Genesis 25

Chin (Mara Bible RV (BSI))

← Chapter 24 Jump to: Chapter 26 →

1Abarahâ ta lapinô hropa hnei ta, a moh Keturâ a châ.

2Ano ta Abarahâ châta Zimrâ, Zôkasâ, Medâ, Midia, Isbâ nata Suah zy sapa ta.

3Zôkasâ ta Sebâ nata Dedâ sa ta. Dedâ pathlazy cha Asahuri mo, Letusi mo nata Leumi mozy ama châ.

4Midia sawchapawzy cha Epha, Ephe, Hanô, Abidâ nata Eldâ zy ama châ. Cha zydua cha Keturâ pathlazy ama châ.

5Abarahâ ta a hneipa zydua Aisika pie ta.

6A nôtho sahlao sawchapawzy deikua cha kuhriazy pie ta, ano hro chhôh tlai ta a sawchapawpa Aisika yna tawhta nochhi râh lâ a pasiesa ha ei.

7Abarahâ hro chhôh kôzy cha, kô 175 a châ.

8Abarahâ cha a thlahpa pathlie ta, chhâ a palopa ta thi ta. Pawpipa a châna taihta hro pahâh ngaitapa ta hroh ta, a chiheihzy hnohta pahlyhpa ta y ha ta.

9A sawchapawpa Aisika nata Ismela zy ta Mamre tlô chy ta Hiti chyhsa Zôharâ sawchapawpa Epharaw lyu liata a ypa Mâkâpelâ lôpu liata ama pabu.

10Cha lyu cha Abarahâ ta Hiti mo liata a chaleipa lyu kha châ ta, cha liata Abarahâ nata a lapinô Sârâ cha pabupa a châ.

11Abarahâ a thi tawhta, Khazohpa ta a sawchapawpa Aisika cha byhnâ pie ta. Aisika cha Belahairô kiapâh liata pahrâ ta.

12Hezy he Sârâ seichanô Izi zuah Hâkarâ ta Abarahâ châta a sapa Abarahâ sawchapawpa Ismela pathlazy ama châ.

13Hezy he ama moh nata ama pathlazy yzie hawhta Ismela sawchapawzy moh a châ: Ismela sawchapaw uhtheipa cha Nebaiô châ ta, a pazipazy cha Kedâ, Adabe, Mibasâ,

14Mismâ, Dumâ, Mâsâ,

15Hâdâ, Temâ, Zetu, Nâphi nata Kedemâ zy ama châ.

16Chazy cha Ismela sawchapawzy châ ei ta, ama khih nata ama riehmozy zipa ta ama moh bipa châ ta, ama phopi yzie hawhta bei pahrawh hleinozy ama châ.

17Ismela hro chhôh kôzy cha, kô 137 a châ. Ismela cha a thlahpa pathlie ta, thi ta, a chiheihzy hnohta pahlyhpa ta y ha ta.

18A pathlazy cha Havilâ râh tawhta Izi râh daih lâta Surâ râh taihta pahrâ ei ta, Asuria râh taihta pahrâ hra ei ta, ama unawhzy nata a khakhaipa ta ama y lymâ.

19Hezy he Abarahâ sawchapawpa Aisika pathlazy ama châ: Abarahâ ta Aisika sa ta,

20Aisika cha Pâdâ-Aramia râh liata Aramia chyhsa Bethua sawchanô Rebekâ lapinô ta a hnei nota kô sypalihpa a châ. Rebekâ cha Aramia chyhsa Lâbâ sietanô a châ.

21A lapinô a choh hapa vâta Aisika ta Abeipa lâta thlahchhâ ta, Abeipa ta a hiana cha chyh-ei ta, a lapinô Rebekâ cha saw phaoh ta.

22A saw phaopazy cha a py chhôh liata a chatôh ei ta, Rebekâ ta, “Hmo phapa a châ tlôh khiah, khazia ma he hawhta ei y tly?” tah ta. Abeipa hiahri awpa ta sie ta.

23Abeipa ta a hnohta, “Na chhi chhôh liata râh miano y ta, Na py chhôh tawhta phopi miano a vaw pua aw; Phopi miakha cha ahropa hlâta a thatlô via aw ta, A uhthei viapa ta a seihnai viapa a chakao aw,” tah ta.

24Rebekâ cha a saw pi daihti vaw tlô ta, a chhi liata maphieh y ei ta.

25A pih tuapa cha phu saih ha ta, a pôhpa zydua ta poh hmi hawhpa hmi thihpa ta bie ta, a moh Esaw ama bi.

26Cha khai tawhta a ku ta Esaw phei ngavâhmaothy patuna chôta a nawhta vaw pih ta, a moh Zakaw bipa a châ. Rebekâ ta âmo a sa nota, Aisika cha kô sycharupa a châ.

27Hawtizy cha vaw laiseih ei ta, Esaw cha sakathaipa, râh a khiepa chyhsa châ ta, Zakaw cha chyhsa reih hluh leipa, poh o liata a pahrâpa a châ.

28Aisika cha Esaw sakapa a nie tyhpa vâta, Esaw cha dao kaw ta. Rebekâ deikua cha Zakaw dao via ta.

29Ei kha cha Zakaw ta abie pati a chho hai nota, Esaw cha râh lâ tawhta vaw tlô ta, a nodipa ta a thachhâ kaw ta.

30Zakaw hnohta, “Ei tha chhâ ngaita ta, ngiachhiepa ta abie saihpa pati na chhopa kha na paniesa teh” tah ta. Chavâta Esaw cha a moh Edômâ bipa a châ.

31Zakaw ta, “Sawchapaw uhtheipa na châna tovyuh na chaleisa ha tua teh,” tah ta.

32Esaw ta, “Moh teh, ei thi daihmâ hih, sawchapaw uhtheipa tovyuh cha ei châta khâpa a phahnai aw?” tah ta.

33Zakaw ta, “Bie nâ taih tua teh,” tah ta. Esaw ta Zakaw cha bie a taih ta, cha noh ta sawchapaw uhtheipa a châna tovyuh cha Zakaw hnohta zuah ha ta.

34Zakaw ta Esaw cha viahchhâ nata abie pati pie ta, niepa ta doh ta, thyu ta sie ha ta. Cha hawhna chata Esaw ta sawchapaw uhtheipa a châna tovyuh cha a pahlei haw.

← Chapter 24 Jump to: Chapter 26 →