Proverbs 9

Chin SCB2 (Syin Chin Bible)

← Chapter 8 Jump to: Chapter 10 →

1Ciimna in a inn sa a, khuam sali phut hi.

2Ama in poai vawt natu nganno khat ngosakin, sapittui sungah hel thei tuatuamte a hel zawkciang sabuai phaasak hi.

3Ama in a naseam numeite sam a, khua sung a saang belna mun pan hi bangin ausak hi;

4“Heakna nei ngawl mite awng, hong tum tavun!” Tuaciang mi mawmawte munah ama in;

5“Hong pai tavun a, ka an ne in, ka hel sa sapittui ne vun.

6Heakna nei ngawl mihingte taw kitholna nusia vun a, nungta vun. Heakna lampi zui in” ci hi.

7Mihing kisathei khat na hil na pau le hong lanna bek na thuak tu hi. Mihing tatsia khat na teih le thinnatna bekma na nga tu hi.

8A kisathei khat bangma hunin hilin pau heak in; ama in tua hu in nang hong ensan tu hi. Ahihang mihing ciim khat hilin pau lete ama in nang hong zakta tu hi.

9A ciimte khat ii tungah na ci pawpo in ama ciimsak seseam tu hi. A thutang khat ii tungah na son khat sia in ama ii heakna belap hi.

10Ciim natu in Topa na thasia maksak kul hi. A Thiangtho Pa na he le telthiamna nei na hi hi.

11Ciimna in kum tam mama na khan hong sausak tu hi.

12Ciimna na nei le a hampha tu sia in nangma na hi a, ciimna na nial le a thuak tu sia nangma na hi hi.

13Mawmawtna sia a au vazak, heakna nei ngawl, a maizum maw numei khat taw kibang hi.

14Ama in a kongbiang ah to a, ahibuale khua sung a saangbelna munah to in,

15amate nasep tek ngaisun a, hong papai mihingte tungah:

16“Hong tum tavun, heakna nei ngawl mihingte awng!” ci hi. A mawmawte mun ah:

17“A kingu tuidam in thum zaw hi. A kingu anluum in lim zaw hi” ci hi.

18Ama ii inn sungah a tumte thi a, a tum sate sia tu in mithi khua, a thukbelna ah a om hunlam tua numeinu ii a theam zawkte in a he bua uh hi.

← Chapter 8 Jump to: Chapter 10 →