Proverbs 2

Chin (Mara Bible RV (BSI))

← Chapter 1 Jump to: Chapter 3 →

1Ei sawchapawpa y, ei biezy a pyhpa ta, Ei biepiepazy paso pha la;

2Sona lâ na nah pachôhpa ta, Novâhna lâ na palôh pahei la;

3Chatatly, pahno thaina padopa ta, Novâhna hnei awpa ta thata awh la,

4Sona cha tâkâ tluapa hawhta tlua la, Ryubyh nyupa tluapa hawhta na tlua khiahta cha,

5Abeipa china kyh liata na novâh aw ta, Khazohpa pahnona nâ huah aw.

6Sona cha Abeipa piepa châ ta, A pakah tawhta pahnona nata novâhna a pua.

7Chyhsa dopa châta sona patapa pachôpa ta, Ngâchhihpa ta a ypazy châta ano cha vyhphao a châ.

8Adona lâpizy vaih ta, A mopathaihpazy hrozie a vaih tyh.

9Chatanachata siana nata adona kyh liata na novâh aw ta, Akhongâhna nata lâpi phapa to kyh na no a vâh aw.

10Sona cha na palôh chhôh liata a ngia aw ta, Pahnona cha na hro châta kho â chhih kaw aw.

11Pahnona ta cha mokhâh aw ta, Novâhna ta a cha vaih aw.

12Moleipa lâpi tawhta cha pachha aw ta, Chyhsa paviasana bie a reihpazy tawhta a cha pachha aw.

13Âmo zohna lâpizy a chhih awpa ta, Siana lâpizy a tleisai hapa ama châ.

14Moleina hmo taopa liata ama thapha ta, Molei chochhiena a lypazy ama châ.

15Ama lâpi a kokaliepazy châ ei ta, Chyhsa dôvei khohna hro a hneipazy ama châ.

16Sona ta khichhai chanô tawhta cha pachha aw ta, Chihropa chanô reikah thaina tawhta a cha pachha aw.

17Cha chanô cha a thyutlia nota â kaolâhpa siesai ta, A Khazohpa biehrai a my hapa a châ.

18A o cha thina liata a pamôh ta, Athipazy lâta a lâpizy a sie.

19Ano a pangai hapa cha ahy hmah kua heih khao leipa ei ta, Hrona lâpizy hmô heih thei khao veih ei.

20Chavâta lâpi phapa a chhih la, Siana lâpi liata sie mah y.

21Adopazy cha râh liata pahrâ aw ei ta, Phapakipazy cha râh liata ama y thlâh ha aw.

22Hmoparaopazy deikua cha râh tawhta chhawh pathlahpa châ aw ei ta, Piehpiepazy cha râh tawhta phiapa ama châ aw.

← Chapter 1 Jump to: Chapter 3 →