Zâ kha cha, patâhna o liata patâhpa Izi bei nyu hlâtuhpa nata viahchhâ taotuhpa zy ta mâ sa chyu ei ta. Ama mâ chhopasiana deikua cha a lyu vei.

6A mylâ my ta Zawsi cha âmo lâ a kei ngia ta, âmo cha moh ta, pachârôhpa ta ama ypa hmô ta.

7Zawsi ta, “Khazia tanoh nama hmia dia a pachâ a rôh kaw?” tahpa ta a zibeipa o liata â tâlâhpa Phiraoh molaipazy cha hiahri ta.

8Âmo ta a hnohta, “Mâ sa pi ta, miah a chhopasia theipa y veih ei,” tah ei ta. Zawsi ta ama hnohta, “Chhopasianazy cha Khazohpa eih châ vei mâ? Tahmâ nama mâzy cha na chho teh u,” tah ta.

9Chatanachata nyu hlâtuhpazy hyutuhpa ta, a mâ cha Zawsi chho ta, a hnohta, “Ei mâ lâta ei hmiakô liata kre zôh vaw y ta.

10Kre zôh liana cha a chiah miathôh y ta, a chhyh kaw thao ta, a paw thlai kaw pawh ta, a paw saozy ta kre hmohpazy vaw papua ta.

11Phiraoh nyu ei ku liata chaba na ta, kre theizy cha lyu na ta, Phiraoh nyu liata saoh na ta, nyu cha Phiraoh ku liata ei kei hlâ,” tah ta.

12Zawsi ta a hnohta, “He he a chhopasiana a châ: a chiah miathôh kha noh thôh a châ.

13Tahmâ tawhta noh thôhna liata Phiraoh ta na luh cha chaluah aw ta, na raihria liata a cha padua heih aw. A nyu hlâtuhpa na châ tyhpa hawhna khata, Phiraoh nyu cha a ku liata na hlâ heih aw.

14Phana na to tita, nâ thei thlâh ha la, ngiachhiepa ta ei chô liata phana palâsa la, Phiraoh hnohta ei thâtih reih la, he o tawhna heta rie na papua mah y.

15Hebrai mo râh tawhta parupa ta a chhipa châ na ta, he râh liana chhao he patâhna o chhôh lia taihta khô awpa ta khâpa hmah parao va na,” tah ta.

16Viahchhâ taotuhpazy hyutuhpa chhao ta, chhopasiana cha a pha tahpa a pahno nahta, Zawsi hnohta, “Kei chhao mâ ei hnei hra. Viahchhâ râhpa kachu miathôh ei luh liata khaih na ta,

17kachu chôchaipa liata Phiraoh châta viahchhâ pakâh chiehpa chi to vaw y ta. Châhrasala viahchhâzy cha pavawzy ta ei luh liata kachu tawhta ama vaw nie ngâ kaw,” tah ta.

18Zawsi ta a chhy ta, “He he a chhopasiana a châ: Kachu miathôh kha noh thôh a châ.

19Tahmâ tawhta noh thôhna liata, Phiraoh ta na luh cha tai aw ta, na pôhpa tho liata a pangieh aw. Pavawzy ta na sapa ama nie aw,” tah ta.

20A noh thôhna noh, Phiraoh pi noh liata, Phiraoh ta a chakaotuhpa zydua châta kyhchhi tao ta. A chakaotuhpazy mohmô ta nyu hlâtuhpazy hyutuhpa nata viahchhâ taotuhpazy hyutuhpa cha ama luh chaluah ta.

21Nyu hlâtuhpazy hyutuhpa cha, a raihria tyhpa liata padua heih ta, Phiraoh ku liata nyu hlâ heih ta.

22Viahchhâ taotuhpazy hyutuhpa deikua cha, Zawsi ta ama mâ a chhopasiapa hawh tlai ta, a paaosao haw.

23Châhrasala nyu hlâtuhpazy hyutuhpa ta Zawsi cha a thei khao leipa ta, my ha ta.

← Chapter 39 Jump to: Chapter 41 →