Leviticus 13 — Chin TBR17 (Tedim Bible Revision 2017)

1Topa in Moses le Aaron kiangah,

2“Mi khat in ama pumpi vun tungah a bawk ahi a, meima ahi a, a mel tuampian ahi zongin a neih a, tua pen ama pumpi vun tungah phak natna a suah leh, tua pa pen siampipa kiang ahi a, ama tapa siampi khat peuhpeuh kiangah ahi zongin kipaipih ding hi.

3Siampipa in ama pumpi vun tunga natna mun vel ding hi. A natna munah a om a multe kangin ama vun sangin a natna thuktum zaw-in a kimuh leh, tua pen phak natna hi a, siampipa in a vel khit ciangin amah a nin hi, ci-in gen ding hi.

4Ahih hangin ama pumpi vun sungah a natna mun kang napi-in, a vun sangin a thuk lo zaw bangin omin, tua sungah a multe kang loin a om leh, siampipa in ni sagih sung cina pa khumcip ding hi.

5Siampipa in a ni sagih ni-in amah vel dinga, a natna noptuamin, a natna in a vun sung lawh lo hi ci-in a muh leh, siampipa in ni sagih sung mah khumcip lai ding hi.

6Siampipa in a ni sagih ni-in amah velkik dinga, a natna mun mualin, a vun sung a lawh kei leh, siang hi, ci-in siampipa in gen ding hi. Tua pen meima mawkmawk hi lel a, amah in a puante sawpin a siang hi ding hi.

7Ahih hangin amah a sian nadingin siampipa kiangah a kilah khit ciangin a meima in a vun sung a lawh leh siampipa mai ah kilakkik ding hi.

8Siampipa in vel dinga, a meima in a vun sung a lawh leh phak natna hi a, siampipa in amah a nin hi, ci-in gen ding hi.

9“Mi khat in meima a neih ciangin siampipa kiangah kipaipih ding hi.

10Siampipa in vel dinga, a vun sungah a bawk kang omin, tua in a multe kangsakin a bawk sungah ma thak a om leh,

11tua pen ama pumpi vun sungah a om lui sa phak natna hi a, siampipa in amah a nin hi, ci-in gen ding hi. Amah a nin ahih manin khumcip lo ding hi.

12Siampipaʼ muh theihna ciangah tua natna in a vun phukhamin, tua natna a veipaʼ vun khempeuh a lutang panin a khe dongin a lawh khit leh,

13siampipa in vel dinga, a natna in a pumpi khempeuh a lawh khit leh siampipa in tua natna tawh kisai-in amah siang hi, ci-in gen ding hi. A pumpi-in kang khin ahih manin amah a siang ahi hi.

14Ahih hangin ama tungah ma thak a kilat ciangin amah a nin hi ding hi.

15Siampipa in a ma thak velin, amah a nin hi, ci-in gen ding hi. Bang hang hiam cih leh a ma thak pen phak natna ahih manin a nin ahi hi.

16Ahih hangin a ma thak pen kikheel kikin a kang a suah leh, siampipa kiangah pai dinga,

17siampipa in amah velin a natna pen a kang a suah leh, siampipa in natna a veipa siang hi, ci-in gen dinga, amah a siang hi ding hi.

18“Mi khatpeuhʼ pumpi vun sungah a dam sa meimatum khat om a,

19a meimatum munah a bawk kang ahi a, a san kang mun ahi zongin a om leh, siampipa kiangah kilak ding hi.

20Siampipa in vel dinga, tua pen a vun sangin thuk zaw-in a multe a kang a suah leh, siampipa in amah nin hi, ci-in gen ding hi. Tua pen phak natna hi a, meimatum sung tawnin hong phu khia ahi hi.

21Ahih hangin siampipa in velin, tua tunga a multe kang loin a vun sangin a thuk zawk kei a, mualin a om leh, siampipa in ni sagih sung khumcip ding hi.

