Proverbs 3

Chin SCB2 (Syin Chin Bible)

← Chapter 2 Jump to: Chapter 4 →

1Ka tapa awng, kong hilte mangil heak in. Vawt a, kong sawlte a tawntungin ciamtee in.

2Kong hilnate in khansauna le nuntakna nuam hong pia tu hi.

3Thuciipna le thumaanna thasua ngei heak in. Na ngawng kiimkot ah vet in a; na lungtang tungah at in.

4Hi bangin na ngamta le Pathian le mihingte in nang dik hong sa tu hi.

5Na thin theampo taw Topa muang in. Nangma ii he na kisakte bangma hunin muang heak in.

6Na sep na vawt theampo sungah Topa phawk in, tua hile ama in a maan lampi hong lak tu hi.

7Na hi bang sangin a ciim zaw in kituat heak in, Topa ii thu ni lel in a, a maan ngawlte vawt tu nial in.

8Tuabangin na hile zatui pha bang hong hi tu a, na liamnate hong damsak in, na natnate hong nuamtuamsak tu hi.

9Leitang tung pan a piang theampo sung pan a phabel sia piakna taw Topa patoai in.

10Tuabangin na hile na ansaal sia antangte taw kidim tu a, na khol natu om ngawl liang dongin sapittui tam mama na nei tu hi.

11Ka tapa awng, Topa in tekna, hilna hong nei ciangin pha takpi in nadon in a, kidop natu hong piak thu hi ci in saang in.

12Nu le pate in a kiphatsak pui a ta khat, a tek a hil bangma Topa in ama ii itte tek hi.

13A ciim a hong kikheal mihing — telthiamna a nei pa in mihing lungdam ahi hi.

14Tua ii sungah ngunn sangin meetna tam om zaw hi; nang atu in khamh sangin man neizaw hi.

15Ciimna sia suang manphate sangin manpha zaw hi; deihuai na sak na khat pawpo taw zong a kitee ngat thei bua hi.

16Ciimna in khansauna hong pia a, hauna le minphatna zongh hong pia hi.

17Ciimna in na nuntakna hong nuamsak tu a, thinmuang takin hong tonpui tu hi.

18Mihing ciimte sia a lungdamte ahi uh hi; ciimna in nuntakna pia tu hi.

19Topa in simlei sia ama ciimna taw bitphua hi; ama heakna taw van sia a omna munah koi hi.

20Ama ciimna in ngunte luangsak hi, tuaciang leitang atu in meeikaaite in nguatui piasak hi.

21Ka tapa awng, na ciimna le a thuk na muna sia keamcing in kholet in. Na kung panin taisua heak in.

22Tuate in nangma nuntakna hong pia tu hi, a nuam le lungdam nuntakna hong pia tu hi.

23Na paina lampi ah sumsina om ngawlin na pai tu a, zongh na lutu beak buatu hi.

24Lupna na zot ciang zong na lau buatu a, zankhuateakin mut citakin na mu tu hi.

25Mi seksolte tungah vuipi suangval bangin thakhatthu a tung thei lal theinate patau in na nei buatu hi.

26Topa in nang hong keamcing tu hi. Ama in thaang sungah nang hong awksak buatu hi.

27Bang hun po ahizong, na hi thei lai teng a kitaangsamhte tungah phatna vawt in.

28Tutawm in na hu thei tu ahi nale zing ciang dong na innpaamte in ngaksak heak in.

29Na innpaamte tungah siatna a piangsak thei bangma sawmku heak in; amate in nang hong muangin na nai ah hong teang hi.

30Nang tungah siatna hong vawt ngeingawl mihing khat taw bangbang po thu om kale kam kinial heak in.

31Mihing ngoltolte eang heak in a, amate ngamtat bangin ngamta tu in khensat heak in,

32banghang ziam cile Topa in ngamtat pha ngawl a vawtte ngaimaw a, ahizong thutangte sia ama mimuan in koi hi.

33Topa in mi seksolte inn ah haamsiatna koi a, ahihang a thutangte inn sia thupha pia hi.

34Ama in a kisatheite zangh ngawlin, a kiniamkhiakte maipha pia hi.

35Mihing ciimte in a pok huai minphatna nga tu a, ahizong mihing mawmawte in maimawlna bekma nga thua tu hi.

← Chapter 2 Jump to: Chapter 4 →