Genesis 44

Chin (Mara Bible RV (BSI))

← Chapter 43 Jump to: Chapter 45 →

1Chatawhcha Zawsi ta a o avaotuhpa biepie ta, “Ama sykhaozy kha ama phao theipa hawh chyu ta sâh ta pabie la, ama tâkâ kha ama sykhao paka chyu liata soh la,

2ei tâkâ nyu kha ama seihnai chaipa sykhao paka liata, a sâh mâ tâkâ chhao khata khô mah y,” tah ta. Zawsi reipa hawhta tao ta.

3Khih a deipa nahta, chyhsazy cha ama alâzy chhaota pasiesa ei ta.

4Khih tawhta pua ei ta, lâhlapi ama sie hlâta, Zawsi ta a o avaotuhpa hnohta, “Thyu la, chyhsazy kha a kei chadai teh. Na pha ti ei ta, ama hnohta, ‘Khazia hmo phapa hmo chhiepa ta viari nama thô?

5Kha nyu kha ei zibeipa Kresawhti dona nata a pachaona nyu mah a châ tâh. Nama hmotaopa a pha lei ngaita,’ tah mah y,” tah ta.

6Âmo cha a kei pha nahta, cha biezy cha ama hnohta reih ta.

7Âmo ta a hnohta, “Khazia ei zibeipa ta cha hawhpa biezy cha a reih thlâh ha tly? Châ chakaotuhpazy he, cha hawhpa hmo a tao thlâh ha awpa chi châ ma pi.

8Eima sykhao paka liata tâkâ eima hmôpazy chhao kha, Kâna râh tawhta nâma lâta eima za phao pakhua hapa kha. Kheihta ma na zibeipa o liata tâkâ tlyma, ngôh tlyma eima paru thei aw?

9Châ chakaotuhpazy hry liana heta, cha hmo na hmôna chyhsa cha thi mawh sy. Keimo chhao ei zibeipa chakaotuhpa ta eima y aw,” tah ei ta.

10Ano ta, “Nama bie hawhta châ mawh sy. Cha hmo ei hmôna chyhsa cha nâ chakaotuhpa ta y tlai aw ta, ahropazy deikua cha thaileina a hnei leipa nama châ aw,” tah ta.

11Ama sykhaozy cha alei liata thlai pachhô ei ta, ama sykhao chyu pahy ei ta.

12Ama uhthei chaipa tawhta a thaopa ta, ama seihnai chaipa taihta tlua ta, nyu cha Benzami sykhao liata hmô ta.

13Chapata nahta, ama chysiazy hrie ei ta, ama alâ chyu liata ama hmozy khaih ei ta, khihpi lâ a lie ei ta.

14Zudâh nata a unawhzy cha Zawsi o kei tlô ei ta, ano cha o liata vaw y thlâh ha ta, a hmiakô liata alei liata a byu ei ta.

15Zawsi ta ama hnohta, “Khâpa hmo nama tao haw? Kei hawhpa chyhsa heta cha pachao chhao a thai tahpa pahno veih ei chi mâ?” tah ta.

16Zudâh ta, “Ei zibeipa hnohta khâpa eima cha chho aw? Khâpa eima reih aw? Kheihawhta ma eimâ reipasia thei aw? Khazohpa ta châ chakaotuhpazy moleina a hmô hapa a châ. Keimo chhao, a ku liata nyu ama hmôpa chhao, ei zibeipa chakaotuhpazy eima châ,” tah ta.

17Zawsi ta, “Cha hawh ngâsâ ta la tao aw va na. A ku liata nyu ama hmôpa deita he nâ chakaotuhpa ta a y aw. Nâmo cha thlalôhpa ta nama paw lâ sie muh vy,” tah ta.

18Zudâh ta Zawsi cha a kei hnia ta, “Hy ei zibeipa, nâ cha Phiraoh tlupa châ chi ta, ngiachhiepa ta ei zibeipa nah theina liata châ chakaotuhpa he bie kawh kha na pareisa la, châ chakaotuhpa chô liata na pathi rie ia khah sy.

