Proverbs 1

Chin (Mara Bible RV (BSI))

Jump to: Chapter 2 →

1He he Dâvi sawchapawpa, Izarei bei Sawlawmaw biesozy ta â chhuahpa a châ:

2Sona nata pachuna pahno awpa ta, Pahnona biezy liata novâhna hnei awpa ta,

3Sona, siana, adona nata akhongâhna kyh zy liata Pachuna dao awpa ta;

4Sona a phahlapazy hnohta sona pie awpa ta, Thyutliapazy hnohta pahnona nata hmia nata hnôh sai thaina pie awpa ta;

5Asopazy ta theipa ta ama pahnona a pôh via nawpa ta, Novâhpazy ta pasopakâna bie ama dao thei nawpa ta,

6Bieso nata pakhona bie liata novâhna hnei awpa ta, Asopazy bie nata ama bie khiakhipazy liata novâhna hnei awpa ta.

7Abeipa china cha novâhna athaona châ ta, Ahrupazy ta sona nata pachuna ama mohnao tyh.

8Ei sawchapawpa y, na paw chhoreina bie nathlie la, Na nô pachuna bie a heihsai khah y;

9Na luh châta pawpi pachhih a ngia ngaitapa châ ei ta, Na rao châta pachhihzy ama châ.

10Ei sawchapawpa y, moleipazy ta ama cha reipasao khiahta cha, A pyh khah y.

11“Eima hnohta a vy la, Thisaih palo awpa ta a byh sih la, A chhâpa y leipa ta paraona a hnei leipazy a byh ei suh u.

12Athihkhih hawhta a hrohpa ta âmo cha palâ sih la, Khaohtlô liata a tlapazy hawhta ama pôhpa dua ta palâ ei suh u.

13Hmo sôhpazy hmô aw pi ta, Hraona sôh ta eima o eima pabie aw.

14Eima hry liata miah a hlao hra la, Tâkâ sahria miakha eimâ hly aw,” Tahpa ta ama cha reipasao tita,

15Ei sawchapawpa y, ama lâpi a chhih hra leipa la, Ama lâpizy tawhta na phei a sysai ha mah y.

16Moleina lâta ama pheizy a râ ta, Thisaih palo awpa ta amâ para tyh.

17Pavaw mohmô ta sao paraipa cha, Hraoleipa ta paraipa a châ.

18He chyhsazy heta âmo thisaih a byh ei ta, Âmo hrona amâ byh.

19He he avyuhna ta athôhna a chadaipa karâypa chyhsa zydua chhâna a châ, Avyuhna ta hneipa sôh chata a hneituhpazy hrona a pahlei tyh.

20Sona cha khiliah liata a paropa ta awh ta, Sôhdaoh suzy liata a aony a pasâh.

21Khiliah lôhawh chaina su liata awh ta, Khihpi thokhy chhikaozy liata hetana heta a tah:

22“Nâmo sona a phahlapazy saih u, So leipa ta ypa he khachâ ma nama pasô chy aw tly? Pasipasawh a thaipazy ta khachâ ma chyhsa pasipasawhpa paphasa aw ei ta, Ahrupazy ta khachâ ma pahnona amâ hao aw tly?

23Ei chhoreina lâ namâ vaw heih khiahta cha, Pachâ teh u, ei thlahpa cha hry aw ei na ta, Ei biezy ei cha pahnosa aw ei.

24Cha aw ei na ta, Khoh leipa ei chi ta; Ei ku pazawh na ta, Ahy hmahta uasa leipa ei chi ta;

25Ei ryhraopa zydua hraoleipa ta tao ei chi ta, Ei chhoreina rai namâ pyh khoh leipa vâta,

26Kei chhao ta chhiena namâ tyhna liata cha pahneisao aw ei na ta, Hmo chichhihpa ta a cha tla thlu ti ei ta ei cha pahneisao aw ei.

27Hmo chichhihpa ta thlihpipa hawhta a cha chhei ti ei ta, Chhiena ta khisô hawhta a châ pahieh thlu ti ei ta, Nôpona nata pachârôhna a cha vaw tlô thlu ti ei ta, Ei cha pahneisao aw ei.

28Cha tina chata na pado aw ei ta, Châhrasala a chhy aw veih ei na; Thata na tlua awh ei ta, Châhrasala na hmô aw veih ei.

29Pahnona a hao ei ta, Abeipa china a tlyh leipa ei ta,

30Ei ryhraopa miakha hmahta khoh leipa ei ta, Ei chhoreina zydua ama papeisa leipa vâta,

31Âmo yzie thei nie aw ei ta, Âmo hmotaopazy ta lôhrâ amâ patlô aw.

32Sona a phahlapazy cha lâpi ama tleisaina ta âmo cha thie tyh ta, Ahrupazy chhao âmo hruna ta a pahleipadia tyh ei.

33Ei bie a nathlietuhpa deikua cha â bohpa ta y aw ta, Chhiena chi leipa aw ta, Chhôhmohpa ta a y aw.”

Jump to: Chapter 2 →