Proverbs 9

Chin (Mara Bible RV (BSI))

← Chapter 8 Jump to: Chapter 10 →

1Sonô ta a o sa ta, Otôh tôh sari a bô.

2A sahrohzy thiepa ta, A kresawhtizy pahlao ta, A tlâhkhai â chhuanoh.

3Khihpi su sâh chaipazy tawhta awh awpa ta, A laihsazy tuah ta,

4“Sona a phahlapa cha he lâ a vy mawh sy,” tah ta; Pahnona a phahlapa hnohta,

5“A vy la, ei viahchhâ nie la, Ei kresawhti pahlao chiehpa he doh mah y.

6Hruna hrozy siesaipa ta hrona hnei la, Novâhna lâpi a chhih mah y,” a tah.

7Chyhsa a khotlâhpazy a chhoreipa cha, Ano hmâchhâh taochhiena a tyh ta; Chyhsa moleipa a rapa chhao, Ano hmâchhâh hmah a phaoh tyh.

8Akhotlâh kawpa chyhsa la ra hlei khah y, A châ hao pathlei aw na; Chyhsa sopa ra la, Kyh a cha pachâ aw.

9Chyhsa sopa cha pachu la, So via rili aw ta; Chyhsa siapa chhao na pachu khiahta cha, A thaina a pôh rili aw.

10Abeipa china cha sona athaona châ ta, Mo Pathaihpa pahnona cha novâhna a châ.

11Na nohzy pasisa aw na ta, Na hro chhôh kôzy ei baichha aw.

12Na vaw sopa chhao ta, Nâma châta soh chi ta; Nâ khotlâh khiahta cha, Nâ pyly ta pasa na tao aw.

13Chanô hrupa cha a pyury ru kaw ta, Sona a phahla ta, khâpa hmah pahno vei.

14A o ochhi liata a tyuh tyh ta, Khihpi su sâh chaipazy liata dyuchhai liata chhao a tyuh tyh ta,

15Ama lâpi liata a sie haipa, Ano a chapiapa maih aw ta,

16“Sona a phahlapa cha he lâ a vy mawh sy!” tah ta. Pahnona a phahlapa hnohta,

17“Parupa ti cha thlôh ta, Arulâta viahchhâ niepa chhao a pahâh ngaita,” a tah.

18Châhrasala ano a pangaipa ta, Athihpazy cha liata y ei ta, A chyhsa hruapazy chhao, Athihkhih a thu chaipa liata a ypa ama châpa pahno vei.

← Chapter 8 Jump to: Chapter 10 →