Proverbs 14

Chin (Mara Bible RV (BSI))

← Chapter 13 Jump to: Chapter 15 →

1Chanô sopa cha a o sa ta, Chanô hrupa deikua cha ano ku tlai ta a o a parao.

2Â dopa ta a hrohpa cha Abeipa a chipa châ ta, Hrozie akopa deikua cha Abeipa a mohnaopa a châ.

3Ahrupa pakah liata apalaina sôsi y ta, Asopazy hmao deikua cha âmo a pabohsa tyh.

4Viahchao tôhpazy y leina liata cha sachâki pathaih ta, Châhrasala kôvei phana cha viahchao tôhpa thatlôna vâta a châ.

5Pahnokheituhpa ngâchhihpa cha haipa bie reih leipa aw ta, Pahnokheituhpa pakheipa deikua cha haipa biezy a papua tyh.

6Chyhsa a mohnaopa cha sona tlua ta hmô leipa ta, Novâhpa deikua cha a naosiapa ta a pahnona a hmô thei.

7Ahrupa cha a hlasai mah y, Ano tawhta nâ chu awpa biesozy y vei.

8Asopa sona cha a sie nawpa lâpi pahnosa ta, Ahrupazy hruna deikua cha dôveina a châ.

9Ahrupazy cha thaileichâna hlâna pahneisao ei ta, Adopazy deikua cha ngiahthaina liata amâ ly tyh.

10Palôh cha ano ngâlâh ta a pasana pahno ta, Â lyna liata chhao khôtho chyhsa a lykheipa y veih ei.

11Moleipa o cha paraopa châ aw ta, Adopa poh o deikua cha vânoh topa ta a y aw.

12Chyhsapa pachâ ta lâpi dopa a lyupa y ta, A chhâna lâta deikua thina lâpi a châ tyh.

13Pahneina liata chhao palôh pasana y thei ta, Thaphana chhao a chhâna lâta cha pachârôhna lâta a pua thei.

14Palôh hnôhsypa cha a hrozie theizy ta pabiepa châ aw ta, Chyhsa phapa chhao a hrozie theizy ta pabiepa a châ aw.

15Sona a phahlapa cha bie to zo ta, Chyhsa sopa deikua cha a lâpizy a pachâ tyh.

16Asopa cha a chado kaw ta, Hmo pha leipa tao vei; Ahrupa deikua cha a riah pha kaw ta, Pachâ tua leipa ta hmo a tao tyh.

17Pathi pachhohpa cha hru kawpa ta hmo tao ta, Hmo chhiepa tao â chhuahpa chhao a haopa a châ tyh.

18Sona a phahlapazy cha hruna ryu to ei ta, Asopazy deikua cha pahnona lakho pakhopa ama châ.

19Chyhsa chhiepazy cha chyhsa phapazy hmiakô liata panawhsapa châ ei ta, Moleipazy chhao mosiapazy chhikao liata panawhsapa ama châ.

20Sipasapa cha a vaih chhao ta a hao ta, Hneirôhpa deikua cha viasa hluhpi a hnei.

21A vaih a mohnaopa cha moleipa châ ta, Dyhchhiepazy chô liata a ria a phapa deikua cha vânoh a to aw.

22Hmo pha leipa tao a chhuahpazy cha viavi tyh ei ta, Hmo pha tao a chhuahpazy deikua cha kyhpachâna nata biehmeiseihpa ama hlao tyh.

23Hriapasana to liata athôhna y ta, Reih hluh thlâhthlipa deikua cha dyhchhiena a tlôkhei.

24Asopazy lakho cha hneirôna châ ta, Ahrupazy hruna deikua cha hruna dei a tlôkhei tyh.

25Pahnokheituhpa dopa cha hronazy pachha ta, Pahnokheituhpa pakheipa deikua cha haipa bie â duakhei tyh.

26Abeipa a chipa chyhsa cha a riahpha ta, A sawzy ta a chhai awpa ama hnei.

27Abeipa china cha hrona tihnawh châ ta, Abeipa a chituhpa cha thina khoheih a khôkhâh aw.

28Phopi maluh hluhpa cha abei rônahna châ ta, Phopi a y vei khiahta cha ryureituhpa chhao a rao aw.

29Hiehâhna kyh liata nainôsôpa chyhsa cha novâhna a hnei hluhpa châ ta, Thlai ta a hie a hâh thlâh ha tyhpa chyhsa deikua cha hruna a cheihchalo tyh.

30Palôh alyna cha sapa tlâhna châ ta, Hiatliana deikua cha ru hmyna a châ.

31Sipasapa a tlybaipa cha a Taotuhpa palôh a pasasapa châ ta, Phahlapazy a ngiachhiepa deikua cha a Taotuhpa a palyupalih.

32Moleipa cha a hmo chhie taopa vâta pao ta, Mosiapa deikua cha thina liata hnabeiseihna a hnei.

33Novâhpa palôh liata cha sona a chalih thlâh ha ta, Ahrupazy hry liata deikua cha â chaluah lymâ.

34Siana ta râh cheihchalo ta, Moleina deikua cha phopi to châta nohzaona a châ.

35So kawpa ta hmo a taopa chakaotuhpa cha, Abei ta khokhei ta; Nozana a tlôkheituhpa chakaotuhpa chô liata deikua cha, Abei pathiiana ta a tla thlu tyh.

← Chapter 13 Jump to: Chapter 15 →