Leviticus 27

Chin TBR17 (Tedim Bible Revision 2017)

← Chapter 26 Jump to:

1Topa in Moses kiangah,

2“Israel mite tungah hih bangin gen in: Mi khat in a tuam vilvelin kiciamna a bawl ciangin, tua a kiciam mite pen nangmah in Topa -aʼ in na seh dinga, a nuai-a kiseh bangin kitanh-in suaktakik thei ding hi.

3Pasal kum sawm nih panin kum sawm guk a phate a man na sehna pen, biakinn shekel zangin pasal khat ciangin ngun shekel sawm nga hi ding hi.

4Numei ahihleh shekel sawm thum hi ding hi.

5Kum nga pan kum sawm nih ciang a phate, pasal ahihleh shekel sawm nih hi dinga, numei ahihleh shekel sawm hi ding hi.

6Kha khat pan kum nga ciang a phate pen pasal ahihleh ngun shekel nga hi dinga, numei ahihleh ngun shekel thum hi ding hi.

7Kum sawm guk pan a tungsiahte pen pasal ahihleh shekel sawm le nga hi dinga, numei ahihleh shekel sawm hi ding hi.

8“Mi khatpeuh zawng lua-in nangma sehzah a piak zawh kei leh, siampipa kiangah a mi hong kipaipih dinga, siampipa in ama man seh ding hi. A kiciam mipa a siamna tawh kizui-in siampipa in ama man seh ding hi.

9“Mite in Topaʼ tungah biakna-in a piakte pen ganhing ahihleh, mi khatpeuh in Topaʼ tungah a piak tua bang ganhingte khempeuh a siangtho ahi hi.

10Amah in na khat peuhpeuh, a hoihte a hoih lo tawh ahi zongin, a hoih lote a hoih tawh ahi zongin, laih lo, khek lo ding hi. Amah in ganhing khat ganhing a dang khat tawh a khek leh, tua ganhing le a khekna ganhing a siangtho hi khawm ding hi.

11Tua pen Topaʼ tungah a kipia thei lo ganhing nin khat ahihleh, mipa in siampipa mai ah a ganhing paipih dinga,

12siampipa in hoih hi, ci-in ahi zongin sia hi, ci-in ahi zongin a man zah seh ding hi.

13Ahih hangin amah in tua ganhing a tatkik nop leh, a kisehna banah nga ah khat behlap ding hi.

14“Mi khatpeuh in a siangtho dingin Topaʼ tungah a inn a ap ciangin, siampipa in a hoihna le a hoih lohna tawh kizui-in a man seh dinga, siampipaʼ sehna bangin kip ding hi.

15A ap pa in ama inn a tatkik nop leh, a kisehna banah nga ah khat sum tawh behlap dinga, tua inn ama aʼ hikik ding hi.

16“Mi khat in a luah ama leitang phel khat Topaʼ tungah a ap leh, nangma sehna pen khaici vawh zah ding tawh kizui ding hi. Mangbuhham beem khat dim a pawina leitang pen ngun shekel sawm nga-in kiseh ding hi.

17Amah in jubilee kum a kipanin a lo a ap leh, nangma sehna zahzah bit ding hi.

18Ahih hangin jubilee kum khit ciangin amah in a lo a ap leh, siampipa in jubilee kum kik dong a om lai kumte tawh kizui-in a manzah sum seh dinga, nangma sehna zah panin kikhiam ding hi.

19Lo a ap pa in a tatkik nop leh, a kisehna banah nga ah khat sum tawh behlap dinga, tua lo ama aʼ hi suak ding hi.

20Ahih hangin amah in a lo a tanh nuam lo ahi a, amah in midang khat tungah a zuak ahi zongin ahihleh, tua pen amah in tanhkik thei nawn lo ding hi.

21A lo pen, jubilee huna piakkhiat ciangin, a ki-ap sa lo mah bangin Topaʼ tungah a siangtho hi dinga, siampipa in tua lo tang ding hi.

22“Amah in luahna tawh a neih ahi lo, a lei sa lo pen Topaʼ tungah a ap leh,

23siampipa in jubilee kum ciang dong ding tua man seh dinga, tua ni-in a mipa in a kiseh zah, Topaʼ tungah a siangtho-in pia ding hi.

24Jubilee kum ciangin a lo pen a kileina pa, gamhluahna tawh tua leitang a nei mipa tungah tungkik ding hi.

25“A kisehna peuhmah biakinn shekel kizang ding hi; gerah sawm nih ciangin shekel khat hi ding hi.

26“Ahih hangin tacil pen Topa aʼ hi khinzo ahih mah bangin, kuamah in ganhing tacilte ap thei lo ding hi; bawng hitaleh tuu hitaleh Topa -aʼ ahi hi.

27Ganhing nin ahihleh, nangma sehna bangin amah in leikikin, tua banah seh nga ah khat behlap ding hi. Tua hi lo a, a kitat kei leh, a kisehna bangin kizuak ding hi.

28“Ahih hangin mi khat in a neih, Topaʼ tungah a ap, a ki-ap sa nate, mi hitaleh ganhing hitaleh, a luah ama lo hitaleh, kizuak lo ding, kitanh lo ding hi. A ki-ap na peuhmah Topaʼ tungah a siangtho pen ahi hi.

29Mite lak nangawn panin a kisusia mang dingin a ki-ap sa mi peuhmah, kitanh lo dinga, kithat ding hi.

30“Leitang panin a piang khempeuh khaici hitaleh singgah hitaleh sawm-ah-khat Topa aʼ hi a, Topa adingin siangtho hi.

31Mi khatpeuh in sawm-ah-khat a piak na khat peuhpeuh a tat nop leh, amah in tua banah nga ah khat behlap ding hi.

32Bawng hon leh tuu le keel hon sawm-ah-khat khempeuh le a cing paʼ ciangkhut nuai-a a pai ganhing khempeuh sawm-ah-khat peuhmah Topa adingin a siangtho hi ding hi.

33Mi khat in pha hiam sia hiam ci-in kantel lo dinga, khek lo ding hi. A khek leh, tua leh a khekna pen a siangtho hi khawm ding hi. Tua pen kitanh lo ding hi,” a ci hi.

34Hihte pen Sinai Mual tungah Topa in Israel mite adingin Moses tungah a piak thute ahi hi.

← Chapter 26 Jump to: