Proverbs 21

Chin SCB2 (Syin Chin Bible)

← Chapter 20 Jump to: Chapter 22 →

1Topa in luitui luanna lam ol takin a heak bangin kumpipa khat ii ngaisutna uk hi.

2Na sep na vawt theampo maan sa tha tu ni hi; ahihang Topa in na tupna laingilte tungah thukhen hi ci in ciamtee in.

3A maan le ahi tu bangin seam in; tua in sangaw biakpiakna sangin Topa lungdamsak zaw hi.

4Mihing seksolte sia amate ii a kihisakna le a kisaktheina in uk hi, tuaciang hisia in mawna ahi hi.

5Pha takpi ngeal in, tam mama na nei tu hi; na lawplai leih le a kicing na nei ngei buatu hi.

6Thumaan ngawlna taw na nga hauna bo pal tu a, ahihang thina thaang sung hong tumpui ma in bo ngawl tu hi.

7Mihing seksolte sia amate ii ngoltolna taw lal uh a, amate in a maan sep tu nial uh hi.

8Mimawte in lampi koai tawn uh hi; a maw ngawlte in a maan seam hi.

9A nge hat zi khat taw inn khat sung teenkhop sangin innkhum tungah teang leang phazaw hi.

10Mi seksolte in ngilkial andu bangin siatna vawt nuam hi; amate in kuama tungah hesuakna nei ngawl hi.

11A kihisak khat in daan a khak ciangin khuangaisun meal ngawl khat ngawngawn in pil law hi. A ciim khat in ama a kihilna tung panin pilna nga tu hi.

12Thumaan thutang ahi Pathian in, mihing seksolte inn sungah bang piang ziam ci in he a, a seksolte siacipsak tu hi.

13Mizawngte auna aw ngai tu na nial le, hu tu dei a, nangma ii hu ngetna aw hong kizaaksak ngawl tu hi.

14Mihing khat po in nang tungah hong thin uuk le letsong khat piak ku na taw ama thim tu hi.

15Thukhaikimin a kisep ciang, mihing phate lungdam uh hi. Ahihang mihing ngilote thinkiamsak hi.

16A kilawm ngamtatna pan, a puapial pawpo thina in ngak nginge hi.

17A nuam leilam nuntaknate, sapittui le anlim neak lei nate in nang hong hausak ngeingawl tu hi.

18Mihing seksolte in mihing phate tungah thuaksak tu a hanciam ngimna teng, amate tung ma ah theng kik hi.

19A ngenge, a phuphun zi khat taw teenkhop sangin sennealngam sungah teang leang phazaw hi.

20Mihing ciimte in hauna le nopsakna taw nungta uh hi, ahihang mihing mawmawte in sum a nga pawpo a manlang thei zaza in zangh uh hi.

21Dik in a, thumaan in, tua hile khansau in na nungta tu hi; ngual dangte in hong zakta tu a, ahi tu bangin hong phatvawt tu hi.

22A pil a thiam ngalkapmang khat in mihing thahatte ii a cin khuapi khat sia la zo hi, tuaciangin amate ii muan khuapi luphungte susia hi.

23Buaina taw na kipeal nuam le, na kampau kidawm in.

24A kihisak mihing khat hong lak ta'n, tua hile a kisathei, a kiphasak le ngual atu a ngaisun ngawl mihing khat kong lak tu hi.

25Nasep tu a nial mihing datham khat in ama le ama kithat hi bek hi;

26a dei teng a nga natu a ngaisut sia ama nasep hi bek hi. Thumaan thutang khat ahile ngual pia thei a, ngo takin pia hi.

27Mihing seksolte ii sangaw biakna a piak ciang, a tuanin ngitlo thin taw a pia le Topa in huatsa hi.

28A leilot khat ii tetti panna sia ki um ngawl hi, ahihang thu a ngaisun kaak mihing khat ii kammal sia kisaang hi.

29Thumaan thutang mihingte in amate le amate kimuang uh hi; a seksol mihingte in a thiam thei za in a kivawttawm uh kul hi.

30Mihingte ciimna pilna, kivakna le thuthuk muna cite sia — Topa in nang hong langpan le, kimanna nei ngawl hi.

31Ngalsim natu in siphute na kinging kholsak thei hi. Ahihang ngalzawna hong pia pa in Topa ahi hi.

← Chapter 20 Jump to: Chapter 22 →