22Tua in a vun sung a lawh leh phak natna hi a, siampipa in amah nin hi, ci-in gen ding hi.

23Ahih hangin a natna mun pen mun khat bekah omin a kilawh kei leh meimatum pawn hi a, siampipa in amah a siang hi, ci-in gen ding hi.

24“Tua ahih kei leh, pumpi in a vun tungah mei kaangma khat nei-in tua mei kaangma a thak mun pen a san kang ahi a, a kang ahi zongin hong suah leh,

25siampipa in vel ding hi. Tua mun a om a multe kangin a vun sangin a natna a thuk zawk leh, tua pen phak natna ahi hi. Tua pen mei kaangma tawnin hong phu khia hi a, phak natna ahih manin siampipa in amah a nin hi, ci-in gen ding hi.

26Ahih hangin siampipa in velin, tua mun a multe kang loin a vun sangin a thuk zawk kei a, mualin a om leh, siampipa in ni sagih sung khumcip ding hi.

27Siampipa in a ni sagih ni-in amah vel ding hi. Tua in a vun sung a lawh leh phak natna hi a, siampipa in amah nin hi, ci-in gen ding hi.

28Ahih hangin a natna mun pen mun khat bekah omin a vun sung lawh loin mualin a om leh, tua pen mei kaangma pan a bawk hi a, mei kaangma pawn ahih manin siampipa in amah siang hi, ci-in gen ding hi.

29“Numei ahi a, pasal ahi zongin a lutang tung ahih kei leh a kha ah meima khatpeuh a neih ciangin,

30siampipa in tua natna vel ding hi. Tua natna pen a vun sangin thuk zaw-in a kimuh a, a sunga a multe eng-in a mal a neu leh, siampipa in amah a nin hi, ci-in gen ding hi. Tua pen cithak ahi, lu-phak ahih kei leh kha-phak natna ahi hi.

31Siampipa in cithak natna velin, a vun sangin thuk zaw lo bangin kimu-in tua sungah mul vom a om kei leh, siampipa in ni sagih sung cithak natna tawh tua pa khumcip dinga,

32a ni sagih ni-in siampipa in a natna vel ding hi. A cithak kilawh loin, a sungah mul eng om loin, a cithak pen a vun sangin thuk zaw loin a kimuh leh,

33amah le amah a mul kikiat dinga, ahih hangin a cithak san kiat lo ding hi. Siampipa in a dang ni sagih sung mah cithak natna tawh tua pa khum ding hi.

34A ni sagih ni-in siampipa in a cithak vel dinga, a cithak in a vun sung lawh loin, a vun sangin a thuk lo zaw-in a kimuh leh, siampipa in amah a siang hi, ci-in gen ding hi. Amah in ama puante sawp dinga, a siang hi ding hi.

35Ahih hangin amah a kisiansak khit ciangin a cithak in a vun sung a lawh leh,

36siampipa in vel dinga, a cithak in a vun sung a lawh takpi leh, siampipa in mul eng a zon ding kisam lo hi; amah a nin ahi hi.

37Ahih hangin ama mitah, cithak noptuam zo hi, ci-in mu a, a sungah mul vom po-in a cithak a dam leh, amah a siang hi a, siampipa in amah a siang hi, ci-in gen ding hi.

38“Numei ahi a, pasal ahi zongin, a pumpi vun tungah a mel tuampian a kang mun a neih leh,

39siampipa in vel dinga, a pumpi vun tunga om a tuampian munte pen a kang milmial ahihleh, tua pen vun a phukham meima hi a, amah a siang hi ding hi.

40“Mi khat a sam pulh a, a lu a tol hangin amah a siang ahi hi.

41Mi khat a taltang le a paang panin a sam le a mul a pulh leh, amah a talkolh hi lel a, amah a siang ahi hi.

