Proverbs 15

Chin SCB2 (Syin Chin Bible)

← Chapter 14 Jump to: Chapter 16 →

1Awneam taw kizona in thin uukna thaisak a, ahihang awtawlok in thinsosak hi.

2Mihing ciimte a pau uh ciang heakna deihuaisak a, ahihang mihing mawmawte in nawnsan thu son nuam uh hi.

3Topa in mun theampo ah bang teng piang ci in mu hi; na pha ih seam a, a sia ih seam zong ama in hong en nginge hi.

4Kamthiam in nuntakna piangsak a, ahihang ngitlo kampauna in na thin hong siasak hi.

5Na pa hong hilnate na awlmawk ngawl tu sia mawmawthuai hi; ama ii hong hilna hong paunate saan theina in ciimna ahi hi.

6A thutang mihingte in a hauna uh keamcing hi, ahihang mihing seksolte in hun haksa hong thet ciang a neisate bosua uh hi.

7Heakna sia mihing a ciimte in kizelsak a, mihing mawmawte ii kizelsak hi ngawl hi.

8Mihing phate thunget ciang Topa lungkim hi; ahihang mihing seksolte hong paipui sa ngaw biakpiaknate ensan hi.

9Topa in mihing ngilote ngamtatziate ensan hi, ahihang a maan a seamte it hi.

10A maan ngawl sep na nei le nasia takin daan hong kipia tu hi; kipuuaphat tu na uuk buale na thi tu hi.

11Mithi khua ngawngawn in, tua munah bang om ziam ci in Topa ii heak tu sia khaam thei ngawl hi; tua ahile bangbangin mihingte in amate khua ngaisutna sia Pathian mai ah seal thei tu ziam?

12A kisathei mihingte in kipau kihil tu a uuk bua uh hi; a ciimzawte tung panin ngaisutna a ngen ngei bua hi.

13Mihingte sia a lungdam uh ciangin maitui uh a, ahihang a hee uh ciangin thinkiamna maipuak nei uh hi.

14Mihing pilvangte in he thua nuam hi, ahizong a nanghte in heak ngawlna taw lungkim uh hi.

15Mizawng khat ii nuntakna sia a tawntung thasaalin dianna hi a, ahihang mihing lungdamte in a nuntak nuamsa tawntung uh hi.

16Hau a ngim nga tu sangin, zawng a Topa kiitakna in phazaw hi.

17Ki etsatna a omna munah sa a limbel neak sangin na it mihingte taw antee neak khop sia phazaw hi.

18Thinngeamna in kam kinialna piangsak a, ahihang thinsauna in kilemna hong puak hi.

19Na da a tham le mun theampo ah haksatna na thuak tu a, ahihang na thumaan le ngim na nga buatu hi.

20Ta ciimte in a pate lungdamsak hi. A mawmawte bek in a nute maimawlsak hi.

21Mihing ciim ngawlte in a mawmawtna taw lungdam uh hi, ahihang a ciimte in a maan sia bek seam tu hi.

22Ngaisut piakna na nga thei theampo la lete zawna na nga tu hi; tua ngawl taw zawna na nga buatu hi.

23A hun taw a kilawm a kiphu tu kammal zak thei sia bangza in thinnopna om ziam!

24Mihing ciimte in nuntakna lampi ah paito uh a, thina lampi a tawnsuk bua uh hi.

25A kisathei mite ii bangkua sia Topa in susia tu a, ahihang ama in meingong khat ii neisa sia a huu tu hi.

26Topa in ngitlo ngaisutnate ngaimaw hi; ahihang ama in kamthiamte diksa hi.

27Thumaan ngawlin meetna nga tu na sawm le na innkuan in ngimna sung na theng tu hi. Sumnguk ne heak in tua hile na khansauzaw tu hi.

28Mihing phate in ngual kam a zo ma in ngaisun masa uh hi. Mihing ngilote in manlang takin zo kik a, ahihang buaina piangsak hi.

29Mihing phate thu a nget ciang Topa in ngai hi, ahihang ama in a ngilote a awlmawk bua hi.

30A maitaite in nang hong lungdamsak hi, tuaciang lungdamhuai thute in na thin hong nuamzawsak hi.

31Nang hong kihil hong kipau ciangin na nadon le a ciim na hi hi.

32Heak nopna na nei buale nangma le nangma kisiatvawt na hi hi. Kipau kitekna na saang thei le na ciim seseam tu hi.

33Topa thasiana in pilna heakna khat ahi hi. Patoaina na saan thei ma in na kiniamkhiak masak kul tu hi.

← Chapter 14 Jump to: Chapter 16 →