19Ei zibeipa ta châ chakaotuhpazy he, ‘Paw nama hnei ma, unawh nama hnei ma?’ tahpa ta miah hiahri chi ta.

20Keimo ta ei zibeipa hnohta, ‘Paw hnei pi ta, ano cha pawpi kaw bâ ta, a pawpi tawhta a sapa unawh hawtipa pakha eima hnei. Ano unawhpa cha thi ha ta, ano nô ta a sapa liata ano deita hroh ta, a paw ta ano cha a dao ngaita,’ tahpa ta cha chho pi ta.

21Nâ ta châ chakaotuhpazy hnohta, ‘Ano cha ei hmô thei nawpa ta kei lâ a zâ chhi teh u,’ miah tah chi ta.

22Keimo ta ei zibeipa hnohta, ‘Hawtipa cha a paw siesai thei aw vei, a paw a siesai khiahta cha a paw cha a thi thlâh ha aw,’ cha tah pi ta.

23Nâ ta châ chakaotuhpazy hnohta, ‘Nama seihnai chaipa cha nama hnohta â zu hra vei khiahta cha, ei hmia hmô khao aw veih ei chi,’ miah tah chi ta.

24Châ chakaotuhpa ei paw kô eima tlô nahta, ei zibeipa biezy cha chho pi ta.

25Eima paw ta, ‘Sie heih u la, eima châta sâh a chyhta chhâ za chalei heih teh u,’ tah ta.

26Keimo ta, ‘Zu thei aw ma pi. Eima unawh seihnai chaipa eima hnohta â hlao hra khiahta deikua cha, eima zu heih aw. Eima unawh seihnai chaipa eima hnohta â hlao vei khiahta cha, cha chyhsa hmia hmô thei khao aw ma pi,’ tah pi ta.

27Châ chakaotuhpa ei paw ta eima hnohta, ‘Ei lapinô ta sawchapaw pano eina sapa tahpa nama pahno.

28Pakha cha kei tawhta sie ta, “Chaphie khaipa ta a y ha tlai cha zaw,” tah na ta, cha rakha tawhta ano cha hmô khao va na.

29Chavâta he pakhapa chhao he, kei tawhta a chhi u la, hmo pha leipa a zâ tyh pathlei khiahta cha, ei luh pawhpa he pachârôhpa ta Athihkhih lâ nama pasiesa aw,’ tah ta.

30Chavâta châ chakaotuhpa ei paw kô ei tlô tita, hawtipa he eima hnohta â hlao vei khiahta cha, a hrona cha hawtipa hrona nata khâchâ â zao hapa vâta,

31hawtipa he eima hnohta â hlao leipa a pahnopa nahta, a thi thlâh ha aw. Chatanachata châ chakaotuhpazy heta, châ chakaotuhpa eima paw luh pawhpa cha pachârôhpa ta Athihkhih lâ eima pasiesa aw.

32Châ chakaotuhpa heta ei paw hnohta, ‘Hawtipa he nâ lâ ei kaw chhi heih leipa khiahta cha, ei paw hmiakô liata chhâzaw ta a maoh ei phaoh aw,’ tahpa ta hawtipa a boh nawpa ta ei paw liata ei hrona ei sokhâh hapa a châ.

33Chavâta ngiachhiepa ta châ chakaotuhpa he hawtipa vyuhpa ta ei zibeipa chakaotuhpa ta na paysa la, hawtipa he cha a unawhzy hnohta rie paliesa mah y.

34Hawtipa ei hnohta a sie leipa khiahta cha, kheihta ma ei paw lâ ei khy ngâh aw? Ei paw chô liata chhiena a tlô awpa cha moh ngâh va na,” tah ta.

← Chapter 43 Jump to: Chapter 45 →