Genesis 42

Chin (Mara Bible RV (BSI))

← Chapter 41 Jump to: Chapter 43 →

1Zakaw cha Izi râh liata sâh a y tahpa a pahno nahta, a sawchapawzy hnohta, “Khazia namâ mo thlâh haw?” tah ta.

2“Pachâ teh u, Izi râh liata sâh a y tahpa ei thei. Cha lâ cha zu u la, cha liata eima châta sâh za chalei teh u. Chatanachata thi leipa aw pi ta, eima hroh aw,” tah ta.

3Chatanachata Zawsi unawh pahrawhzy cha, sâh chalei awpa ta Izi râh lâ zu ei ta.

4Zawsi pilâhpa Benzami deikua cha, Zakaw ta, “Hmo pha leipa â tyh pathlei aw na,” tah ta, a unawhzy hnohta pasiesa vei.

5Kâna râh liata chakâhna a tlôpa vâta, Izarei sawchapawzy cha, sâh chalei awpa ta a siepazy hry liata sie hra ei ta.

6Zawsi cha Izi râh ryureituhpa châ ta, cha râh liata chyhsa zydua hnohta sâh a zuahtuhpa a châ. Zawsi unawhzy cha za tlô ei ta, ama hmia alei lâ a bôhpa ta ano cha a naoh ei ta.

7Zawsi ta a unawhzy a hmô nahta, âmo cha pahno thlâh ha ta, châhrasala hmia pahno leipa hawhta ama chô liata a tao ta, reih chahrâhpa ta âmo cha bie a chho ta. Ama hnohta, “Khataih tawhta a vypa ma nama châ?” tah ta. Âmo ta, “Sâh chalei awpa ta Kâna râh tawhta â zupa eima châ,” tah ei ta.

8Zawsi ta a unawhzy cha pahno thlâh ha ta, âmo deikua ta ano cha pahno khao veih ei.

9Zawsi ta âmo kyh liata mâ a sapazy kha a kaw thei heih ta, ama hnohta, “Mohparutuhpazy nama châ. Râh ruapa mo awpa ta namâ vy,” tah ta.

10Âmo ta a hnohta, “Châ vei, ei zibeipa, châ chakaotuhpazy he sâh chalei awpa ta a vypa eima châ.

11Eima zydua heta chyhsa pakha saw châ pi ta, chyhsa dopa eima châ. Châ chakaotuhpazy he mohparutuhpazy châ ma pi,” tah ei ta.

12Ano ta ama hnohta, “Châ vei, râh ruapa mo awpa ta a vypa tlai nama châ,” tah ta.

13Âmo ta, “Keimo, châ chakaotuhpazy pi he, unawh pahrawh hleino châ pi ta, Kâna râh liata a ypa chyhsa pakha saw eima châ. Eima seihnai chaipa cha tahmâ eima paw hnohta y ta, pakha deikua cha y khao vei,” tah ei ta.

14Zawsi ta ama hnohta, “Nama hnohta ei reipa hawh tlai kha a châ, mohparutuhpazy nama châ.

15Hetana heta pasiapa nama châ aw: Nama seihnai chaipa cha he lâ namâ zâ chhi vei khiahta cha, Phiraoh hrona reipa ta ei reih, he su tawhta pua aw veih ei chi.

16Nâmo liata biedopa a y ma, y vei ma, nama bie pasia nawpa ta, he liata patâhpa ta nama y chhôh ta, nama hry liata pakha tuah u la, nama unawhpa cha kaw dy mawh sy. Cha hawhta nama tao vei khiahta cha, Phiraoh hrona reipa ta ei reih, mohparutuhpazy nama châ tlai, ei cha tah aw ei,” tah ta.

17Ama zydua ta noh thôh patâh ta.

18A noh thôhna noh liata, Zawsi ta ama hnohta, “Khazohpa chi tlôh na ta, chavâta hetana heta tao u la nama hroh aw:

19Chyhsa dopa nama châ khiahta cha, nama unawh hry liata pakha namâ tâhna liana heta a tâh chy aw ta, ahropazy deikua cha sie aw ei chi ta, nama chhôhkhazy chakâhpa châta sâh cha phaoh aw ei chi ta,

20nama unawh seihnai chaipa cha kei lâ nama zâ chhi aw. Chatanachata nama bie cha pasiapa châ aw ta, thi aw veih ei chi,” tah ta. Cha hawhna chata tao ei ta.

