Proverbs 6

Chin (Mara Bible RV (BSI))

← Chapter 5 Jump to: Chapter 7 →

1Ei sawchapawpa y, na vaih châta sôhkâ sopa la, Khichhaipa vyuhpa ta nâ dua khiahta cha,

2Na pakah biezy liata a ao chi ta, Na pakah biezy ta a cha patu hapa a châ.

3Ei sawchapawpa y, Na vaih ku liata y ha chi ta, Chavâta he he tao la, Nâmasasyh ta a pachha mah y. A chatliepa ta vawh la, A panawh la, Na vaih cha a haw mah y.

4Na mo a mô leipa sala, Na mo vo tla-uah hra khah sy.

5Sakathaipa tawhta sakhi â bohpa hawhta, Nâmasasyh ta a pachha la; Khoheih chôtuhpa ku tawhta pavaw â bohpa hawhta, Nâmasasyh ta a pachha mah y.

6Nâ thathipa, hloia lâ vawh la, A hroziezy moh la, so ha mah y.

7Hloia ta abei hnei leipa ta, Hyutuhpa nata ryureituhpa hnei hra vei.

8Nopi daihti ta nie awpa pachô ta, Sâh hria daihti ta nie awpa a pahmaoh tyh

9Hy thathipa, khachâ ma a zia aw chi ta, Khati ta ma nâ môpa tawhta na thyu aw?

10Buakha a môpa ta, Buakha tla-uah chi ta, Buakha ku chakhipa ta nâ pahâ chhôh ta;

11Dyhchhiena ta hraotuhpa hawhta cha vaw tlô thlu aw ta, Phahlana ta chaihrai chhaopa chyhsa hawhta a cha vaw tlô thlu aw.

12Chyhsa dyutlai leipa, chyhsa moleipa cha, Pakah hloh chhaota â khie tyh.

13A mo ta mopasihpa ta, A phei ta hria ta, A kudy ta a dy tyh.

14Chyhsa parao khohna palôh phaopa ta, Hmo chhiepa tao a chhuah ta, Achhaihna chi a tu lymâ.

15Chavâta chhiena ta eikhapi ta vaw tlô thlupa ta, Sôkha ta paraopa châ aw ta, Taopathi heih theipa châ khao aw vei.

16Abeipa â haopa hmo miacharu y ta, A châta pasichhihpa miasari a y.

17Chazy cha, â khotlâhpa mokhaohzy, Paleih haihthaipa, Paraona a hnei leipa thisaih a palopa kuzy,

18Hmo pha leipa tao a chhuahpa palôh, Paraona lâ a râpa ngiahly thatlôpa,

19Haipa hu a sopa pahnokheituh pakheipa nata Unawhzy achhaihna chi tutuhpazy ama châ.

20Ei sawchapawpa y, na paw biepiepa a ngiah la, Na nô pachuna a heihsai khah y.

21Na palôh liata khâ châh sala, Na rao liata khâ a ao mah y.

22Na sie nota cha chhihthapa ta, Nâ zia tita cha vaih aw ei ta, Na thyu tita bie ama châ chho aw.

23Biepiepa cha meiôh châ ta, Pachuna cha khaihna châ ta, Chhoreina rana cha hrona lâpi a châ.

24Chanô moleipa tawhta cha vaih aw ta, Apheinô paleih pahniapa tawhta a cha vaih aw.

25A chhithaina cha na palôh ta tlaichhai leipa sala, A mopadei ta a cha patu awpa a pasaih khah y.

26Viahchhâ tlâ kha ta âzuahnô chalei theipa châ ta, Vahpa chhaopa chanô a châna a hro zachhihna deikua a pahlei aw.

27Chyhsa ta a chachôhna liata mei soh sala, A chysiazy kâ leipa ta a y aw ma?

28Chyhsa ta meihei iapa chô liata sie sala, A pheizy u leipa ta a y aw ma?

29A vaih lapinô lâ a ngiapa chhao, cha hawhta y hra aw ta, Cha chanô a hriapa maih cha hrie leipa ta pua aw veih ei.

30Parutuhpa ta a nodipa papai nawpa ta a paru khiahta cha, Chyhsazy ta parutuhpa cha mohnao hlei veih ei;

31Patupa a châ khiahta deikua cha, A lie sari ta a thô awpa châ ta, A hneipa zydua a pie khai awpa a châ.

32Chanô liata a pheipa cha, Hmo a pahno thai leipa châ ta; Cha hawhpa hmo a taopa cha, Anosasyh â paraopa a châ.

33Hmaphaohpa nata maophyuhpa ta y aw ta, A nohzaona a hnao pathaih theipa châ aw vei.

34Chanô vahpa cha hiatliana vâta a hie thata hâ aw ta, Phuh a lana noh liata ngiachhiena hnei aw vei.

35Achatlaina sôh a pyh leipa aw ta, Kuhria hluhpi pie hra la, A palôh châ hlei aw vei.

← Chapter 5 Jump to: Chapter 7 →