Genesis 20

Chin (Mara Bible RV (BSI))

← Chapter 19 Jump to: Chapter 21 →

1Cha tawhna chata Abarahâ cha Neke râh lâ sie ta, Kâdesâ nata Surâ likawh liata pahrâ ta. Kerâ khih liata bohpi leipa y hra ta.

2Abarahâ ta a lapinô Sârâ cha, “Ei sietanô na a châ,” tah ta. Chavâta Kerâ bei Abimele ta chyhsa tuah ta, Sârâ cha lapinô ta hnei ta.

3Châhrasala Khazohpa ta Abimele hnohta zâ ta a mâ lâta a vaw luah ta, a hnohta, “Pachâ teh, lapinô ta na hneipa chanô vâna khata na thi aw. Ano kha chyhsa lapinô a châ,” tah ta.

4Cha nona chata Abimele ta chanô cha a hnia mâh vei. Abimele ta, “Abeipa, phopi siapa na pahleipadia thlâh ha aw ma?

5Ano tlai ta, ‘Ei sietanô na a châ’ tah vei ma? Chanô chhao ta, ‘Ei rilâhpa na a châ’ tah hra vei ma? Palôh dopa nata ku pathaihpa ta he hmo he ei taopa a châ,” tah ta.

6Khazohpa ta a mâ lâta, “Â do na, palôh dopa ta kha hmo kha na tao tahpa ei pahno. Chavâta ei chô liata hmo na parao lei nawpa ta, keima tlai ta cha pakhâ na ta, ano na hria awpa ei cha pasai leipa a châ.

7Chavâta tahmâ chyhsa lapinô kha pie pakhua ha mah y. A vahpa kha hrohsopa châ ta, thlah cha chhâpa aw ta, na hroh aw. Na pie pakhua leipa khiahta deikua cha, nâ nata na hneipa zydua chhaota na thi tlai aw tahpa pahno mah y,” tah ta.

8Abimele cha mydi kari ta thyu ta, a chakaotuhpa zydua awpakhy ta, cha bie zydua cha ama theina liata reih ta. Chyhsazy cha chi ngaita ei ta.

9Abimele ta Abarahâ cha aw ta, a hnohta, “Khâpa hmo ma eima chô liata na tao? Khâpa kyh liata ma na chô liata hmo parao na ta, moleina rarôh ypa he kei nata ei râh chô liata na vaw patlôsa tly? Tao lei awpa hmo ei chô liata na tao hih,” tah ta.

10Abimele ta Abarahâ cha hiahri heih ta, “Khâpa vâta ma he hawhpa hmo he na tao?” tah ta.

11Abarahâ ta, “‘He su liata Khazohpa china rai y leipa ta, ei lapinô vâta eina thie aw ei’ tahpa ei pachâpa vâta a châ.

12Cha thota, ano he ei sietanô tlai a châ. Ei paw sawchanô châ ta, ei nô sawchanô deikua châ vei. Ano cha lapinô ta ei hnei.

13Khazohpa ta ei paw o tawhta eina paviavisa nona khata, a hnohta, ‘Hetana heta ei chôta na kyhpachâna na palâsa aw. Eima tlôna su lia maihta, “Ei rilâhpa na a châ,” eina tah lymâ aw chi,’ tahpa ta ei vaw chho hapa tlai a châ,” tah ta.

14Abimele ta mietakuzy, viahchaozy, seichapawzy nata seichanôzy a chhi ta, Abarahâ hnohta pie ta, a lapinô Sârâ chhao a pie pakhua haw.

15Abimele ta, “Moh tua, na hmiakô liata ei râh a y hih. Na khona su liata pahrâ mah y,” tah ta.

16Sârâ hnohta, “Moh tua, na rilâhpa hnohta tâkâ tlaw sâh kha ei pie ha hih. He he na hnohta a ypa zydua mohmô liata na thaichâna palâsana a châ. Chyhsa zydua mohmô ta tlokhuh thai pachâsapa na châ haw,” tah ta.

17Abarahâ ta Khazohpa lâ thlahchhâ ta, Khazohpa ta Abimele nata a lapinô nata a seichanôzy cha patlâh heih ta, chatanachata sawzy sa heih ei ta.

18Abarahâ lapinô Sârâ vâta Abeipa ta Abimele o liata chanô chhi zydua a khaw khai hapa a châ.

← Chapter 19 Jump to: Chapter 21 →