Proverbs 3

Chin (Mara Bible RV (BSI))

← Chapter 2 Jump to: Chapter 4 →

1Ei sawchapawpa y, ei pachuna my leipa la, Na palôh ta ei biepiepazy a vao thlâh ha mah y.

2Hro pasina cha pie aw ta, Kô hluhpi cha pahrosapa ta, Thlalôhna a cha pie aw.

3Ngâchhihna nata biehmeiseihpa ta châ heihsai khah sy; Na rao liata chazei la, Na palôh lôphiapa liata roh ha mah y.

4Chatanachata Khazohpa nata chyhsa mohmô liata, Khokheina nata moh phana na hmô aw.

5Na pathipalôh tlokhuh ta Abeipa ngâ la, Nâma pahnona liata a pahnieh khah y.

6Na lâpi zydua ano pahnosa lymâ la, Na lâpizy a patlâsa lymâ aw.

7Nâma pachâ ta a pasosa leipa la, Abeipa chi la, Moleina siesai mah y.

8Cha cha na sapa châta tlâhna châ aw ta, Na rupazy châta thohna a châ aw.

9Na hneina ta Abeipa palyupalih la, Na kôvei a daih tuachaipa zydua ta Abeipa cha palyupalih mah y.

10Chatanachata na sawvâzy cha bie pakhô aw ta, Na kresawhti saohna lô beihzy cha, Kresawhti thiehpa ta a khô pathlah aw.

11Ei sawchapawpa y, Abeipa chhoreina cha, Papeisa leipa ta y leipa la; A cha ra tita, Na palôh pasa khah sy.

12Paw ta sawchapaw â lypa a rapa hawhta, Abeipa chhao ta a kyhpachâpa cha a ra tyh.

13Sona a hmôpa cha nohlaopa châ ta, Novâhna a hneipa chhao nohlaopa a châ hra.

14Sona tawhta athôhna cha tâkâ tawhta athôhna hlâta pha via ta, Sona papôhpa cha ngôh papôhpa hlâta a pha via.

15Sona cha lôsôhpa hlâta sôh via ta, Na kho kawpa hmo kheihawhpa nata hmah Pakhopâ thei rimâ awpa châ vei.

16A ku chachâh lâta hro pasina y ta, A chavei lâta hneirôna nata zachhihna a y.

17A lâpizy cha lâpi khochhihpazy châ ta, A lâthlôh zydua cha thlalôhna lâthlôh a châ.

18Ano â patupa maih châta hrona tho châ ta, Â ipa ta ano a patupazy cha thaphapa ta ama y.

19Abeipa ta sona ta alei he bô ta, Novâhna ta avâzy khi a padua.

20A pahnona ta ti athupazy pasa ta, Meihdozy ta diati ama patlasa.

21Ei sawchapawpa y, hezy he mopakhô leipa la, Sona patapa nata pahnona zy chhy lymâ mah y.

22Na hro châta hrona châ aw ta, Na rao châta atobina a châ aw.

23Chatanachata na lâpi liata â bohpa ta sie aw chi ta, Na phei a chapia aw vei.

24Nâ zia tita chi leipa aw chi ta, A zia aw chi ta, mokuh pahâh kawpa ta nâ mô aw.

25Eikhapi ta chichhihpa a vaw tlô awpa a ngiaroh leipa la, Hmoparaopazy chô liata chhiena a vaw tlô awpa chhao a ngiaroh khah y.

26Abeipa cha na riahphana châ aw ta, Na phei khoheih liata a ao awpa tawhta a vaih aw.

27Tao theina na hnei khiahta cha, A to tlâhpazy châta hmo phapa pakhâ khah y.

28Na hnei thlâh hapa tlai ta, na vaih hnohta, “A di chy la, a vy heih mah y, Mylâ ei cha pie aw,” Na tah awpa châ vei.

29Cha ngâ ta na kiapâh liata a pahrâpa, Na opa chô liata hmo chhiepa tao a chhuah khah y.

30Châ pasasa leipa chyhsa cha, A chhâpa y leipa ta a dyuh khah y.

31Thachahra a hmâhpa chyhsa cha uahva leipa la, A lâpi kheihawhpa hmahta a tlyh khah y.

32Palôh a kopa cha Abeipa châta pasichhihpa châ ta, Palôh patlâpazy deikua cha Abeipa ngâpa chyhsazy ama châ.

33Abeipa chhiesana cha hmoparaopa o liata y ta, Mosiapa pahrâna deikua cha byhnâ a pie tyh.

34Mohnaotuhpazy cha mohnao ta, Areisipazy chô liata deikua ngiachhiena a palâsa tyh.

35Asopazy cha palyupalihna ryu to aw ei ta, Ahrupazy deikua cha nohzaona ama to aw.

← Chapter 2 Jump to: Chapter 4 →