Genesis 9

Chin (Mara Bible RV (BSI))

← Chapter 8 Jump to: Chapter 10 →

1Khazohpa ta Nôah nata a sawchapawzy cha byhnâ awpa ta, ama hnohta, “Chi pathlapa ta pôh u la, alei he bie teh u.

2Sa to, avâ liata pavaw to, alyhpasa to nata tilaipi nga to chô liata nâmo china nata ngiarohna y aw ta, âmo cha nama ku liata piepa a châ haw.

3Hmohrohneipa a pielyu theipa maih nama nie awpa châta a châ aw. Âhnalasi hrohpa ei cha piepa hawhna ei heta, hmo to zydua ei cha pie khai ei.

4Sa deikua cha, a thisaih chhaota nama nie awpa châ vei, thisaih cha hrona a châpa vâta.

5Nama hrona thisaih phuh ei cha lapa aw ei. Chyhsapa thisaih a palopa sa chô liata thisaih phuh la aw na ta, a unawhpa thisaih a palopa chyhsa chô liata thisaih phuh ei la aw.

6“Khazohpa ta chyhsapa cha, Ano kakuapa ta a taopa vâta, Chyhsapa thisaih a palopa maih cha, Chyhsapa lilaw ta ano thisaih a palo hra aw.

7“Nâmo deikua cha, chi pathlapa ta pôh u la, alei chô liata thata pôh u la, pôh lymâ muh vy,” tah ta.

8Chatawhcha Khazohpa ta Nôah nata a hnohta a ypa a sawchapawzy hnohta,

9“Pachâ teh u, keima tlai ta nama hnohta nata nama hnôhlâ ta nama pathlazy hnoh chhao ta biehrai ei tao.

10Nama hnohta a ypa hmohrohneipa zydua, pavawzy, sahrohzy nata nama hnohta a ypa râhsa balyh tawhta a vaw puapa zydua hnohta chhao biehrai tao na ta, alei liata sa to hnohta biehrai ei tao.

11Ei biehrai nama hnohta tao ha na ta, chavâta tipaua ta hrona a hneipa zydua pamua heih khao leipa aw ta, alei parao awpa ta tipaua vaw tlô heih khao aw vei,” tah ta.

12Khazohpa ta, “He he kei nata nâmo nata nama hnohta a ypa hmohrohneipa zydua likah liata, chhâ zydua châta ei biehrai ngiana a châ.

13Meihdo liata ei meisaku pazawhsa aw na ta, cha cha kei nata alei likah ta ei biehrai ngiana a châ aw.

14Alei chô liata meihdo paysa aw na ta, meihdo liata meisaku â vaw zawhna maihta,

15kei nata nâmo likah ta ei biehrai nata hmohrohneipa chi to hnohta ei biehrai cha ei thei tyh aw. Hmohrohneipa zydua pahlei khai awpa ta, tizy cha tipaua lâta a lie beih khao aw vei.

16Meihdo liata meisaku â vaw luahna maihta moh aw na ta, Khazohpa nata alei chô liata hmohrohneipa chi to likah chhâzaw biehrai cha ei thei tyh aw,” tah ta.

17Chatawhcha Khazohpa ta Nôah hnohta, “He he kei nata alei chô liata hmohrohneipa zydua likah liata ei biehrai ngiana a châ,” tah ta.

18Nôah sawchapawpa balyh tawhta a puapazy cha Semâ, Hamâ nata Zaphethâ zy ama châ. Hamâ cha Kâna paw a châ.

19He pathôhpazy he Nôah sawchapawzy châ ei ta, khizaw zydua liata a pahrâpa chyhsa zydua he âmo pathlazy ama châ khai.

20Nôah cha lyu taotuhpa châ ta, kre sadô tao ta.

21Kresawhti doh ta, pari ha ta, a poh o liata a zia pahru ta.

22Kâna paw Hamâ ta a paw a zia pahrupa cha hmô ta, khôtho lâ pua ta, a unawhpa panozy chho ta.

23Semâ nata Zaphethâ ta poh la ei ta, ama ngiatlâh liata paraipa ta ama hnôh lâta a sypa ta, ama paw thluahruana cha khu ei ta. Hnôh lâ a heina chôta amâ sypa vâta, ama paw thluahruana cha hmô veih ei.

24Nôah cha kresawhti a paripa tawhta a kaw thei ta, a sawchapaw seihnai viapa ta a chô liata a taozie cha pahno ta.

25Nôah ta, “Kâna cha chhiesapa ta y sala, A unawhzy châta seizy sei châ mawh sy!” tah ta.

26“Zehôvâh, Semâ Khazohpa cha reithaipa ta y sala, Kâna cha ama sei ta y mawh sy!

27Khazohpa ta Zaphethâ cha palai sala, Semâ poh ozy liata pahrâ sala, Kâna cha ama sei ta y mawh sy,” tah ta.

28Nôah cha tipaua khai tawhta kô 350 hroh ta.

29Nôah hro chhôh zydua cha kô 950 a châ. Chatawhcha Nôah cha thi ha ta.

← Chapter 8 Jump to: Chapter 10 →