Proverbs 17

Chin SCB2 (Syin Chin Bible)

← Chapter 16 Jump to: Chapter 18 →

1Thinngimna taw kidim inn khat sung anneakpoai ah anneak sangin anluum ko bekkhat thinnuam a, neak sia phazaw hi.

2A pil naseam khat in a mannung ngawl a topa ii tapa tungah thunei tu a, a ngamh sung pan khen khat lua tu hi.

3Khamh le ngunn sia mei taw hal in kisit hi, Topa in mihing khat ii thinsung sit hi.

4Mihing ngilote in ngitlo ngaisutnate diksa a, leilot theite in leilot thu diksa hi.

5Mihing zawngte na nuisan le, amate a vawt Pathian a selno na hi hi. Midang khat ii kaamsiatna tungtaang ah diksa in na om le daan na thuak tu hi.

6Patangnote in a pate huvau in a angtan uh bangin pasal haamte in a tute huvau in angtang uh hi.

7Ngual ii zatakte in leilot thu son ngawl hi, tuaciang mihing mawmawte in a mannei thuson tu bangma he ngawl hi.

8Mihing pawlkhat in sumnguk piakna sia mitbum bang hi thei tu in ngaisun uh hi; amate in sumnguk piakna taw na theampo seam thei tu in um hi.

9Mihingte ii hong it tu na nuam uh le no tungah hong khial ciangin maisak vun. Tatkhialnate teptee in nei leang ngualtamh hina khentham thei hi.

10A mawmaw khat sia zakhatvei saatna taw a heak tu sangin, a pilvang khat in khatvei teihna taw tamzaw he thei hi.

11Buaina a piangsak tawntung mihing seksolte kungah thina sia kamtai ngilo khat bangin hong pai tu hi.

12A mawmawthuai tupna taw a komla mihing mawmaw pawlkhat taw kimu tu sangin, a note a kimatsak vompui khat taw kisi leang phazaw hi.

13Thupha khat sia thusia taw na thuk le na bangkua sungah siatna a veng ngei buatu hi.

14Kam kinial kipatna in tuicimna phung pan tuikee kipat bang hi; a nasiat ma in tawp vun.

15A maw ngawl khat mawsakna ahizong mi seksol khat tha thongna ahizong Topa atu in ngaimawkhuai khawm hi.

16Mihing mawmaw khat ii tungah pilna sin natu sum bosakna in phat tuamna om ngawl hi, banghang ziam cile ama in pianpui khentel theina nei ngawl hi.

17Ngualtamhte in a ki itna kilak tawntung uh hi. Ngimna thuak khawm tek tu ih hi buale unau khat ih hi man bang om ziam?

18Khuangaisun ngawl te bekma in ngual leiba losak tu in kamciam tu hi.

19Mawna a lamnai sia in ngimna vawt a lamnai ahi hi. A tawntungin na kisuangtaak le ngimna a zawzong na hi hi.

20A sia vive ngaisun a, a paute in a pha mu tu lamet thei om ngawl a — siatna bek mu tu hi.

21Mawmawthuai nasepte a seam tate ii nu le pa atu in heena le khuangaina simngawl a dang bangma a om bua hi.

22Maituina in na ci hong damsak hi. A tawntung mainuu a omna in vuitat zok ngawl thina ahi hi.

23A maan ngawl thukhenmangte in sumnguk ne ku hi, tuasia ciang a khaikim thukhenna kivawt nawn ngawl hi.

24Mihing pil khat in ciim ngamtat tu tumh hi, ahihang a mawmaw khat in a tuatuam tumh hi.

25Ta mawmawte in a pate atu in heena le a nute atu in thinnat khuangaina piangsak hi.

26A maw ngawl khat liau piak tu sia maan ngawl hi; mihing phate daan a khak ciangin thukhaikim lam pan pialsak hi.

27Ama le ama a kimuang khat sia pau tawntung ngawl hi. A om hithiat mihingte sia thuthuk tatak muna nei hi.

28A tawpna ah, mihing mawmaw khat ngawngawn zongh pau bua hen a, a kam iim in om le a ciim a pilvang ma kisa thei hi.

← Chapter 16 Jump to: Chapter 18 →