21Âmo nata âmo a chhohia ei ta, “Eima unawhpa chô liata eima hmotaopa vâta thailei eima châ ha tlai he zaw. Ngiachhie miah â haw ngâ nota a palôh nôpozie kha hmô thlâh ha pi ta, châhrasala eima nathlie khoh leipa kha. Chavâta he nôpona heta miah a tla thlu hih,” tah ei ta.

22Rubena ta âmo cha a chhy ta, “Hawtipa chô liata hmo parao lei awpa ta cha chho veih ei na mâ? Nama nathlie khoh leipa kha. Chavâta a thisaih phuh lapa a châ ha tlai hih,” tah ta.

23Ama likah liata reih palietuhpa a ypa vâta, ama biereipa cha Zawsi ta a thei tahpa pahno leipa ei ta.

24Zawsi cha âmo tawhta pua ta, arulâta kei cha ta. Âmo lâ a vy heih ta, âmo cha bie a chho ta. Simeôna cha ama hry tawhta ânano ta a chhi ta, ama mohmô ta chahry ta.

25Zawsi ta ama sykhaozy biena taih sâh ryhpa awpa nata ama tâkâzy ama sykhao liata khôpa khai awpa nata lâpi liata ama nie awpazy pie awpa ta biepie ta. Cha hawhna chata taopa ei ta.

26Ama sâh cha ama alâzy paphaosa ei ta, sie ha ei ta.

27Riebu liata ama hry liata pakha ta alâ lao pie awpa ta a sykhao pahy ta, a tâkâ kha a sykhao paka liata a vaw y thlâh hapa hmô ta.

28A unawhzy hnohta, “Ei tâkâ eina pakua ha ei, moh tua u, ei sykhao paka liata a y thlâh hih,” tah ta. Thata a pahlaw ei ta, a chalyupa ta a moh chyu ei ta, “Eima chô liata Khazohpa hmotaopa he khâpa ma a châ tly?” tah ei ta.

29Kâna râh liata ama paw Zakaw kô ama tlô nahta, ama chô liata hmo a tlôpa zydua cha chho ei ta, a hnohta

30“Râh ryureituhpa chyhsa ta reih chahrâh kawpa ta bie miah a chho ta, râh mohparutuhpa ta miah rao ta.

31Keimo ta a hnohta, ‘Chyhsa dopa eima châ, mohparutuhpa châ cheita ma pi.

32Unawh pahrawh hleino châ pi ta, eima paw sawchapawzy eima châ khai. Pakha deikua cha y khao vei, eima seihnai chaipa cha tahmâ Kâna râh liata eima paw hnohta a y,’ tah pi ta.

33Râh ryureituhpa chyhsa chata eima hnohta, ‘Hetana heta chyhsa dopa nama châ tahpa ei pahno aw: Nama unawh pakha ei hnohta siesai u la, nama chhôhkha chakâhpazy châta sâh phaoh u la, sie muh vy.

34Nama unawh seihnai chaipa cha kei lâ a zâ chhi aw ei chi ta, chatanachata mohparutuhpa châ leipa ei chi ta, chyhsa dopa tlai nama châ tahpa ei pahno aw. Chatawhcha nama unawhpa he cha pie heih aw ei na ta, he râh liata sôh zy nama palie aw,’ miah a tah,” tah ei ta.

35Ama sykhao liata sâhzy cha bô ei ta, ama tâkâ sô chyu cha ama sykhao liata vaw y thlâh ha ta. Tâkâ sôzy ama hmô nahta, âmo chhao, ama paw chhao, chi ngaita ei ta.

36Ama paw Zakaw ta ama hnohta, “Sawzy pahlei awpa ta eina tao lymâ ei chi he. Zawsi y khao leipa ta, Simeôna chhao y khao hra vei. Tahmâ Benzami taih chhao a chhi a chhuah heih ei chi ta, hmo pha leipa sai ta eina tla thlu lymâ,” tah ta.

37Rubena ta a paw hnohta, “Benzami he nâ lâ ei vaw liekhei heih leipa khiahta cha, ei sawchapaw panozy he thie lah vâ chi. Ano cha ei ku liata soh la, nâ lâ ei vaw liekhei heih aw,” tah ta.

38Châhrasala Zakaw ta, “Ei sawchapawpa he nama hnohta a zu aw vei, a unawhpa thi ha ta, ano deita he hroh ta, nama siena lâpi liata hmo pha leipa a zâ tyh pathlei khiahta cha, ei luh pawhpa he pachârôhpa ta Athihkhih lâ nama pasiesa aw,” tah ta.

← Chapter 41 Jump to: Chapter 43 →