42Ahih hangin a lutol tung hitaleh a talkolh tung hitaleh a san kang meima a om leh, tua pen a lutol tung ahih kei leh a talkolh tunga a suak khia phak natna ahi hi.

43Tua ciangin siampipa in amah vel dinga, a bawk natna pen a lutol tung hitaleh a talkolh tung hitaleh a pumpi vun tunga phak om tawh kibangin a san kang ahihleh,

44amah pen miphak hi a, a nin ahih manin siampipa in amah a nin hi, ci-in a gen kul hi; a lutang tungah ama natna a om ahi hi.

45“Tua natna a nei miphak pa in puan kekte silhin a sam phiahsak dinga, amah in a muk humin, ‘Nin, nin!,’ ci-in kiko ding hi.

46Amah in a natna a neih lai teng a nin hi ding hi. Amah a nin ahih manin giahphual pualam mun khat ah amah guak teeng ding hi.

47“Samul puan hitaleh saihadial puan hitaleh, puan khat peuhpeuh tungah phak natna a om ciang,

48tua saihadial puan, samul puante, a tung le a pheiteʼ tung hitaleh, savun le savun tawh a kibawl na khat peuhpeuh tungah a om ciangin,

49tua natna pen a hing melin ahi a, a san melin ahi zongin puan tungah a kilat ciang, puan a tung a phei tung hitaleh savun le savun tawh a kibawl na khat peuhpeuh tungah a om ciangin, tua pen phak natna hi a, siampipa kiangah kilak ding hi.

50Siampipa in a natna vel dinga, tua natna a banna van pen ni sagih sung koihcip ding hi.

51Tua ciangin amah in a ni sagih ni-in a natna velkik ding hi. A natna pen puan tungah kizelin, puan a tung a phei ah hitaleh, savun le savun a kizatna na khat peuhpeuh tungah a om leh, tua natna pen a lauhuai phak natna hi a, a nin ahi hi.

52Amah in a puan hal ding hi. Tua natna pen puan a tung a phei ah hitaleh, samul puan saihadial puan hitaleh savun tawh a kibawl na khat peuhpeuh tungah a om leh hal ding hi. Bang hang hiam cih leh tua pen a lauhuai phak natna ahih manin mei sungah kihal ding hi.

53“Siampipa in velin, a natna pen puan tung, a tung a phei ah hitaleh, savun tawh a kibawl na khat peuhpeuh tungah a kizelh kei leh,

54siampipa in tua natna a banna pen amaute in a sawp ding uh thu pia dinga, amah in a dang ni sagih sung mah tua na koihcip ding hi.

55Siampipa in tua natna a banna pen a kisawp khit ciangin vel ding hi. Tua natna a banna mun a mel a kikheel kei leh, a natna a kizelh loh hangin tua pen a nin mah ahi hi. Tua natna pen a sung lamah ahi a, a pua lamah ahi zongin a baan leh mei sungah tua puan na hal ding uh hi.

56Ahih hangin siampipa in vel a, a kisawp khit ciangin a meima a mualh leh, amah in a puan tung pan hitaleh savun tung pan hitaleh a puan a tung a phei tung pan hitaleh natna a banna mun bal khia ding hi.

57Tua ciangin a puan tung hitaleh puan a tung a phei tungah hitaleh savun tawh a kibawl na khat peuhpeuh tungah a kilatkik leh, tua natna a kizel ahih manin natna a banna pen mei tawh na hal ding uh hi.

58Ahih hangin a puan hitaleh puan a tung a phei hitaleh savun tawh a kibawl na khat peuhpeuh a kisawp khit ciangin tua natna a pai khiatna na pen, a nih veina kisawp kikin a siang hi ding hi,” a ci hi.

59Hih pen samul puan hitaleh saihadial puan hitaleh puan a tung hitaleh a phei hitaleh, savun tawh a kibawl na khat peuhpeuh tungah a om phak natna tawh kisai-in siang hiam, nin hiam, ci-in khen nading ahi hi.